1 Kwaviya nywie ni wana wa Muungu awakundisao muno, ekaani kwa kubasa msimo wakwe. 2 Ekaani kwa kukundisana inga viya Klistu ekutikundisavyo swie, na kwaajii yetu akelavya mwenye auye na nyuma, akawa inga ntambiko yenye mzingo mtana na lavyo dimtamizado Muungu.

3 Kwaviya nywie ni wantu wa Muungu, ivyo ukianga, na usama na khwiina ya kuwa na vintu khavikundigwa kuwaho gatigati yenu. 4 Naho mwesekugombeka mbui za soni na mbui ya uhezi hambu mbui zesazo kufaa, akini mwakundigwa kutamwiiya mbui za kumtogoa Muungu. 5 Manyeni pwii kuwa, mkianga na wagosoao usama na wenye khwiina ya vintu, mntu inga uyo aigana na mvika vizuu awo wose khawana waupate useuta wa Muungu.

6 Mntu asekuwatiiya kwa ntamwiizi zesazokufaa, kwaajii ntamwiizi inga izo maya ya Muungu yawezea wada wose wesaokumtegeeza. 7 Kwaivyo mwesekutongeana na wantu inga awo. 8 Aho kae nemuwa mwe kiza, akini isasa nywie mumo mwe ung'azi kwa kuungana na Zumbe, ivyo ekaani inga wana wa ung'azi, 9 wantu wekaao mwe ung'azi wagosoa mbui ntana na zedi na zakwei kisingi chose. 10 Nanywi ondezani yada yamtamizayo Zumbe. 11 Naho mwesekuwa hamwe na mbui zesazo kufaa na zakiza, iya wagombekani wantu wasekugosoa mbui izo. 12 Mbui zigosokayo kwa sii na wantu wagosoao mavigaviga ni soni kuyatamwiiya. 13 Akini unga'zi waonyesha pwii kuwa mbui izo khio ntana. 14 Kwaviya ung'azi watenda kia kintu kioneke. Inu nee mana yagombekwa,

"Enuka wee wekugonae na yuyuka kulawa

Kwa wekufao

Nae Klistu endaakung'azie ung'azi wakwe."

15 Naho kauwani mwekaavyo, mwesekwekaa inga wahezi iya inga wantu wenye umanyi. 16 Tumiani vitana kisingi mwekuwacho nacho kwaviya misi izi wantu wagosoa muno makwasukwasu. 17 Ivyo mwesekutenda wahezi, iya mmanye ni yahi yamtamiizayo Zumbe.

18 Naho mwesekukolwa kwaviya phombe khaifaa, iya muongoewe na Muye wa Muungu mwe wekazi wenu. 19 Mkatamwiizana nywie kwa nywie kwa zabuli na wiya na tenzi za Muye na kumtoeya wiya na kumtogoa Zumbe kwa mioyo yenu yose. 20 Misi yose mtogoeni Muungu Tate kwa kia mbui kwa zina da Zumbe yetu Yesu Klistu.

21 Kia yumwe amtunye mweziwe kwaajii ya ntunyo mwekuwayo nayo kwa Klistu.

22 Wavyee, wawatunye wagosi wao inga wamtunyavyo Zumbe Yesu Klistu. 23 Kwaviya mgosi nee mgookezi kwa mkaziwe inga Klistu ekuwavyo mgookezi kwa zumwezumwe da wantu wamzumiiyao, ambao nee mwii wakwe na nee mwekudiohowa. 24 Inga viya zumwezumwe ido dimtegeezavyo Klistu, ivyoivyo wavyee nao wakundigwa wawategeeze wagosi wao kwa kia mbui.

25 Nywie wagosi wakundiseni wavyee wenu inga viya Klistu ekuwakundisavyo wantu wamzumiiyao yee akeavya kwaajii yao, 26 kagosoa ivyo ili kwa Mbui yakwe atizingue na kuwa wantu wa Muungu na kagosoa ivyo bada ya kutisunta kwa mazi. 27 Ili epatie zumwezumwe da wantu dekuwado tana. 28 Viyaviya wagosi mwakundigwa kuwakundisa wavyee wao, inga mii yao wenye. Amkundisae mkaziwe ekundisa yee mwenye. 29 Khahana mntu aukimaye mwii wakwe mwenye, iya awekha khande na kuukauwa vitana, inga Klistu nae awagosoeavyo wantu wakwe wamzumiiyao. 30 Kwaviya swie ni vimamo vya mwii wakwe. 31 "Kwaajii inu, mgosi endaambade tati yakwe na mami yakwe, nae endaatongeane na mkaziwe na awa waidi wendawawe mwii umwe." 32 Kuna ukwei wekufiswao mwe mbui izi, akini miye naona kuwa zamhusu Klistu na zumwezumwe da wantu wakwe wamzumiiyao. 33 Akini ata nywie mwakundigwa, kia mgosi akundigwa amkundise mkaziwe inga ekundisavyo yee mwenye, na mvyee nae akundigwa amtegeeze mgosi yakwe.