1 Nagombeka ivi, mpazi awaho mwana, aigana na mtumwa, etiho vintu vyose ni vyakwe. 2 Kisingi cha umwana akundigwa kukaulwa na kugookewa adi kisingi chekuikwacho na tati yakwe. 3 Viyaviya na swie, tetiwa inga wana wadodo kisingi Klistu khazati kweza, netiwa watumwa wa vintu ambavyo vyaongoewa inusi. 4 Akini kisingi chekupangwacho na Muungu chekubuwaho, akamwagiiya Mwanawe mwe inusi, ekuwaye mntu inga swie na kwekaa asi ya miagiiyo ya Musa, 5 adahe kuwaohowa wada wekuwao waongweewa ni miagiiyo ya Musa, ili tidahe kuwa wana wa Muungu.

6 Kwaajii nywie ni wana wa Muungu, Muungu kamuagiiya Muye wa Mwanawe mwe mioyo yetu, Muye uwo nee atitendae timwetange Muungu, "Aba", mana yakwe, "Tati yetu." 7 Ivyo, wee khio mtumwa vituhu, iya ni mwana, kwaviya wee ni mwana, Muungu kakutenda wee kuwa yumwe wa wana wakwe ambao endaawekhe yada ekuwaikiayo wana wakwe.

8 Aho kae, mwekuwao khamummanya Muungu nee muwa watumwa wa viumbe ambavyo khio muungu mwenye. 9 Akini isasa mwammanya Muungu, na yee awamanya muno kwambwahi mwakunda kuuya vituhu mwe khachu zenu za kae kabla ya kummanya Klistu, ata kukunda kuwa watumwa vituhu? 10 Mwazitunya mbui za misi, na miongo na visingi na myaka. 11 Naogoha kugombeka yadahika ndima nekugosoayo kwaajii yenu yaga bue!

12 Wandugu zangu mwe Klistu, nawaombezani muno muwe inga miye, kwaajii miye khiwa inga nywie. Khemkunigosoeya mbui yoyose fyaimi. 13 Mwamanya kuwa utamu ambao nekuwao nao, nee kintu chekunekhacho phasi ya kuwabiikia nywie Mbui Yedi, aho bosi. 14 Na geezo dekuwapatado mwe mwii, akini khemkunibea wala kuniemea, iya mnihokea inga mndima wa uwanga wa Muungu, hambu Klistu Yesu. 15 Ida nyemi mwekuwayo nayo iita hahi? Nadaha kuvuhuzia ukwei kuwa, inga nee idahikana mngeng'oa meso yenu na kunekha miye. 16 Ivi, isasa khiwa mmasa wenu kwa kuwagombeka ukwei?

17 Awo wahinyi wauhokho watamiwa muno kuwatamiza nywie, akini khawakunda nywie mpate mbui zedi. Wakunda kuwabahuwa na miye ili nywie muwategeeze wowo. 18 Kwakwei ni mbui yedi misi yose kuwaangadikia watuhu mwe mbui yedi, na khio du kisingi miye niaho hawe na nywie. 19 Wanangu niwakundisae, ambao kwa maa ntuhu napata usungu muno kwaajii yenu adi ambaho khachu ya Klistu, indaiyoneke mwe khachu zenu. 20 Natamiwa muno inga niwa hamwe nanywi isasa, nee idahikana nikagombeka na nywie kwa uhuhuzi. Kwaviya nina maatu kwaajii yenu.

21 Nigombekani, ninywi mkundao kuongweewa na miagiiyo, ivi kwei mwamanya miagiiyo igombekavyo? 22 Kwaviya iyandikwa mwe Maandiko ya Muungu, Ibulahimu nee kawa na wana waidi, yumwe wa mndima wa kivyee wa mtumwa na wakaidi ni mvyee esaekuwa mtumwa. 23 Yuda wa mvyee mtumwa nee kavyaigwa inga viya wantu wose wavyaigwavyo, na yuda mwana wa mvyee esaekuwa mtumwa kavyaigwa kulawana na kiaga cha Muungu. 24 Mbui izi ziwa msimo, wavyee awo waidi ni msimo wa maagane maidi. Diagane da bosi, ni diya dekugosolwado mwe muima Sinai, idi nee uyo Hajili wana wakwe wavyaigwa mwe utumwa. 25 Hagai aigana inga viya muima Sinai ambao uko mwe si ya Alabuni, naho aigana inga viya mzi wa Yelusalemu wekuwavyo ambayo iko mwe inusi, kwaajii wana wakwe wako mwe utumwa wa miagiiyo ambayo wekhigwa mwe muima Sinai 26 Akini yuda mvyee mtuhu Sala, nee agookeaye Yelusalemu ya uwanga kwa Muungu, na nee mami yetu. 27 Kwaviya iyandikwa,

"Kuwa na nyemi wee mvyee mwesaekudaha kuvyaa,

towa ugeegee wee ambae khuzati kuvyaa,

Kwaviya wana wa mvyee ekubadwae ni wangi,

kusima yuda mvyee mwenye muumewe."

28 Isasa wandugu zangu, nywie ni wana wa Muungu kulawana na kiaga chakwe inga ekuwavyo Isaka. 29 Akini inga yekuwavyo misi ziya, yuda mwana ekuvyaigwae inga wantu wose wavyaigwavyo, nee amsongeeza yuda ekuvyaigwae kwa udaho wa Muye Muungu, ivyo nee yeivyo isasa. 30 Akini Maandiko ya Muungu yamba mbwai? "Muuse mvyee mtumwa hamwe na wana wakwe, kwaajii mwana wa mvyee mtumwa katu khana apate upazi hamwe na mwana wa mvyee esaekuwa mtumwa." 31 Ivyo wandugu zangu, swie khio wana wa mvyee mtumwa, iya ni wana wa mvyee esaekuwa mtumwa.