1 Inu ni maa yangu ya ntatu kweza henu. Inga Maandiko ya Muungu yekugombekavyo, "Kia mbui yendaiamuiwe kwa uvuhuzi wa wantu waidi hambu watatu," 2 Khigombeka kae, inga viya yekuavyo ntambo ya kaidi. Isasa nagombeka vituhu nikawa hae, wada wose wekugosoaho makwasukwasu kwesiho kuhituka na kubada mavigaviga, naho wada watuhu, nendahoneze khinaniwe na mbazi. 3 Kwaviya mwakunda kumanya inga kwei Klistu agombeka kwembokea miye. Yee khio wakusokea, iya udaho wakwe wagosoa ndima mwenu. 4 Kwaviya kagong'ondewa he mhamba kwaajii ya usokezi, akini isasa ekaisa kwa udaho wa Muungu. Kwaviya swie naswi tisokea kwa kuwa hamwe nae, akini tendatekaise kwa udaho wa Muungu kwaajii yenu. 5 Mamakhanyani wenye mdahe kumanya inga kwei mwazumiiya. Mamakhanyani nywie wenye. Ivi khammanya kuwa Klistu Yesu yuumo mwenu? Inga khivyo nywie mvotwa. 6 Akini nakauwiya kuwa nywie mwamanya kuwa swie khatekuvotwa. 7 Tamuombeza Muungu mwesekugosoa mavigaviga yoyose, akini khio tioneke inga wantu wekuvotao, iya mdahe kugosoa yedi, etiho swie taoneka inga tivotwa. 8 Kwaviya khatidaha kuigana na ukwei, iya tadaha kuubiikia ukwei. 9 Tina nyemi kuwa swie tisokea, akini nywie mna nguvu, ivyo tamuombeza Muungu mtendese kugosoa vitana muno. 10 Nawaandikia mbui izi nikawa hae, ili nendaho nibue henu nesekutenda mkai kwenu. Naho nisitumie udaho nekwekhigwao na Zumbe kuwekha sugusa, kwaviya Zumbe kanekha udaho wa kuzenga na khio kubananga.

11 Isasa wandugu zangu mwekae pheho, tozani ntamwiizi zangu na mtende wamwe, ekaani kwa uivanisi. Muungu wa ukundiso na uivanisi endaawe hamwe na nywie.

12 Ugusaneni kwa ukundiso wa Klistu. 13 Wantu wose wa Muungu wawaugusa. 14 Namuombeza Zumbe Yesu Klistu aendeee kuwa hamwe na nywie. Namuombeza Muungu ukundiso wakwe uwe hamwe na nywie. Namuombeza Muye wa Muungu awaambiize.