1 Ivyo khiona nesekweza kwenu vituhu kuwekha uhovu. 2 Kwaviya inga nikawekha uhovu, ni ndai endayeanekhe nyemi? Ni wada nekuwekhao uhovu. 3 Nee vyekuniekavyo niwaandikie, nchekukunda kweza kwenu na kunekha uhovu na nywie wantu ambao nee mkundigwao kunekha nyemi. Ni kwei miye nikawa na nyemi nywie mwendamuwe na nyemi. 4 Nekuandikaho aho bosi nekiwa na uhovu na masuumizo mangi mwe moyo wangu na uku naiya, nchekuandika kwaajii ya kuwekha uhovu iya kwaajii ya kuwaonyesha kuwa nawakundisa muno.

5 Ikawa kuna mntu kamwekha uhovu mntu mtuhu, khekunekha uhovu mimidu iya kawekha uhovu nywie nyose, naho khikunda kuwa mkai muno. 6 Sugusa ekwekhigwayo ni wantu wangi yamtosha. 7 Yekusigaayo ni kujaa yada agosoayo mntu uyo na kumgea moyo asekweza kuwa na uhovu na kufa maya. 8 Ivyo nawaombeza mwonyeshani kuwa mwamkundisa. 9 Nee khiwaandikia bauwa ida ili kukunda kumanya inga mwadaha kutegeeza kwa kia mbui. 10 Mkamwekea mntu yoyose na miye viyaviya nendanimwekee, kwaviya niekeavyo inga kwei kuna kintu cha kuekea, nina udaho kulawa kwa Klistu ya kuekea. 11 Tesekumwekha Shetani phasi ya kutitiiya kwaviya tamanya ntegaji zakwe.

12 Nekubuaho mzi wa Tiloa, kubiikia Mbui Yedi ya Klistu nee nabwiiya uvi uvugulwa kwaajii ya ndima ya Zumbe. 13 Akini moyo wangu khaukuwa na utuivu kwaviya nchekumuona ndugu yangu Tito, nemana nikawaaga wose na kuita mzi wa Makedonia.

14 Akini atogolwe Muungu yee ambae misi yose atitendae tiongoeane mwe uvoti tikawa tiungana na Klistu, yee atitenda tiambaze mbui ya kwei ya Klistu inga mzingo mtana wa kummanya yee kia hantu. 15 Kwaviya tiwa inga mzingo mtana wa ubani ambao Klistu amlaviya Muungu, ufukizwa kwa wose waoholwao na wada wagao. 16 Kwa wada wagao mzingo uwo ni mfyaimi uetao ufe, akini kwa wada wekuoholwao mzingo uwo ni mtana uetao ugima. Ni ndai adahae kugosoa ndima iyo? 17 Swie khio inga watuhu ambao, watenda mbui ya Muungu inga kintu cha kutaga, iya swie tabiikia Mbui ya Muungu kwei kwaviya tiagiiwa ni Muungu tikawa hamwe na Klistu.