1 Natamiwa inga mkanizizimiza hadodo mwe uhezi wangu. Nizizimizani du! 2 Nawaonea kinyuu, akini ni kinyuu cha Muungu, kwaviya nywie ni inga mndee mwenye kiwaa nekumwombae kwa mgosi yumwe du, uyo nee Yesu Klistu. 3 Akini naogoha kuwa inga viya yuda nyoka kwa unyanyi wakwe wa uhokho akamtiiya Hawa, mamakhanyi zenu zadaha kubananga, mkaeka uzumiwa wenu wa kwei kwa Klistu. 4 Kwaviya inga mntu yoyose akeza na kuwabiikia mbui za Yesu mtuhu khio yuda tekumgombekae, nywie mwamhokea kwa mikono miidi, hambu mwazumiiya muye khio yuda mwekumhokeae, hambu Mbui Yedi tuhu na khio ida mwekuizumiayo kulawa kwetu!

5 Khimamakhanya kuwa miye chekuhungua dodose inga weivyo wetangao, "waagiiwa wakuu." 6 Yadahika miye khimanya kugombeka vitana inga awo wagiiwa watuhu, akini umanyi ninao, mbui inu tiionyesha pwii kia hantu na kia kisingi.

7 Miye kibiikia Mbui Yedi ya Muungu kwenu kwesiho kukunda kuihwa, nee neseeza ili niwenue nywie. Ivi khigosoa masa? 8 Nekugosoaho ndima kwenu, nee nahokea wambiizi kulawa mwe mazumwezumwe matuhu ya wantu wamzumiiao Muungu watuhu. Kwa kugosoa ivyo ni inga khiwahoka watuhu ili niwaambiize nywie. 9 Nekuwaho na nywie, nchekumkauwiiya mntu yoyose kunekha yada niyakundayo, kwaviya wandugu wekulawao Makedonia nee wanekha kia kintu nekukundacho. Shekukunda kuwapisha kwa dodose dia na nendaniendee kugosoa ivyo. 10 Inga viya kwei ya Klistu yekuwavyo umu mwangu, khahana mntu yoyose adahae kunitenda nesekwevuna mwe mbui inu mwe mzi wa Akaya yose.

11 Nagombeka ivyo khio kwaviya khiwakundisa, Muungu amanya kuwa nawakundisa muno.

12 Nendaniendee kugosoa inga nigosoavyo isasa, ili nesekuwekha phasi wada wetangao, "wagiiwa" waondao phasi ya kwevuna ati wagosoa ndima inga swie. 13 Kwaviya, awo ni wagiiwa wa uhokho, wagosoa ndima ya utiizi, wetenda kuwa wagiiwa wa Klistu. 14 Naho khio kihii, kwaviya ata Shetani mwenye etenda kuwa mndima mng'azi. 15 Ivyo khio mbui ya kuhondomaza ikawa na awo wandima wa Shetani wetenda ni wandima wedi wa Muungu. Kisiikizi chao wendawekhigwe kia wakundigwacho kwekhigwa kulawana na ntendwa zao.

16 Nauwiiya kugombeka, mntu asekunimamakhanya kuwa ni mhezi. Akini inga mkanimakhanya ivyo, ehee nidoeani inga mhezi, ili na miye niwe na cha kwevunia ata inga hadodo. 17 Nigombekacho isasa khio kiya ekuniagiiacho Zumbe, mwe mbui inu ya kwevunia, nagombeka du inga mntu mhezi. 18 Kwaviya wantu wangi wevunia wenye kwaajii ya mbui za inusi, viyaviya na miye nendanevune. 19 Nywie, mweona mna akii, nee mana mwawazizimiza na kuwazumia kwa nyemi wantu wahezi! 20 Mwamzizimiza ata mntu awatendae watumwa, mntu awabaiyae, mntu awadidimizae, mntu awabeae, na kuwatowa mwe cheni. 21 Akini taona soni kuzumiiya kuwa nee netiwa wasokezi mwe ayo.

Inga wao wadaha kwevuna, naho ata mie nee nevunia, akini ni uhezi kugosoa ivyo. 22 Ivi, wowo ni Waebulania? Ata miye nami ni Mwebulania. Ivi, wowo ni Waisilaeli? Ata miye nami ni Mwisilaeli. Wowo ni muwango wa Ibulahimu? Ata miye nami ni muwango wa Ibulahimu. 23 Ivi, wowo ni wandima wa Klistu? Ata miye nami nagombeka ayo kikiyau ni mndima wa Klistu kusima wowo. Miye kigosoa ndima itogayo muno, khiikwa mwe nyumba ya kuvugaiwa maa nyingi muno, kitoigwa maa nyingi muno, naho nikawa hehi na kuuya na nyuma maa nyingi muno.

24 Maa shano khitoigwa ngoda magana matatu na kenda na Wayahudi. 25 Khitoigwa ngoda maa ntatu na Walumi, khitoigwa maiwe maa mwenga wakakunda kunikoma, na maa ntatu khibanikiwa ni mei mwe mazimshindo na umo nikacheeza kio na musi mgima. 26 Kia maa mwe ntambo nee ni hehi na kuuya na nyuma mwe mafuiko ya mazi na hehi na kuuya na nyuma kwa wanyama wakai na ni hehi na kuuya na nyuma kulawa kwa Wayahudi wezwangu na wantu wesaokuwa Wayahudi, na ni hehi ya kuuya na nyuma nekuwaho mwe mizi, na nee ni hehi na kuuya na nyuma nekuwaho mzituni, na nee ni hehi na kuuya na nyuma mwe mazimshindo, na nee ni hehi na kuuya na nyuma kulawa kwa wandugu wa uhokho. 27 Khigosoa ndima na kusuumika, chekugona maa nyingi, khiwa na nsaa na khiu, maa nyingi khekuda na maa nyingi khekuwa na magwanda kwegubika mwe pheho. 28 Ukabada ayo yose, kia msi namamakhanya mazumwezumwe yose ya wantu wamzumiiyao Klistu. 29 Inga mntu yoyose kasokea, viyaviya miye kisokea, mntu yoyose akatendwa agosoe mavigaviga, miye nakimwa.

30 Inga ikanikunda kwevuna, aho nendanevunie mbui ziya zionyeshazo usokezi wangu. 31 Muungu Tate wa Zumbe Yesu zina dakwe ditogolwe misi yose, yee amanya kuwa khigombeka uhokho. 32 Nekuwaho Damesiki, mkuu wa mzi, ekuwae asi ya seuta Aleta, nee kaagiiya asikai ili wanigwie. 33 Akini khiseezwa nikawa he ngahu khuu kwembokea he hantu ekuwaho hana phasi he ukanto, nikanyiika kulawa kwakwe.