1 Miye Paolo nawahembeza kwa uhuhuzi wa Klistu, miye naoneka kuwa mhuhuzi niwaho hamwe nanywi, akini ni mkai niwaho hae na nywinywi. 2 Nawahembeza mwesekunitenda kuwa mkai kisingi nezaho henu, kwaviya ni kwei nadaha kuwa mkai kwa wada wose wamamakhanyao kuwa tekaa inga wantu wa inusi. 3 Ni kwei tekaa mwe inusi, akini khatitoana khondo inga wantu wa mwe inusi watoanavyo. 4 Kwaviya vitoanavyo vyetu vya khondo khio vya inusi, akini ni nguvu za Muungu zenye udaho wa kubananga ngome zose. Tabananga kuhigana kwa uhokho, 5 na kubananga kia kikindio cha kwevuna chekuikwacho kuigana na umanyi wa Muungu na kuzigwiiya mamakhanyi zose zimtegeeze Klistu. 6 Naho mwendahomuwe mwategeeza muno, nee swie tendatimwekhe sugusa kia mntu mwesaekutegeeza.

7 Kauwani yada yeiho hemeso yenu. Inga mntu yoyose azumiiya kuwa yee ni wa Klistu, aho amamakhanye kuwa inga weivyo wa Klistu viyaviya na swie nee teivyo wa Klistu. 8 Khiona soni kwevunia udaho ambao Zumbe katekha, kwaviya udaho unu ni kwaajii ya kuwaambiiza mwe kuzumiiya na khio kuwabananga. 9 Khikunda mmamakhanye kuwa nakunda kuwatenda muogohe kwa bauwa zangu. 10 Wamwe wagombeka, "Bauwa za Paolo ni khai na zina ntambaisi khai, akini yee mwenye akawa hamwe na swie ni mhuhuzi naho ntamwiizi zakwe ni zakubewa." 11 Wantu inga awo wamanye, yada tiwaandikiayo mwe bauwa tikawa hae na nywie nee yada tiyagombekayo na kuyagosoa tiwaho hamwe na nywie.

12 Khatidaha kuigana na wada wantu wevunao wenye. Wantu watendao kuwa kihimo cha kuhimia na wantu waiganao wenye kwa wenye, awo ni wahezi. 13 Akini kwevuna kwetu khakuna kwemboke kihimo, kwevuna uko kwendakuwe mwe kihimo cha ndima tekwekhigwayo ni Muungu, ndima tiigosoayo viyaviya henu. 14 Ivyo khatekwemboka miyaka mwe kwevuna kwetu kisingi tekwezaho henu, kwaviya swie tiwa wa bosi kweza henu kuwaetea Mbui Yedi ya Klistu. 15 Naho khatevunia ndima ida yekugosolwayo ni wantu watuhu. Iya takauwiiya viya kuzumiiya kwenu kutendesaho kukua, nee ndima yetu gatigati yenu yendaiwe yagenyea. 16 Aho tendatidahe kubiikia Mbui Yedi mwe si ntuhu hae na nywie, naho khio mbui ya kwevunia kwa ndima wekugosoayo wantu watuhu na hantu hatuhu. 17 Inga Maandiko ya Muungu yagombekavyo, "Mntu yoyose akundae kwevuna, evune mwe yada ekugosoayo kwaajii ya Zumbe." 18 Kwaviya mntu azumiwae khio yuda etogoae mwenye, iya yuda atogolwaye ni Zumbe.