1 Muungu kwa mbazi zakwe, katekha ndima inu tiigosoe ivyo khatifa maya. 2 Tiemea kugosoa mbui za sii na za soni, ata kuwatiiya wantu, ata kuhanganya Mbui ya Muungu na uhokho. Kwesiho tagombeka kwei pwii ili wantu wose wamanye mwe mioyo yao kuwa tiwakwei hemeso ya Muungu. 3 Kwaviya Mbui Yedi tiibikiayo inga khaimanyika vitana kwa wantu, khaimanyika kwa wada wakwagao du. 4 Khawazumiiya kwaviya akii zao zigewa kiza na Shetani muungu wa inusi. Wasekuona vyedi ung'azi wa Mbui Yedi ya ukuu wa Klistu, mwekutionyesha Muungu eivyo. 5 Kwaviya khatibiikia mbui yetu wenye iya tamibiikia mbui za Yesu Klistu ambaye ni Zumbe, swie wenye ni wandima wenu kwaajii ya Yesu. 6 Muungu ekugombekaye, "Ung'azi umuike kulawa mwe kiza!" Nee Muungu amuikae mioyo yetu, na kutekha ung'azi wa umanyi wa ukuu wa Muungu ung'aao mwe cheni cha Klistu.

7 Akini Muungu katekha udaho wa kubiikia mbui zakwe iya swie khatidaha kugosoa dodose inga via vya uwongo, iya tina nguvu ya vihii, iya nguvu iyo yalawa kwa Muungu, naho khio kwetu swie wenye. 8 Misi yose tapata suuba, akini khativotwa, tapata maatu, akini khatifa maya, 9 Waaho wantu wangi wesaokutikunda, akini Muungu yuhamwe na swie, naho ata tikagwa asi, khatiuya na nyuma. 10 Misi yose wantu wakunda kutikoma inga yekuwavyo kwa Yesu, ili ugima wakwe Yesu uwoneke mwe mii yetu 11 Kwaviya mwe misi yose ya ugima wetu tenda na ufe kwaajii ya Yesu, ili ugima wakwe uoneke mwe mii yetu iuyayo na nyuma. 12 Ivyo ufe wagosoa ndima umu mwetu, akini ugima wagosoa ndima umo mwenu.

13 Maandiko ya Muungu yagombeka, "Kizumiiya nee mana kigombeka." Na swie viyaviya tikawa na muye wa uzumiizi, tikazumiiya na taendeea kugombeka mbui idaida ya Muungu. 14 Kwaajii tamanya kuwa Muungu ekumyuyusae Zumbe Yesu, endaatiyuyuse swie hamwe na Yesu na kutiika hemeso yakwe hamwe na nywie. 15 Mbui zose tipatazo ni kwaajii yenu, ili wedi wa Muungu uwabwiiye wantu wose, naho wao wantu wangi wamtogoe muno Muungu, kwa sia iyo Muungu endaaendee kutogolwa.

16 Ivyo khatifa maya ata mii yetu ya chongoi ikasakaa, akini kwa ndani twatendwa wahya msi adi msi. 17 Kwaviya masuumizo tiyapatayo ni madodo du, yatigosoa tiwe tayali ili kuhokea ukuu misi yose kwesiho kisiikizi. 18 Ivyo khatikauwiya yada tidahayo kuyaona iya yada yesayokuoneka. Kwaviya tidahayo kuyaona ni ya kisingi kidodo du, akini viya vyesavyokuoneka ni vya misi yose kwesiho kisiikizi.