1 Kwaviya tamanya kuwa tweya idi ambado tekaa isasa hanu mwe inusi yaani mii yetu, dikeza kubanangwa, Muungu endaatekhe nyumba ntuhu uko uwanga kwakwe, nyumba ya misi yose kwesiho kisiikizi yesayokugosolwa na mntu. 2 Isasa mii inu tekaao mwe inusi taungumia, takunda kuita na kwekaisa mwe nyumba yetu ya uwanga kwa Muungu. 3 Aho Muungu wetu endahoatekhe mii mihya, muye zetu zendaziwe na mii ya kwekaisa, yekaayo misi yose kwesiho kisiikizi. 4 Kisingi tiiaho mwe tweya inu ya mwe inusi yaani mii yetu, taiya umu mwetu kulawana na mbui zitogazo zitilawiiazo. Khio kuwa takunda kuhambua mwii unu ambao wauya na nyuma, iya takunda tekhigwe mii yekaayo misi yose kwesiho na kisiikizi. 5 Muungu mwenye nee atendae mbui izo, naho katekha Muye wakwe kutigosoa ili timanye kuwa endaayagosoe ayo yose.

6 Tiwatintimavu misi yose. Tamanya kuwa kwekaisa mwe mwii unu ni kwekaa hae na Zumbe. 7 Kwaviya tekaa kwa kuzumiiya, khio kwa yada tiyaonayo. 8 Akini titintimaa, naho taona vyedi kusama nyumba inu ambayo ni mii yetu, tisamie kuita kwekaa hamwe na Zumbe. 9 Akini takunda timtamize Muungu, iwe kisingi tekaao mwe inusi hambu uko. 10 Kwaviya swie tose takundigwa kugooka hemeso ya Klistu, tihokee uwamuiyo kulawa kwakwe. Kia yumwe endaahokee kulawana na yada ekugosoayo kisingi ekuwaho mwe inusi, yawe yedi hambu mafyaimi.

11 Kwaviya tamanya kia kikundigwacho kumtunya muno Zumbe, neivyo tabibiiza kuwavuta watuhu. Muungu atimanya pwii, na miye nakauwiya kuwa nywie mwatimanya vyedi muno. 12 Khatikunda kwevuna vituhu kwenu, iya takunda kuwagombeka ambacho mkundigwavyo kwevuna kwaajii yetu swie, ili muwe na mbui ya kuwatambaisa ambao wevuna hemeso ya wantu, na wabada kwevuna yekuwayo mwe mioyo yao. 13 Ikawa taonekana ni wahezi ni kwaajii ya kumgosweeya ndima Muungu, ikawa taonekana ni wenye umanyi ni kwaajii ya kuwaambiza nywie. 14 Kwaviya taongoewa na ukundiso wa Klistu, naho isasa tabunkhua kuwa mntu yumwe kauya na nyuma kwaajii ya kia yumwe, iyo ina mana tiuya na nyuma hamwe na yee. 15 Nae nee kauya na nyuma kwaajii ya wantu wose ili wose wekaisao wasekwekaa kwaajii yao wenye, iya wekaise kwa kwaajii ya yee ekuuyae na nyuma na kuyuyuka kwaajii yao.

16 Kuvokea isasa khatimhima mntu kwa sia ya kiuntu du, ata swie nee timhima Yesu kwa sia iyo, iya isasa khatigosoa ivyo vituhu. 17 Mntu akawa ndani ya Yesu kawa kiumbe kihya, ya kae yemboka na kauwa yawa mahya. 18 Ayo yose kayagosoa Muungu mwenye kutuivanisa swie na yee mwenye, kwa sia ya Yesu Klistu. Yee atekha swie ndima ya kuwaivanisa watuhu kwakwe. 19 Nee kugombeka, Muungu nekawa akiivanisa wantu wose na yee mwenye kwa sia ya Klistu kwesiho kutaazia masa yetu. Yee katekha mbui ya uivanisi.

20 Swie tiagiiwa na Klistu tigombeke na wantu na Muungu mwenye anatutumia swie kuwahembeeza nywie, na swie tinawaombeni kwa sia ya Klistu muivaniswe na Muungu. 21 Kwaviya Muungu kamtenda yee mwesaekuwa na mavigaviga kuwa na mavigaviga kwaajii yetu, ili tigosoe yamtamizayo Muungu.