1 Wandugu zangu tawagombeka mbui ya wedi wa Muungu ekuwekhawo mazumwezumwe ya wantu wamzumiao Klistu wa Makedonia. 2 Wazumizi wa uko nee wageezwa muno kwa suuba nyingi, akini kinyemi wekuwacho nacho ni kikuu muno, etiho newawa wakiwa akini nee wakeavya vintu vyao kwa moyo wa kukundisa. 3 Nadaha kugombeka kuwa wowo nee weavya wadahavyo ata kutendesa udaho wao, kwaviya wekukundavyo wenye, 4 wakatihembeeza wekhigwe phasi mwe mbui ya kuwaambiza wantu wa Muungu weuko Yudea. 5 Wakagosoa kusima tekukauwiavyo! Wakeavya wowo bosi kwa Zumbe naho wakeavya kwetu. Wagosoa ivyo inga akundavyo Muungu. 6 Kwaajii iyo, tikamhembeeza Titu, ekuvokae ndima inu, awaambize kuiganiza ndima iyo ya ukundiso gatigati yenu. 7 Akini nywie mna kia kintu, mwe uzumizi, mwe udaho wa kugombeka na umanyi na kugosoa kia mdahado mwe kugosoa yedi na kutikundisa swie muno, ivyo tawakauwiya muwe wantu wa kweavya muno kwa kia kintu mwe ndima inu ya ukundiso.

8 Khiwashuutisha akini nakunda kuwaonyesha viya watuhu wagosoavyo kia wadahado mwe kuambiiza ili nidahe kumanya viya ukundiso wenu weivyo wa kwei. 9 Kwaviya mwamanya wedi wa Zumbe yetu Yesu Klistu, etiho nekawa na kia kintu, kwaajii yenu akazumiiya kuwa mkiwa, awatende muwe wantu wa vintu vingi kwa ukiwa wakwe.

10 Mamakhanyi zangu ni izi, mwaka wekwembokaho nywie nemuwa wa bosi khio du kulavya vintu vyenu, iya viyaviya nee mkakunda kugosoa ivyo. 11 Isasa mbindiize ndima iyo kwa kukunda inga viya mwekuvokaho, lavyeni viyaviya inga mdahavyo kulavya. 12 Kwaviya ikawa mntu ana moyo wa kulavya, Muungu huokea kia ambacho alavya kuigana na kia ekuwachonacho, naho khiho kwa kia ambacho khana.

13 Tikundavyo swie khio nywie msuumizwe na fuushi ya kuwaambiza watuhu, iya hawe na kuigana. 14 Kisingi iki, mna vintu vingi muwaambize wada wekuhungukiwao, ili wowo kisingi wendahowawe na vintu vingi wawaambize nywie kisingi ambacho muhunguukiwa. Ivyo kuwe na kuigana. 15 Inga Maandiko ya Muungu yagombekavyo, "Ekuikae vintu vingi khekuwa na vyekutendesavyo na yuda ekuikae vintu vicheche khekuhungukiwa."

16 Namtogoa Muungu ekumwekhae Titu moyo wa kuwapatiiza nywie inga miye niwapatiizavyo. 17 Khio kuwa kazumiya viya tikundavyo, iya yee mwenye nee akakunda muno kuambiiza, ata akakunda yee mwenye kweza kwenu. 18 Tamuagiiya hamwe nae ndugu yetu atogolwae na mazumwezumwe yose ya wantu wose wamzumiiao Klistu kwa ndima yakwe ya kubiikia Mbui Yedi. 19 Naho mazumwezumwe ya wantu wamzumiiao Klistu yamsagua ndugu yetu uyo, ili awe hamwe na swie tegaaho wambiizi kwa wantu, ndima iyo yamtogoa zumbe naho yaonyesha tigosoado kia tidahado kuwaambiza watuhu.

20 Tatamba na ndugu uyo ili takunda tesekulaumiwa mwe mbui ya kugookea malavyo yalavigwayo kwa moyo wose. 21 Takunda kugosoa vyedi khio hemeso ya Muungu du, iya viyaviya hemeso ya wantu.

22 Hamwe na ndugu awo, timuagiiya ndugu yetu mtuhu tekumgeezae maa nyingi, tikamwoona kuwa akunda muno kuambiiza, naho isasa ana hovu muno kwaajii anawazumiia muno. 23 Titu ni mwezwangu, naho tagosoa ndima hamwe kwaajii yenu, akini mwe awo ndugu zetu watuhu wekwezao hamwe nawo, awo walawa mwe mazumwezumwe ya wantu wamzumiiao Klistu, ukuu uwe kwa Klistu. 24 Ivyo onyeshani ukundiso, ili mazumwezumwe matuhu ya wantu wamzumiiao Klistu, wagombeke kwei wana ukundiso na kugosoa ivyo, swie tevunia kwaajii yenu.