1 Swie tagosoa ndima hamwe na Muungu tawahembeeza mwesekuzumiiya uda wedi kulawa kwa Muungu wage bue. 2 Muungu agombeka ivi mwe Maandiko yakwe,

"Kisingi chekukundigwacho kikutegeeza

Mwe msi wa kuoholwa nikakuwambiiza."

Naho isasa nee kisingi chenye cha uohozi wa Muungu.

3 Isasa khatigosoa dodose ambado dendadiwagosoe watuhu kufa maya, ili kugosoa kwetu ndima kusekweza kugombekwa vifyaimi. 4 Iya mwe mbui zose taonyesha kuwa kwei ni wandima wa Muungu mwe kuzizimizi muno mwe masuumizo na mwe ukiwa na mwe suuba. 5 Titoigwa, tiikwa mwe nyumba ya kuvugaiwa wantu na kugewa soni hemeso ya wantu naho tigosoa ndima zitogazo tikasokea na tekaa kio kigima kwesiho kugona na kwesiho kuda. 6 Taonyesha kuwa ni wandima wa Muungu mwe uwedi wa moyo na umanyi na uzizimizi na wedi na kwa sia ya kuongoewa na Muye wa Muungu na kwa ukundiso wa kwei, 7 na kwa mbui ya kwei tiibikiayo na kwa udaho wa Muungu. Na kugosoa yada yamtamizayo Muungu nee kitoana chetu kumoso na kuume. 8 Titayali kutunywa na kubewa, mwe ntogoo fyaimi na ntogoo ntana. Tamamakhanywa kuwa wahokho, iya tagombeka kwei, 9 inga wantu wesaokumanyika, iya tamanyika kwa wantu wose, inga wantu wauyao na nyuma, iya inga mwonavyo isasa taendeea kuwa wagima hamwe na kusuumizwa, iya khatidagamizwa. 10 Etiho tisuumizwa khatekuuya na nyuma, etiho tina mbazi misi yose akini tina nyemi misi yose, etiho tiwakiwa iya tawatenda wantu wose kuwa wenye vintu vingi, taoneka inga wantu wesaokuwa na chochose, iya tina kia kintu.

11 Wandugu zangu Wakolinto titamwiiya na nywie pwii naho tawakundisa muno. 12 Swie khatikubada kuwakundisa nywie, iya nywie mbada kutikundisa swie. 13 Nagombeka nanywi inga wanangu, naho onyeshani ukundiso kwa mioyo yenu yose inga tekuwakundisavyo nywie.

14 Mwesekutongeana na wantu wesaokuzumiiya. Ivi wedi na makwasukwasu tambe vyaigana? Ung'azi na kiza vyadaha viivihi kwekaa hamwe? 15 Klistu na Mbanasi wadaha kwevana viivihi? Mwekuzumiiya aivana viivihi na mwesaekuzumiya? 16 Vyadahika viivihi Nyumba ya Muungu kuwa ya vizuu vya uhokho? Kwaviya swie ni Nyumba ya Muungu, ekuwae na ugima inga viya Muungu ekugombekavyo,

"Nendanigosoe wekazi wangu na wantu wangu,

Naho nendanekae nao,

Nendaniwe Muungu yao,

Naho wendawawe wantu wangu." 17 Neivyo Zumbe agombeka,

"Haukani mwao

Naho mkepange kulawa kwao,

Mwesekudonta kintu chesachokukundigwa mwe kumvika Muungu,

Na miye nendaniwazumie.

18 Nendaniwe Tati yenu,

Na nywie mwendamuwe wanangu wakigosi na wakivyee,

Ivi nee agombekavyo Zumbe mwenye udaho."