1 Nendanevune etiho khavikundigwa. Akini isasa nendanigombeke mbui nekuonyeshwazo na Zumbe na kunigubuiya. 2 Nammanya mntu yumwe ekumzumiiae Klistu, ambae myaka kumi dimwe na nne yekwembokayo nee kadoigwa kubua mbingu ya ntatu. Khimanya kuwa neyuuko kimwii hambu kwa muye, Muungu amanya. 3 Khimmanya mntu uyo nekawa kimwii hambu khio kimwii, akini Muungu mwenye nee amanyae, 4 Uko akategeeza mbui zesazokugombekeka ni mntu, mbui ambazo mntu khadaha kuzitamwiiya. 5 Mwe mbui za mntu inga uyo nendanevune, akini kwaajii yangu mwenye khinanevune iya kwa mbui zionyeshazo usokezi wangu. 6 Ata inga nee nikakunda kwevuna khinanitende mhezi, kwaviya nendanigombeke kwei. Akini khinanevune, khikunda mntu yoyose animamakhanye kuwa ni yedi muno kusima nionekanavyo mwe yada niyagosoayo na kugombeka.

7 Ili nesekwevuna kwaajii ya mbui inu khuu nekugubuiwayo, chekhigwa maomevu makai inga mwiwa mwe mwii wangu, mwagiiwa wa Shetani anisuumize, ili nesekwevuna. 8 Mwe mbui inu kimhembeeza Zumbe maa ntatu ause mwiwa unu. 9 Akini akagombeka, "Wedi wangu wakuiganiza, kwaviya udaho wangu uiganizwa muno mwe usokezi." Ivyo nevunia usokezi wangu ili udaho wa Klistu wekae umu mwangu.

10 Ivyo nazumia na kuwa na nyemi mwe usokezi wangu, na kubewa, na suuba, na nigosweewaho mafyaimi na kusuumizwa, kwaajii ya Klistu kwaviya niwaho kisokea, Klistu anigea nguvu.

11 Khitenda mhezi, akini nywie mnikunda nitende ivyo. Nywie nee mkakundigwa mnitunye, kwa vyovyose miye naoneka khio kintu kusima wowo "waagiiwa wa wakuu." 12 Kisingi niwaho kwenu nee niwa na uzizimizi na kugosoa vihii na ntangio ambavyo vyaonyesha kwei miye ni mwagiiwa wa kwei wa Muungu. 13 Khahana mbui yoyose nekuigosoayo kwa mazumwezumwe matuhu ya wantu wamzumiiao Klistu ambado khekugosoa kwenu, yadahika kiwakowee masa kwa kutokuwaombeza uwambiizi kwa vintu nivikundavyo, inga ido nee masa nawahembeeza mniekee.

14 Isasa ntayali kweza henu maa ya ntatu, na khinaniwekhe suuba. Kwaviya icho niondezacho khio mai yenu, iya nywie wenye. Misi yose wavyazi wawaikia wana wao vintu na khio wana kuwaikia wavyazi wao vintu. 15 Miye nakunda kulavya nekuwachonacho ata kwelavya miye mwenye ili niwaambize. Ivi mwendamnikundise hadodo ati kwaviya miye nawakundisa nywie?

16 Kwa vyovyose miye nchekuwakauwiya kwa dodose. Akini yadahika mtuhu endaagombeke nee kawapata kwa kuwatiiya.

17 Ivi khiwadoea kintu chochose kwa wantu wada nekuwaagiiao kwenu? 18 Miye khimuombeza Titu, nee namuagiiya henu na ndugu yetu mtuhu. Ivi, Titu nee kawadoea chochose kulawa henu? Ivi, khammanya kuwa miye na yeye ni kintu kimwe mwe ndima, naho khamuona kuwa ata ntendwa zetu zaigana?

19 Hambu mwamamakhanya kuwa adi isasa tiwa tavunia wenye hemeso yenu. Akini tagombeka mbui izi hemeso ya Muugu tikawa tiungana na Klistu. Mbui izo zose, wandugu zangu ni kwaajii ya kuwatintimaza nywie. 20 Naogoha, nendahoneze henu nendaniwambwiie mwekaisa inga mkundavyo nywie, ivyo khina niwe na nyemi, mbui iyo yendainitende nigosoe mbui mwesazokuzikunda. Naogoha nadaha kuwabwiiya mna khumbizi na kuwakonya wantu vintu na khondo na uhigani na kuwagombekea ya ufyaimi watuhu na kugombeka kwa kunung'una na kwevuna na khumbizi gatigati henu. 21 Naogoha aho nikeza ntambo yezayo Muungu wangu endaanitende nigewe soni hemeso henu, na miye nendanitoe bwaimbo kwaajii ya wangi wa wada wekugosoao mavigaviga akini khawekuhituka na kumbasa Muungu, akini wakaendeea na makwasukwasu na khwiina fyaimi na ukinga wekugosoao.