1 Miye Paolo mwagiiwa wa Yesu Klistu inga Muungu ekukundavyo, niaha hamwe na Timoseo.

Tawaandikia nywie bauwa zumwezumwe da wantu wamzumiao Klistu wa uko mzi wa Kolinto na wantu wa Muungu wose mwe kia hantu mwe mzi wa Akaya. 2 Taombeza kwa Muungu Tati yetu na Zumbe yetu Yesu Klistu awekhe wedi wakwe na uivanisi.

3 Atogolwe Muungu na Tate wa Zumbe yetu Yesu Klistu, Tate awafiiaye mbazi wantu, Muungu atiambizae. 4 Atiambiza mwe suuba zetu zose, ili na swie tidahe kuwaambiza watuhu mwe masuumizo yao inga viya Muungu ekutuambizavyo swie. 5 Inga viya tipatavyo masuumizo mangi kwaajii ya Klistu, viyaviya Muungu atendesa kutiambiiza kwembokea Klistu. 6 Ikawa tasuumizwa, tasuumizwa kwaajii ya kuwaambiza ninywi na kuoholwa kwenu. Tikagewa moyo ni kwaajii ya kuwagea moyo nywie ili mdahe kuzizimiza masuumizo yadayada tusumizwayo. 7 Makauwiyo tekuwayo nayo kwaajii yenu yatoga kwaviya tamanya kuwa masuumizo myapatayo ni yadayada tiyapatayo swie, inga Muungu ekutuambizavyo swie, viyaviya endaawaambize nywie.

8 Wandugu zetu takunda mmanye masuumizo tekupatayo kuda mwe mzi wa Asia. Masuumizo neyawa makuu nee taona khatidaha kuzizimiza, ata tikamamakhanya tendatiuye na nyuma. 9 Netiwa inga wantu wekuamuiwao kuuya na nyuma, akini yaawiiya ili timkauwiye Muungu ayuyusae wantu kwesiho kukauwiya nguvu zetu. 10 Akini Muungu katihonya hada tekuwaho hehi na kuuya na nyuma, naho aendeea kutihonya, swie tiika kauwiyo kuwa endaatihonye vituhu. 11 Nywie mwendeeavyo kutiambiza mwe maombezi. Muungu endaatambaise maombezi ya wantu wangi wativikiao na endaatijaiye. Wantu wangi wendawamtogoe Muungu kwaajii ya wedi wakwe kwetu.

12 Nyemi yetu ni inu, mioyo yetu yationyesha tekukaavyo mwe inusi inu, asa gatigati yenu, tekaa kwa uhovu na wedi kwa kia mntu inga Muungu ekutuambizavyo, Khatikugosoa ivyo kwa umanyi wetu iya kwa wedi wa Muungu. 13 Tawaandikia nywie mbui mdahazo kuzisoma na kuzimanya, nakauwiya kuwa mwendammanye vitana muno. 14 Kwaviya adi isasa mweniva hadodo du. Tamanya kuwa mwe msi endahoeze Zumbe Yesu, mwendamwetogoe kwaajii yetu inga swie twetegoavyo kwaajii yenu.

15 Kwaviya neniwa na makauwiyo ya mbui izi, aho bosi nee nikakunda kweza kwenu ili mdahe kwekhigwa majaiwa maa mbii. 16 Kwaviya khitamiwa kweza kwenu nikawa mwe ntambo ya kuita Makedonia na mwe kisingi cha kuuya, ili nidahe kwekhigwa wambiizi mwe ntambo yangu ya kuita Yudea. 17 Nekupangaho mbui inu tambe nee khiwa na khanga nikude khanga nikueke? Tambe nagosoa mbui zangu kwa mamakhanyi za kiuntu na kugombeka, "Eeeh, eeh, na bue, bue"! 18 Muungu ni mkwei, yada tekuwagombekacho nywie khayokuwa ya kugombeka "Eeh" na "Bue" kisingi kimwe. 19 Kwaviya Yesu Klistu Mwana wa Muungu, uyo ambae miye Silawano na Timoseo timbiikia kwenu, Yesu khekuwa mntu wa "Eeh" na "Bue", akini Yesu ni wa "Eeh" misi yose. 20 Kwaviya viaga vyose ekugombekavyo Muungu viwa "Eeh" kwaajii iyo tagombeka "Pepa" kwa sia ya Klistu kwaajii ya kumtunya Muungu. 21 Muungu mwenye atitendae swie na nywie kutintimaa, mwe kuwa kintu kimwe na Klistu, naho nee atisaguaye. 22 Yee nee mwekutigea tangio ya kutenda wantu wakwe, naho akatekha muye wakwe mwe mioyo yetu, kwa kuonyesha kuwa ni kwei, mbui zose ambazo katiikia.

23 Akini Muungu nee mvuhuzi wangu, yee aumanya moyo wangu! Naho nchekweza vituhu Kolinto kwaajii du ya kuwaonea mbazi. 24 Khatikunda kuwashuutiza kintu chani cha kuzumiiya, kwaviya tamanya nywie mtintimaa mwe uzumizi wenu, akini tagosoa ndima hamwe na nywie kwaajii ya nyemi yenu.