1 Mwe yada mwekuniandikiayo mwe mbui ya changizo kwaajii ya wantu wa Muungu wekuwao mwe mzi wa Yelusalemu, gosoani inga nekuwaagiavyo mazumwezumwe ya wantu wekumzumiao Klistu kuda Galatia. 2 Mwe kia jumapili kia yumwe yenu akundigwa kuika kima cha hea mwe hea ziya mpatazo, ili kwesekuwa na changizo aho nikeza. 3 Kisingi nendahoneze kwenu nenda niwaagiie na bauwa wada mwendao muwasaguwe kulawa kwenu ili wegae changizo zenu mwe mzi wa Yelusalemu. 4 Inga ikakundigwa miye niite na nywie nendaniite hamwe na nywie.

5 Nikalawa mwe mzi wa Makedonia nendaneze kwenu kwaviya nakunda kwembokea Makedonia. 6 Akini nikeza nadaha kwekaa nanywi kisingi chose cha pheho, ili mnambize kuendeea na ntambo yangu hohose nikundaho kuita. 7 Nakunda kwekaa na nywie kwa kisingi kilehacho, khio kwemboka du. Nakauwia kwekaa kwenu kwa kisingi, inga Zumbe akakunda.

8 Akini isasa nendanisigae aha mwe mzi wa Efeso adi mwe msi wa Pentekoste. 9 Nagosoa ivyo kwaajii Muungu kanekha phasi ntana kugosoa ndima khuu mwe mzi unu, akini waaho wamasa wangi wahiganao na miye.

10 Timoseo akeza kwenu mumhokee vitana ili asekuwa na maatu, kwaajii nae agosoa ndima ya Zumbe inga miye. 11 Mntu yoyose asekumbea, iya mwambizeni mwe ntambo zakwe kwa uivanisi ili eze kwangu, kwaviya miye na wazumiizi wezwangu tamgoja.

12 Khimuembeeza muno ndugu yetu Apolo eze kwenu hamwe na wandugu watuhu, etiho nekawa khakunda katu kweza isasa, akini endaeze aho endahoapate phasi.

13 Ekauweni, gookani vitana mwe uzumizi wenu, muwe watintimavu na wenye nguvu. 14 Mbui zenu zose gosoani mwe ukundiso.

15 Mwamanya kuwa Sitefano hamwe na wantu wa kaya yakwe, nee ni wantu wa bosi mwe kumzumia Yesu Klistu uko mwe si ya Akaya, naho wakelavya wowo wenye kuwaambiza wantu wamzumiao Klistu. Ivyo nawahembeza muno, 16 muwategeeze muno wantu inga awo na watuhu wagosoao ndima hamwe nao.

17 Nina nyemi muno kwa kubua kwakwe Sitefana na Fotunatusi hamwe na Akaiko, wowo wanekha yada nekuhungukiwayo kwaajii ya nywie kutokuwepo aha 18 Wautamiza moyo wangu na mioyo yenu, wantu inga awo ni wakutunywa.

19 Wantu wamzumiao Klistu wa uko si ya Asia wawaugusa. Akila na mkaziwe Pilisila hamwe na wantu wose wa Muungu ambao wakintana mwe kaya yao wawaugusa muno mwe zina da Zumbe. 20 Wandugu wose wawaugusa. Nanywi ugusaneni kwa ntangio ya ukundiso wa Yesu Klistu.

21 Mie Paolo khiandika kwa mkono wangu mwenye bauwa inu nawaugusa. 22 Yoyose mwesaekumkunda Zumbe na abadiwe lazi! Malanasa mana yakwe, weze wee Zumbe yetu!

23 Namwombeza Zumbe yetu Yesu awekhe wedi wakwe. 24 Nawakundisa nywie nyose mumzumiyae Yesu Klistu.