1 Wandugu zangu nakunda mmanye vitana mwe funge mwekwekhigwazo ni Muungu. 2 Mwamanya kuwa kisingi mwekuwaho khamummanya Muungu, nee mwazwa na kuongoewa kuvika vizuu vyesavyokugombeka. 3 Ivyo nawamba kuwa mntu yoyose aongoewae na Muye wa Muungu khadaha kugombeka, "Yesu abadiwe lazi!" Naho mntu yoyose esaekuongoewa na Muye wa Muungu khadaha kugombeka, "Yesu ni Zumbe."

4 Ziaho mbai nyingi za funge, akini Muye ni yudayuda wa Muungu awekhae wantu funge izo. 5 Akini kuna sia nyingi za kumgosoeya ndima Zumbe akini Zumbe agosoewae ndima ni yumwe. 6 Kuna sia mbaimbai za kugosoa ndima, akini Muungu ni yumwe adahizae kia yumwe kugosoa ndima izo. 7 Muye amuambiza kia mntu kugosoa ndima yakwe, ili wantu watuhu wekhigwe uwambizi. 8 Muye wa Muungu amwekha mntu funge ya mbui ya umanyi na amwekha mntu mtuhu mbui ya akii inga akundavyo Muye uyouyo. 9 Muye wa Muungu uyouyo amwekha mntu yumwe funge ya uzumizi mkuu na mntu mtuhu ekhigwa funge ya kuhonya wantu. 10 Mtuhu khekigwa funge ya kugosoa vihii na mtuhu khekigwa funge ya kulavya mbui za uwoni kulawa kwa Muungu, na mtuhu khekigwa funge ya kumanya Muye wekulawao kwa Muungu na muye wesaokulawa kwa Muungu, na mtuhu ekhigwa funge ya kutamwiiya vitamwiio mbaimbai na mntu mtuhu ekhigwa funge ya kulavya mana ya kia chekutamwiwacho. 11 Ndima izi zose agosoa Muye wa Muungu uyouyo, amwekha kia mntu inga akundavyo yee.

12 Mwii wa mntu una vimamo vingi, akini vimamo ivyo vyose vyagosoa mwii umwe, nee yeivyo kwa mwii wa Klistu. 13 Kwaivyo ikawa swie ni Wayahudi hambu wantu wesaokuwa Wayahudi, watumwa hambu khio watumwa, wose tibatizwa kwa Muye wa Muungu yumwe na kumhokea Muye yumwe ili tiwe mwii umwe.

14 Kwaviya mwii khio kimamo kimwe du, iya una vimamo vingi. 15 Inga muundi ukagombeka, "Kwaviya miye khio mkono, ivyo miye khio kimamo cha mwii," kwajii iyo khaitenda mkono wesekua kimamo cha mwii. 16 Naho inga gutwi dikagombeka, "Kwaviya miye khio ziso, ivyo miye khio kimamo cha mwii," kwajii iyo khaditenda gutwi desekuwa kimamo cha mwii. 17 Inga mwii wose nee uwa ziso, nee iwa viivihi kutegeeza? Naho mwii wose neuwa gutwi, nee iwa viivihi kunusa? 18 Akini Muungu kaika vimamo vyose mwe mwii inga ekukundavyo yee mwenye. 19 Inga vimamo vyose neviwa kimamo kimwe, mwii neuwa hahi? 20 Ukwei ni kuwa, kuna vimamo vingi, akini mwii ni umwe.

21 Ziso khadidaha kuugombeka mkono, "Khikukunda." Naho mtwi khaudaha kuigombekea miundi, "Khiwakunda." 22 Ukwei ni kuwa vimamo vionekanavyo vinyonge nee vikundigwavyo muno. 23 Naho vimamo viya timamakhanyavyo ni vya kubewa nee tivitunyavyo, naho vimamo viya timamakhanyavyo vyaeta soni, ivyo nee tivifisavyo muno, 24 kisingi vimamo ambavyo khavieta soni, khavikundigwa kugubikwa inga vituhu, akini Muungu mwenye kaupanga mwii vitana, vimamo vibewavyo kavitenda vitunywe. 25 Ili kwesekuwa na kwepangana mwe mwii, akini vimamo vyose viambiizane. 26 Inga kimamo kimwe kikahuma, vimamo vyose vyahuma hamwe na icho, kimamo kimwe kikatogolwa, vimamo vyose vyawa na nyemi hamwe na icho.

27 Nywinywi nyose ni mwii wa Klistu naho kia yumwe ni kimamo cha mwii uwo. 28 Mwe zumwezumwe da wantu wamzumiao Klistu, Muungu kaika, bosi wagiiwa, kaidi waoni, na ntatu wahinyi, naho akaika wada wenye udaho wa kugosoa vihii, na wada wenye udaho wa kuhonya na kuambiiza watuhu na waongweezi na wada watamwiiyao vitamwiwavyo vihya. 29 Wantu wose khio wagiiwa, na wantu wose khio waoni, na wantu wose khio wahinyi na wantu wose khawana udaho wa kugosoa vihii, 30 khio wantu wose wenye udaho wakuhonya, na khio wantu wose watamwiiao vitamwiio vihya na khio wantu wose wenye udaho wakulavya mana ya kia chekutamwiwacho. 31 Mgosoe kia mdahado kuondeza funge khuu.

Mie nendaniwaonyeshe sia yedi muno kusima zose.