1 Inga mntu yeyose wa kwenu anakhumbizi na mwezie, adaha viivihi kwegaa kwa wantu wesaokummanya Muungu, ili kuwaamwiiya na kueka kwegaa kwa wantu wakwe Muungu? 2 Khammanya kuwa wantu wa Muungu, wendawawaamuie wantu wa mwe inusi? Ikawa inga nywie wantu muamzumiiao Muungu mwendamuamuie wantu wa inusi, kwambwai mwavotwa kuamuiiya mbui ndodondodo? 3 Khammanya kuwa tendatiwaamuie wandima wa uwanga kwa Muungu? Inga ni ivyo mwakundigwa kubinda mbui ndodondodo za wekaisi wetu. 4 Ivi kwambwai mkawa na khumbizi zenu mwazegaa kwa wantu ambao khachu zao khazikundigwa na zumwezumwe da wantu wamzumiao Klistu? 5 Nagombeka ivi ili muone soni, ivi khahana ata yumwe gatigati yenu mwenye umanyi wa kudaha kuamua khumbizi gatigati yenu mwe wantu wamzumiao Klistu? 6 Akini ninywi muwa na mazweeya ya mntu kumkoea masa mzumizi mweziwe he mkonga wa wantu wesaokumzumiiya Klistu.

7 Ukwei ni kuwa, kukoeana masa wenye kwa wenye kwaonyesha mvotwa muno! Kwa mbwahi mwesekuzumia kugosoewa mafyaimi hambu kuhokwa vintu mwekuavyo navyo? 8 Akini nywie wenye mwawagosoea wantu mafyaimi na kuwahoka vintu wekuwavyo navyo, naho ayo mwawagosoea ata wada wazumizi wezwenu. 9 Hambu khammanya kuwa wantu wafyaimi khawana wengie mwe Useuta wa Muungu? Mwesekwetiiwa! Wakianga, na wavikao vizuu na wagosi wagonanao na wagosi wezwao, 10 wabavi, na wenye khwiina fyaimi, na wakozi na wada wawagombekeao mafyaimi wezwao, na wahokaji, awo wose khawanawengie mwe Useuta wa Muungu. 11 Wamwe wenu nemuwa inga awo. Akini isasa msuntwa kulawa mwe mavigaviga yenu, mtendwa kuwa wantu wakwe Muungu na kutendwa wedi he meso ya Muungu kwa zina da Zumbe Yesu Klistu na Muye wa Muungu yetu.

12 Mntu adaha kugombeka, "Nchekuemezwa kintu chochose." Ni kwei akini khio kia kintu chafaa. Ata inga mtuhu agombeka, "Nchekuemezwa kugosoa kintu chochose." Akini miye khinaniongoewe na kintu chochose. 13 Wamwe gatigati yenu wagombeka, "Khande iikwa kwaajii ya ifu, na ifu ni kwaajii ya khande." Ni kwei, akini Muungu endaabanange vyose viidi. Mwii khaukuikwa kwaajii ya ukianga, akini uikwa kwaajii ya kumgosoea ndima Zumbe, nae Zumbe nee aikauwae mii yetu. 14 Ivyo, Muungu endaatiyuyuse swie kwa udaho wakwe inga ekumyuyusavyo Zumbe.

15 Ivi khammanya mii yenu ni vimamo vya mwii wa Klistu? Ivi mwamamakhanya kuwa nadaha kudoa vimamo vya Klistu na kuviika hamwe na mwii wa dikwakwa? Khavidahika! 16 Ivi khammanya kuwa mntu agonae na dikwakwa endaawe mwii umwe nae? Inga viya vyekuandikwavyo, "Waidi awo wendawawe mwii umwe." 17 Akini mwekuwa kintu kimwe na Zumbe, endaawe muye umwe nae.

18 Ivyo mwesekugosoa ukianga. Mavigaviga yoyose matuhu yagosolwa chongoi ya mwii akini mkianga ugosoa ukianga mwe mwii wakwe mwenye. 19 Ivi khammanya kuwa mii yenu ni Nyumba ya Muye wa Muungu wekaao umo mwenu, yuda mwekwekhigwae ni Muungu? Isasa mii yenu khio yenu iya ni mai ya Muungu. 20 Kwaviya Muungu nekawagua kwa yombe khuu, itumieni mii yenu kwaajii ya kumtogoa Muungu.