1 Gosoani kia mdahado muwe na ukundiso, na viyaviya gosoani kia mdahado kukunda kwekhigwa funge za Muye wa Muungu, muno funge ya kubiikia Mbui ya Muungu. 2 Yuda wa kugombeka vitamwiwavyo vihya, khagombeka na wantu iya agombeka na Muungu. Yee agombeka mbui zekufiswazo kwa udaho wa Muye wa Muungu. 3 Akini wada wenye udaho wa kubiikia Mbui ya Muungu, wagombeka na wantu kwaajii ya kuwaambiiza mwe uzumiizi, na kuwagea moyo na kuwekha nyemi waaho na suuba. 4 Yuda agombekae vitamwiwavyo vihya, etintimaza mwenye, akini abiikiae Mbui ya Muungu atintimaza zumwezumwe da wantu wamzumiao Klistu.

5 Nakunda nywie nyose mgombeke kwa vitamwiwavyo vihya, akini nakundisa muno muwe wabiikia Mbui ya Muungu. Kwaviya mntu abiikiae Mbui ya Muungu ni yedi muno kusima agombekae vitamwiwavyo vihya, akini mntu akagombeka kwa kitamwiwacho kihya agombeke mana yakwe ili adiambiize zumwezumwe da wantu wamzumiao Klistu watintimae mwe uzumiizi. 6 Ivyo wandugu zangu inga nikeza kwenu na kugombeka na nywie kwa kitamwiwacho kihya, yendaiwaambize mbwai? Khainaiwambize chochose, akini nikagombeka yada ekunigubuiyayo Muungu ili myamanye na kuwahinya Mbui ya Muungu aho nekhiwa kiwaambiiza.

7 Nee vyeivyo kwa vintu vyesavyo ugima, vilavyaho mgutio inga viya fiimbi na zeze. Ivi mntu adaha viivihi kumanya wiya uhi utoigwao inga viya ivyo khaviavya mgutio ukundigwao? 8 Na inga gunda dikatoigwa na kulavya mgutio wakwe wesaokumanyika ni wantu, ni ndai endaeeike tayali kwa khondo? 9 Viyaviya na nywie inga mwagombeka mbui zesazokwevana, ni yuhi adaha kumanya mgombekacho? Mbui yenu yendayage bue. 10 Mwe inusi viko vitamwiwavyo vingi, akini khahana ata mwenga yesayokuwa na mana. 11 Akini ikawa khimanya mana ya mbui agombekayo mntu, miye ni mgeni mwa mntu uyo, nae ni mgeni kwangu. 12 Kwaajii mwakunda muno kuwa na funge za Muye wa Muungu, gosoani kia mdahado mwekhigwe funge zendazoziwaambiize wantu kuwatintimaza mwe uzumiizi.

13 Mntu akagombeka kwa kitamwiwacho kihya akundigwa aombeze kwa Muungu ekhigwe udaho wa kuwasosoea wantu mwe kia ekugombekacho. 14 Kwaviya nikaombeza kwa kitamwiwacho kihya, muye wangu nee uombezaho, akini kisingi icho mamakhanyi zangu khazigosoa chochose. 15 Isasa nakundigwa kugosoa mbwai? Nendaniombeze kwa kitamwiwacho kihya mwe muye wangu, naho nendaniombeze kwa mamakhanyi zangu, nendanikeme wiya kwa kitamwiwacho kihya naho nendanikeme wiya kwa mamakhanyi zangu. 16 Ukamtogoa Muungu kwa muye wako du, mntu mtuhu ambae yuaho mwe bunga na khazati kudaaha mwe uzumizi adaha viivihi kwetikia, "Pepa" kwa kumtogoa kwako, ikawa khamanya ugombekacho? 17 Ata inga kumtogoa Muungu kwadaha kuwa kwedi muno kwako, akini uyo mntu mtuhu khaimwambiza kutintimaa mwe uzumiizi.

18 Namtogoa Muungu kuwa miye nagombeka kwa kitamwiwacho kihya kusima nywie nyose. 19 Akini mwe zumwezumwe da wamzumiao Klistu nakundisa muno kugombeka mbui shano zimanyikanazo ili niwahinye watuhu kusima kugombeka mbui magana kumi ambazo khazimanyika.

20 Wandugu zangu, mwesekumamakhanya inga wana iya mmamakhanye inga wantu wagima, akini mwe mbui ya mavigaviga mtende inga wana wateke. 21 Mwe Maandiko ya Muungu,

"Zumbe agombeka, nendanigombeke na wantu awa

Kwembokea miomo ya wantu wa ahe

Wagombekao vitamwiwavyo vihya

Akini ata ivyo khawanawanitegeeze."

22 Naho udaho wa kugombeka kitamwiwacho kihya ni ntangio, khio kwaajii ya wantu wazumiiao, akini ni kwaajii ya wada wesaokuzumiiya, akini udaho wa kubiikia mbui ya Muungu ni kwaajii ya wada wazumiiao na khio kwa wada wesaokuzumiiya.

23 Ivyo zumwezumwe dose da wamzumiiao Klistu dikintanaho hamwe kumvikia Muungu, naho wose wakavoka kutamwiiya vitamwiwavyo vihya, inga wakeza wantu wa mazweeya hambu wesaokuzumiiya, ivi khawanawagombeke kuwa ni wakiyau? 24 Akini wose wakabiikia mbui ya Muungu, naho akeza mntu mtuhu mwesaekumanya na mwesaekuzumiya, yose endayoayategeeze kulawa kwa wose yendayamtende amanye ufyaimi wakwe mwenye na kumtenda ahituke na kubada mavigaviga. 25 Mbui zekufiswazo mwe moyo wakwe zendazimanyike pwii, naho endaakinte mavindi na kumvikia Muungu akagombeka, "Kwei Muungu yuaho hamwe na nywie."

26 Wandugu zangu tigombeke mbwai? Mkintanaho hamwe kwa kumvikia Muungu, yumwe akema wiya, na mtuhu ahinya, na mtuhu agombeka mbui kulawa kwa Muungu na mtuhu agombeka kwa kitamwiwacho kihya na mtuhu asosoa yada yagombekwayo, ayo yose yagosoke kwaajii ya kumtenda kia yumwe yenu atintimae mwe uzumiizi. 27 Inga wakawa aho wantu wakutamwiiya vitamwiwavyo vihya, watamwiie waidi hambu watatu, khio kusima awo, naho watamwiie yumweyumwe, na yakundigwa aweaho mtuhu wakusosoa yada yagombekwayo. 28 Akini inga khahana yoyose adahae kusosoa yada yagombekwayo basi yuda agombekae kwa kitamwiwacho kihya anyamae mwe zumwezumwe da wantu wamzumiae Klistu, iya agombeke yee mwenye na Muungu. 29 Mwe wada wenye udaho wa kugombeka Mbui ya Muungu, wagombeke waidi hambu watatu na watuhu wahime yada yagombekwayo. 30 Akini ikawa mntu yumwe agombekaho na mtuhu wa wategeezao ahokea ugubuo kulawa kwa Muungu, iya yuda agombekae akundigwa anyamae. 31 Nyose mwadaha kubiikia mbui ya Muungu yumweyumwe, ili kia yumwe ahinye na kugewa moyo. 32 Udaho wa kubiikia mbui ya Muungu wakundigwa uongowee na mwenye udaho uwo. 33 Kwaviya Muungu yetu khio Muungu wa khumbizi, iya ni Muungu wa uivanisi.

Inga yeivyo mwe mazumwezumwe yose ya wantu wa Muungu. 34 Kisingi mkintanaho he kuvika wavyee wakundigwa wanyamae, khawakundigwa kugombeka iya wawe wategeezaji inga igombekavyo mwe miko ya Msa. 35 Ikawa wakunda wauze mbui, wawauze wagosi wao mwe kaya zao, ni mbui ya kugea soni kwa mvyee kugombeka mwe zumwezumwe da wantu wamzumiao Klistu.

36 Ivi mwamamakhanya Mbui ya Muungu yalawa kwenu nywie, hambu yeza kwaajii yenu ikedu? 37 Ikawa mntu akeona kuwa ni muoni wa Muungu hambu ana udaho wa Muye wa Muungu, akundigwa amanye aya nekuandikayo ni mwiko kulawa kwa Zumbe. 38 Akini ikawa mntu abea mbui izo, viyaviya yee abewe.

39 Ivyo wandugu zangu mwakundigwa kuwa na khwiina ya kugombeka Mbui ya Muungu, akini mwesekumuemeza mntu kugombeka kwa kitamwiwacho kihya. 40 Akini mbui zose zigosoke vitana inga viya vikundigwavyo.