1 Wandugu zangu nakunda mkumbuke yada yekulawiayo kwa wadaa wetu wada wekuongoewao ni Msa. Wose newawa waindwa mwe dia zunde naho wakemboka mwe mazimshindo ya Shamu. 2 Wekuongoewao na zunde na kwemboka gatigati ya mazimshindo wose wakawa wabatiizwa na kuwa wantu wa Msa. 3 Wose nee wada khande idaida yekulawayo kwa Muungu. 4 Wose wadomea mazi yekulawayo kwa Muungu. Wadomea kulawa mwe iwe dia kuu dekulawado kwa Muungu dekuwabasado, naho iwe ido nediwa ni Klistu mwenye. 5 Akini hamwe na ayo, wangi wao wakagosoa mbui zesazokumtamiza Muungu, kwaajii iyo wakadagamizwa na vimba vyao nee visambazika he kiwawe.

6 Mbui izo ni msimo kwetu, yatihaza tesekugosoa ufyaimi inga wekugosoavyo wowo. 7 Msekuvikia vizuu, inga viya wamwe wao wekutendavyo. Inga viya Maandiko ya Muungu yambavyo, "Wantu wekaa asi nee wadomea na kuda, wakagooka na kuvina vifyaimi" 8 Tesekugosoa ukianga inga wamwe wao wekugosoavyo, wakauya na nyuma wantu elufu ishilini na ntatu mwe msi umwe. 9 Tesekumgeeza Zumbe inga watuhu wao wekumgeezavyo, wakauya na nyuma kwa kuumwa na nyoka. 10 Naho mwesekusiniinika inga wamwe wao wekutendavyo, ivyo wakakomwa na mndima wa uwanga kwa Muungu adagamizae.

11 Yose aya nee yawapata wowo na yaandikwa ili yawe msimo kutihaza swie, mana swie tekaa hehi na kisingi cha kisiikizi.

12 Wada wamamakhanyao kuwa wagooka kwa untintimavu mwe uzumizi wekauwe wasekugwa. 13 Mageezo yawambwiiyayo nywie ni yadayada yawambwiyayo wantu watuhu, akini Muungu ni wa kuzumiwa khanaaeke mgeezwe kusima udaho wenu, akini mkageezwa endaawaonyeshe sia ya kuawiia ili mdahe kuzizimiza.

14 Ivyo, wandugu zangu niwakundisao, ekani kuvika vizuu. 15 Nagombeka na nywie wantu wenye umanyi, emamaakhanyani nywie wenye kwa yada nigombekayo. 16 Timtogoaho Muungu kwa kudomea kiya kikombe cha majaiwa, ivi khatishiiki phome ya Klistu? Tidaho bumunda, ivi khatishiiki mwii wa Klistu? 17 Kwaviya bumunda ni dimwe, na swie tekuwao wangi ni mwii umwe na swie tahokea hantu ha bumunda dimwe.

18 Kauwani wantu wa Isilaeli, wose wekudao chekulavigwao ntambiko wawa kintu kimwe na ingo ido. 19 Ivi nina mana kuwa ntambiko ilavigwayo kwa kizuu hambu kizuu chenye ni kintu chenye mana yani? 20 Khivyo, ntambiko walavyao wantu wesaokummanya Muungu wawalaviya mazaiko, naho khawekumlaviya Muungu. Na miye khikunda muwe hamwe na mazaiko. 21 Khamkundigwa kudomea kikombe cha Zumbe na kikombe cha mazaiko, naho khamkundigwa kuda khande ya Zumbe na kuda khande ya mazaiko. 22 Ivi takunda timkime Zumbe? Ivi swie tina nguvu kusima yee?

23 Wantu watuhu gatigati yenu wagombeka vintu vyose viekewa, akini khio vintu vyose vyaambiza, akini miye nagombeka etiho vintu vyose viekewa akini khio vintu vyose vyawaambiza kutintimaza uzumizi. 24 Mntu asekupatiiza mbui zakwe mwenye, iya apatiize na mbui za watuhu.

25 Daani chochose kia kitagwacho mwe gwiiyo, mwesekuuzauza ili wesekwesuumiza mwe moyo wako. 26 Kwaviya Maandiko ya Muungu yamba, "Inusi na vintu vyose vyeumo ni vya Zumbe."

27 Ikawa mntu khamzumiia Klistu, akawagoneka mwe khande iyo na mkazumia kuita, daani chochose chekuikwacho kwesiho kuuzauza ili wesekweea masa mwe moyo wako. 28 Akini mntu akagombeka, "Khande iyo ilavigwa ntambiko kwa vizuu," msekuda khande iyo, kwaajii ya mntu uyo ekuwagombekae asekwesuumiza mwe moyo wakwe, na nywie msekwesuumiza mwe mioyo yenu, 29 nagombeka aya khio kwaajii ya kwesuumiza mwe mamakhanyi zenu, iya ni kwaajii ya kwesuumiza kwa yuda ekuwagombekae.

Mwendamniuze, "Kwambwai kwesuumiza kwa mntu mtuhu kweamuia miye kintu cha kugosoa? Mie nadaha kugosoa nikundacho." 30 Ikawa nada khande iyo kwa kumtogoa Muungu, kwambwai nidumulwe kwaajii ya kuda khande iyo ambayo namtogoa Muungu?

31 Vyedi, chochose mgosoacho ikawa wada hambu wadomea, yagosoe yose kwa kumtamiza Muungu. 32 Wesekugosoa mbui yoyose yendayoiwatende wantu watuhu kugosoa ya ufyaimi wawe Wayahudi hambu wantu wesaokuwa Wayahudi hambu kwa zumwezumwe da wantu wamzumiao Muungu. 33 Gosoani inga viya nigosoavyo. Nageeza kuwatamiza wose kwa kia sia, kwesiho kuondeza miyengizo yangu mwenye iya miyengizo wantu wangi ili wadahe kuoholwa.