1 Kuna mbui za kuzumiiwa kuwa kuna ukianga mwe wamwe wenu, naho ni ukianga ambao khauzati kulawiiya, ata kwa wantu wesaokummanya Muungu, nchembigwa ati yumwe yenu agona na mkaza tati yakwe! 2 Mwadaha viivihi kwevuna mwe mbui iyo? Nee iwa vyedi kutoa bwaimbo, na mntu uyo mwekugosoa mbui iyo akundigwa auswe mwe zumwezumwe denu. 3 Etiho miye ni hae na nywie iya moyo wangu uhamwe na nywie, na kibinda kae kumuamwiia mntu uyo inga viya ni hamwe nanywi. 4 Kisingi mkintanaho, kwa kuvika Zumbe yetu Yesu, na moyo wangu uhamwe nanywi, na viyaviya udaho wa Zumbe wetu Yesu Klistu wawa hamwe nanywi, 5 mlavyeni mntu uyo kwa Shetani ili mwii wakwe usuumizwe, akini muye wakwe udahe kuoholwa mwe msi wa kuuya kwa Zumbe.

6 Kwevuna kwenu khio kutana! Ivi khammanya hamila kidodo yaumua unga wose wekukandwao? 7 Ivyo esunteni kwa kumuusa mntu uyo mfyaimi gatigati yenu, kugosoa ivyo nsawa na kuusa hamila ya kae. Aho mwendamuwe wantu wahya inga unga mhya wekukandwao kwesiho hamila, ivyo nee mweivyo nywie. Kwaviya Muungu nee kamlavya Klistu kuwa ntambiko inga mwanangoto wa pasaka ili atiohoe. 8 Ivyo tesekugosoa sikukhuu ya pasaka kwa hamila ya kae, ambayo ni ufyaimi na mavigaviga, iya tiigosoe kwa bumunda desadokugewa hamila, ambaho ni moyo wekung'aao na wakwei.

9 Nee khiwaandikia mwe bauwa kuwa mwekae hae na wakianga. 10 Akini nchekuwa na mana msekushiikiana nao wantu wa inusi inu, ama khivyo nee iwakunda kusama mwe inusi inu ili mdahe kwekaa hae na wantu wakianga, na wameo, na wahokho, na wavikiao vizuu. 11 Akini isasa nawaandikia kuwa mwesekuwa hamwe na mntu yoyose agombekae amzumiiya Klistu inga nywie, uku akawa ni mkianga, na mbwa, na mvika vizuu na msongeezi na mkozi na mhokaji. Mntu inga uyo mwesekuda nae.

12 Ivi ni ndima yangu kuwaamuia wantu wesaokumzumia Klistu? Awo Muungu nee awaamuiae. Ivi nywie khamkundigwa kuwaamuia wada wekuwao gatigati yenu wenye? 13 Akini wada wesaokumzumia Klistu, Muungu endaawaamuie inga viya yekuandikwavyo, "Mguuseni mntu mfyaimi kwenu."