1 Nadaha kuwa na udaho wa kugombeka vitamwiiyo mbaimbai vya wantu na ata za wandima wa uwanga kwa Muungu, akini inga khina ukundiso miye ni inga mgutio wa khengee na upatu. 2 Viyaviya nekiwa na udaho wa kutegeeza na kugombeka mbui kulawa kwa Muungu, viyaviya inga nekiwa na udaho wa kumanya sii zose za Muungu na kumanya mbui zose, naho nekiwa na uzumizi mkuu wa kusamiza miima, akini inga khina ukundiso, miye khio kintu chochose. 3 Ata nikawekha wakiwa vintu vyose nekuwavyo navyo na kuulavya mwii wangu wokwe, akini inga khina ukundiso khainifaa kintu chochose.

4 Mwenye ukundiso uzizimiza naho ambiiza watuhu, mwenye ukundiso khana kinyuu, khevuna na wala khana kibui. 5 Mwenye ukundiso awatunya watuhu na khamamakhanya mbui zakwe du, naho khana maya ya kinyio na khakumbuka ekugosoewayo ni wantu. 6 Mwenye ukundiso khana nyemi na mbui fyaimi iya awa na nyemi mwe mbui za kwei. 7 Mwenye ukundiso khafa maya, misi yose azumiiya na aendeea kukauwia misi yose na khabada kuzizimiza katu.

8 Mntu mwenye ukundiso misi yose uendeeya kukundisa, akini funge ntuhu zina kisiikizi inga viya udaho wa kutegeeza na kugombeka mbui kulawa kwa Muungu na udaho wa kutamwiiya vitamwiiyo vihya na udaho wa umanyi vyose vyendavibue kisiikizi. 9 Kwaviya isasa tamanya mbui ncheche, naho tadaha kubiikia mbui ncheche tizimanyazo kulawa kwa Muungu. 10 Akini uiganizi wendahoweze, yada yose yesayokuigania yendayage.

11 Nekuwaho mwana nee nikagombeka inga mwana, na nee nina umanyi inga mwana, na nee namamakhanya inga mwana, akini kwaajii khiwa mntu mgima yada nekuyagosoayo nekuwaho mwana khibada. 12 Tionacho isasa ni inga tekauwavyo mwe sufuiya mhya, akini kisingi chezacho tendatione pwii, kisingi iki namanya kidodo, akini kisingi chezacho nendanimanye yose kwa kuigania inga viya Muungu animanyavyo miye.

13 Isasa aya matatu yendayaeendee kuwaaho, uzumizi na kauwio na ukundiso, akini mwe aya kuu kusima yose ni ukundiso.