1 Mntu na atione tiwandima wa Klistu, na tekhigwa ndima ya kubiikia Mbui za Muungu ambazo khazikuikwa pwii kwa wantu. 2 Ivyo kia mwekwekhigwa ndima akundigwa kuwa mndima mzumiiwa. 3 Akini kwangu miye khiogoha ata nywie mniamwiie, hambu niamuiwe he mkonga wa miko, naho ata miye mwenye sheamuia. 4 Kwaviya mwe moyo wangu, khiona kuwa nina masa yoyose, akini ido khadionyesha kuwa miye khina masa. Zumbe nee aniamuiae. 5 Ivyo msekumuamuia mntu yoyose mwe kisingi ambacho khakizati kubua. Akini gojani adi aho Zumbe endahoeze, yee endaayaike pwii yose yekufiswayo mwe kiza na kuziika pwii mamakhanyi za wantu zekufiswazo mwe mioyo yao. Naho kia yumwe endaahokee ntogoo akundigwayo kwekhigwa.

6 Wandugu zangu, ayo yose nekugombekayo kwa mbui ya Apolo na miye yawaambize, kwa msimo wangu na Apolo nakunda mmanye mana ya ntamwiizi inu, "Gosoani inga yekuandikwavyo." Kwesekuwa na mntu yoyose kwenu mwevunia mntu mtuhu na kumbea mtuhu. 7 Ni ndai mwekukuika wee kuwa wafaa kusima mtuhu? Ivi khio Muungu mwekukwekha vintu vyose wenavyo? Na ikawa kwekhigwa, kwambwai wevuna inga viya Muungu ekukwekha?

8 Isasa mwenayo yose myakundayo! Mtenda kae matajii! Mtenda kae maseuta naho kwesiho swie! Ni vyedi nee mtenda maseuta wa kwei ili na swie tigookee hamwe na nywie. 9 Akini kwetu swie waagiiwa neona kuwa Muungu katiika kuwa ni wantu wakubewa kusima wose, tiho inga wantu wekuamuiwao kuita kukomwa hemeso ya wantu. Titendwa inga wantu wa kusekwa hanu mwe inusi na kwa wandima wa uwanga kwa Muungu na kwa wantu. 10 Wantu wangi wationa swie inga wahezi kwaajii tabiikia mbui za Klistu, akini nywie mweona ni wenye umanyi kwaviya mwamtongea Klistu, swie taoneka inga khatina nguvu akini nywie mna nguvu, swie tabewa nywie mwatunywa. 11 Ata isasa swie tina saa na khiu, naho tina sakaza, tatoigwa na khatina hantu hakwekaa. 12 Naho taangadika na kugosoa ndima zitogazo swie wenye, tikadumulwa swie tamuombeza Muungu awajaie, tikasuumizwa tazizimiza, 13 wantu wakagombeka ya uhokho swie tawatambaisa vyedi. Titenda inga viya usama mwe inusi, kwa kia mntu swie ti mafusi.

14 Khiandika mbui izi khio kwaajii ya kuwagea soni, iya ni kwaajii ya kuwahaza wanangu niwakundao. 15 Ata nemuwa na wahinyi wangi muno mwe wekaisi wenu wa kumzumia Klistu, akini mna tati yumwe du. Mie ni tati yenu kwakuwa kintu kimwe na Yesu Klistu, kwaajii miye nee mwekuwabiikia Mbui Yedi ya Muungu.

16 Ivyo, nawahembeza gosoani inga viya miye nigosoavyo. 17 Nee vyekuniekavyo nimuagiie Timoseo kwenu. Yee ni mwanangu nimkundisae muno, nimkauwiaye mwe ndima ya Zumbe. Endaawakumbuse yada niyatongeayo mwe Klistu inga nihinyavyo kia hantu ha mazumwezumwe ya wantu wamzumiao Klistu.

18 Wamwe wenu wavoka kwevuna wakimamakhanya kuwa khinaneze kwenu vituhu. 19 Akini Zumbe akaona kuwa ni vyedi, nendaneze kwenu kinyio. Aho nendahoneze nendanionee mwenye, mbui watamwiiazo awo wevunao na kumanya kia wadahacho kugosoa. 20 Kwaviya Useuta wa Muungu khaumo mwe ntambaisi du, iya mwe yada wadahayo kugosoa mwe nguvu za Muungu. 21 Ni kihi mkikundacho? Neze kwenu na ngoda, hambu neze kwa moyo wa ukundiso na uhuhusi?