1 Mwe bauwa yenu mwekuniuzayo mwe mbui ya khande zekulavigwazo kwa vizuu.

Tamanya kuwa swie tose tina umanyi, akini umanyi uwo wawatenda wantu wevune akini ukundiso wawatintimaza wantu wangi mwe uzumizi. 2 Mntu yoyose amamakhanyae kuwa amanya kintu, kwakwei khamanya kintu inga viya akundavyo kumanya. 3 Akini mntu amkundisae Muungu amanyika ni Muungu.

4 Kwaivyo mwe khande zilavigwavyo ntambiko kwa vizuu, tamanya kuwa vizuu khio kintu mwe inusi, akini tamanya Muungu ni yumwe du. 5 Ata ikawa kuna vintu vyetangwavyo, miungu iwe mwe inusi hambu vyekuwavyo uwanga, ata ikawa iuko miungu na mazumbe wangi, 6 akini kwetu swie Muungu ni yumwe du, nee Tate ekugosoae vintu vyose kwaajii yakwe swie tekaa. Naho yuuko Zumbe yumwe du Yesu Klistu, kwembokea yee vintu vyose vigosolwa na swie tekaa kwa kwembokea yee.

7 Akini khio kuwa wantu wose waumanya ukwei uwo, kwaviya wauko wangi wekuzweeao kuvika vizuu, ata isasa wadaho khande izo zawatenda wamamakhanye kuwa zilavigwa kwa vizuu, ivyo weona wagosoa mavigaviga kwaajii khawekutintimaa mwe uzumiizi. 8 Akini khande khaidaha kutegaa hehi na Muungu, tikaeka kuda khatiungukiwa ni kintu, naho tikada khatigenyezewa kintu.

9 Akini kauwani, kuekewa kwenu kuda chochose kwesekuwatenda wada wesaokutintimaa mwe uzumiizi wakagosoa mavigaviga. 10 Kwaajii mntu mwesaekutintimaa mwe uzumiizi akoona wee mwekwetangwa mmanyi wada khande izo mwe nyumba za kuvika vizuu, ivi khanaamamakhanye viyaviya kuwa akundigwa kuda khande zekuavigwazo ntambiko kwa vizuu? 11 Ivyo uyo nduguyo mwesaekutintimaa mwe uzumiizi, ambae Klistu kauya na nyuma kwaajii yakwe, endaage kwaajii ya kumanya kwako. 12 Ivyo mkiwatenda watuhu watende kuwa na masa kwa sia iyo na kuumiza mioyo yao, aho mwendamuwe mwamkoea masa Klistu mwenye. 13 Ivyo ikawa khande yawatenda wandugu zangu waklistu wagosoe mavigaviga, khinanide nyama katu ili nesekumtenda ndugu yangu agosoe mavigaviga.