1 Miye Paolo, nekwetangwae kwa ukundiso wa Muungu, niwe muagiiwa wa Klistu Yesu, bauwa inu khiandika miye hamwe na ndugu yangu Sositenesi, 2 tawaandikia nywie zumwezumwe da wantu wamzumiiyao Klistu da uko mwe mzi wa Kolinto, nywie ambao Muungu kawasagua kuwa kintu kimwe na Yesu Klistu na kuwetanga kuwa wantu wakwe. Tawaandikia nywie hamwe na wantu wose ambao wamuombeza Zumbe Yesu Klistu, ambae nee Zumbe yenu, viyaviya na Zumbe yetu swie.

3 Namuombeza Muungu Tati yetu na Zumbe Yesu Klistu awekhe wedi na uivanisi.

4 Misi yose namtogoa Muungu kwaajii yenu, kwaviya kawekha wedi wakwe kwembokea Klistu Yesu. 5 Kwa kuwa kintu kimwe na Klistu, Muungu kawekha kia kintu mkundacho na isasa mwadaha kugombeka kia kintu Muungu akundacho mgombeke. 6 Ayo yaonyesha kuwa mbui za Klistu ambazo nee tibiikia kwenu ni za kwei, 7 ivyo khamnamhungukiwe na funge yoyose yekulawayo kwa Muye wa Muungu, mkagoja kuikwa pwii kuuya kwa Zumbe yetu Yesu Klistu. 8 Muungu endaawatintimaze adi kisiikizi, ili mwesekuoneka mna masa mwe msi uda, ambao Zumbe yetu Yesu Klistu endaeze kuwaamuia wantu. 9 Muungu endaagosoe ayo kwa kuwa yee ni mkwei. Yee nee ekuwetangae nywie ili muwe kintu kimwe na Yesu Klistu Zumbe yetu.

10 Wandugu zangu, kwa udaho wa Zumbe yetu Yesu Klistu, nawahembeeza nywie wambuya wangu mwevane kwa yada mgombekayo, iya muwe na nia mwenga na mamakhanyi mwenga. 11 Wandugu zangu, nchembigwa ni wantu kulawa mwe kaya ya Kiloe kuwa kuna khumbizi. 12 Mana yangu ni inu, kia yumwe yenu amba vyakwe. Uyu agombeka, "Namtongea Paolo," uyu agombeka, "Namtongea Apolo," mtuhu nae agombeka, "Namtongea Petulo," naho mtuhu agombeka, "Namtongea Klistu." 13 Ivi Klistu kepanga? Ivi Paolo nee mwekugong'ondewa he mhamba kwaajii yenu? Ivi mubatiizwa kwa zina da Paolo? 14 Namtogoa Muungu kwaajii nchekumbatiiza mntu yoyose gatigati yenu, akini kiwabatiiza Kilisipo na Gayo wowodu. 15 Ivyo Khahana mntu yoyose adahae kugombeka kabatiizwa kwa zina dangu. 16 Ehe, kiwabatiiza wantu mwe kaya ya Sitefano, kusima awo khikumbuka inga kimbatiiza mntu mtuhu. 17 Kwaviya Klistu khekuniagiiya nibatiize wantu, iya kuwabiikia Mbui Yedi, kwesiho kukauwiya umanyi wa kiuntu, ili ufe wa Klistu he mhamba wesekwaza udaho wakwe.

18 Kwaviya mbui ya ufe wa Yesu he mhamba ni uhezi kwa wada wekwagao, akini kwa swie tekuoholwao mbui iyo ni udaho wa Muungu. 19 Kwaviya iandikwa mwe Maandiko ya Muungu,

"Nendanibanange umanyi wao wenye umanyi,

Na umanyi wao awo wenye umanyi nendaniuemee."

20 Isasa, wahahi wenye umanyi? Wahahi wahinyi wa miko ya Msa? Wahahi wantu wenye umanyi wa kwevunia mbui kwa misi izi? Muungu katenda umanyi wa wantu mwe inusi inu kuwa ni uhezi.

21 Kwa umanyi wakwe Muungu kawatenda wantu wasekummanya kwa umanyi wao. Akini Muungu kakunda kuwaohoa wada wamzumiiao kwembokea mbui tiibiikiayo, ambayo wenye umanyi waona ni uhezi. 22 Wayahudi wakunda ntangio nee wazumiie, Wagiiki nao wakunda umanyi ili wazumiie. 23 Akini swie tabiikia mbui za Klistu mwekugong'ondewae he mhamba. Mbui iyo yawakima Wayahudi na kwa wantu wesaokuwa Wayahudi ni uhezi. 24 Akini kwa wada wekwetangwao ni Muungu, iwe Wayahudi hambu wantu wesaokuwa Wayahudi, kwao Klistu ni nguvu na umanyi wa Muungu. 25 Kwaviya kionekacho kuwa ni uhezi kwa Muungu, icho ni umanyi yemboka umanyi wa wantu, naho kionekacho ni kinyonge kwa Muungu kina nguvu yemboka nguvu ya wantu.

26 Wandugu zangu, kumbukani aho mwekwetangwaho ni Muungu, wangi gatigati yenu nee waoneka inga khawana umanyi hemeso ya wantu na wangi khamwekuwa mwamanyika muno na khamwekuvyaigwa mwe kaya za wantu watunywao. 27 Akini Muungu akasagua mbui ziya ambazo wantu waziona kuwa ni uhezi, ili awagee soni wenye umanyi, naho kasagua yada wantu waonayo yasokea ili awagee soni wenye nguvu. 28 Muungu akasagua vintu ambavyo kwa wantu ni vya vinyonge na wavibea, ili avibanange viya vintu ambavyo wantu waviona nivya mana. 29 Muungu kagosoa ayo, ili mntu yoyose asekwevuna hemeso ya Muungu. 30 Kwaviya Muungu nee mwekuwaika kuwa kintu kimwe na Klistu Yesu, naho Muungu kamtenda Klistu kuwa umanyi wetu. Kwembokea yee titendwa tioneke wedi hemeso ya Muungu, na wantu wakwe wa Muungu na tekukombolwao. 31 Inga yekuandikwavyo mwe Maandiko ya Muungu,

"Mntu yoyose etogoae, atogoe kwa ndima ekugosoayo Zumbe."