1 Nakunda kummanyisa kwenu umbu detu Foibe, yee ni mndima mwe zumwezumwe da wantu wamzumiao Klistu da uko Kenikileya. 2 Mhokeeni kwaviya yee kamzumiiya Klistu inga viya swie tekumzumiavyo, naho mwambizani mwe yada yose ayakundayo kulawa henu, kwaviya yee kawa yedi muno kwa wantu wangi naho na mie mwenye.

3 Wauguseni Pilisika na Akula ekuwae Muumewe, wandima wezwangu mwe ndima ya Klistu Yesu. 4 Welavya wowo wenye kwaajii yangu ata wekeona ugima wao khio kintu, nawatogoa naho khio mie du akini ni hamwe na wantu wamzumiao Klistu kulawa si ntuhu.

5 Naho niugusiani wantu wamzumiao Klistu wakintanao mwe nyumba yakwe. Viavia niugusiani mmbuya yangu Epaineto ekuwae mntu wa bosi kumzumiia Klistu uko mwe mkoa wa Asia. 6 Niugusiani Maliamu ekugosoae ndima kwesiho kusokea kwaajii yenu. 7 Viavia niugusiani wambuya wangu Anduloniko na Yunia, wekuwao hamwe na mie mwe kifungo, wowo wamanyika vitana na waagiiwa, naho newawa wamzumiiya Klistu, kisingi mie khizati kumzumiiya Klistu.

8 Niugusiani mbuyangu Ampiliato, yee nimkundisae kwaviya kaungana na Zumbe. 9 Naho niugusiani Alubano, mndima mwezwangu mwe ndima ya Klistu, hamwe na mmbuya yangu Sitakisi. 10 Niugusiani Apele, uyo ekuzumiwae ni Klistu, niugusiani kaya yose ya Alisitobulo. 11 Mwegaieni ugusi wangu Helodiani ndugu yangu Myahudi mwezwangu na wose wekuungana na Zumbe wa kaya ya Nakisa.

12 Wegaieni uugusi wangu Tilufena na Tilufosa wada wavyee wagosoao ndima mwe ndima ya Zumbe, na kwa mmbuya yangu Pelisi ekugosoaye mangi kwaajii ya Zumbe. 13 Naho mwekheni uugusi wangu Lufo, mntu ekusagulwae mwe ndima ya Zumbe hamwe na mami yakwe, yuda ekuwae mmaa yangu. 14 Wegaieni uugusi wangu Asinikilito na Filegoni na Helima na Patiloba na Helima na ndugu wose wekumzumiao Klistu wekuwao hamwe nao. 15 Viavia niugusiani Filologo na Yulia na Nelea na umbude na Olimpa hamwe na wantu wose wekumzumiao Klistu wekuwao hamwe nao.

16 Ugusaneni kwa ntangio ya ukundiso. Naho wantu wose wamzumiao Klistu wekuwao uku wawaugusa.

17 Ndugu zangu, nawahembeeza wakauweni wada wagosoao fitina na mbui za kuwasefua kuigana na yada mahinyo mwekujihinyayo mwekae nao hae. 18 Kwaviya wantu inga awo khawamgosweeya ndima Zumbe yetu Klistu, iya wagosoa ndima kwaajii ya khwiina zao wenye, kwakuwagombekea ntamwiizi ntana ya utiizi na kuwabiikia uhokho 19 Kia mntu kasikia via mtegeezavyo Mbui Yedi, na kwajii inu mie khiwa na nyemi, nakunda mtumie akii zenu mwe kumanya matana, mwesekuonekana mgosoa masa kwa kutenda mafyaimi. 20 Isasa Muungu aetae uivanisi endaamhonde ibiisi na kuwekha nywie udaho wa kumvota.

Wedi ya Zumbe yetu Yesu Klistu iwe nanywi.

21 Timoseo mndima mwezwangu, awaugusa. Viyaviya Lukio, na Yasoni, na Sosipateli, wambuya wezwangu, wawaugusa.

22 Mie Telitio nekuiandikaye bauwa inu, inga paolo ekuniagiiavyo niandike, nawaugusa kwa zina da Zumbe.

23 Gayo, ambae ni mwenyezi yangu, hamwe na wantu wamzumiiao Klistu wose wekuwao wakakintana kwakwe, awaugusa. Elasito, muika hea za mzi unu, hamwe na Kwalito, wawaugusa. 24 Wedi wa Zumbe yetu Yesu Klistu na iwe hamwe nanywi nyose. Pepa.

25 Isasa na timtogoe Muungu kwaviya yee ni mkuu! Yee awatendae mtintimae mwe uzumizi iyetwayo na Mbui Yedi ya Yesu Klistu, ambayo nee khiwa nikibiikia kwenu, kulawana na Mbui Yedi iyo aho kae khaikuikwa pwii. 26 Akini, isasa ukwei uwo ugubulwa na kumanyika kwa sia ya mbui zekuandikwazo na waoni na kwa miko ya Muungu ya kae na kae, ili wantu wa si zose wadahe kumzumiiya na kumtegeeza.

27 Muungu ekuwaye ikedu mwenye udaho wose, kwaviya yee ni mkuu atogolwe. Pepa.