1 Kia mntu akundigwa kuwategeeza waongweezi wa si, kwaviya udaho wa kuongweea walawa kwa Muungu, na wada waongweeao isasa waikwa na Muungu. 2 Mntu yoyose ahiganaye na uwongweezi wa Muungu ahigana na miko ya Muungu na wada wagosoao ivyo weetea sugusa wenye. 3 Kwaviya waongweezi khawatenda wantu wagosoao wedi waogohe, iya uwatenda wantu wagosoao mafyaimi waogohe. Ivi wakunda usekumuogoha muongweezi? Gosoa yedi, nae endaakutogoe. 4 Kwaviya wowo ni wandima wa Muungu kwaajii ya kuwaambiza nywie. Akini mkagosoa mafyaimi, muwaogohe kwaviya wekhigwa udaho wa kuwekha sugusa. Wowo ni wandima wa Muungu, waonyeshao maya ya Muungu kwa wada wagosoa makwasukwasu. 5 Ivyo mwakundigwa kuwategeeza waongweezi, khio kwaajii ya kuogoha sugusa ya Muungu, iya kwaajii mwamanya kuwa mwakundigwa kutenda ivyo.

6 Kwaajii iyo mwaiha kodi, kwaviya waongweezi awo wamgosoea ndima Muungu kwaviya wagosoa dia wakundigwado kugosoa. 7 Mwiiheni kia mntu kintu chakwe. Inga kodi iheni kodi, inga ni ushuuu, iheni ushuu, akundigwaye kutunywa mtunyeni.

8 Msekudaiwa kintu na mntu yoyose, iya kukundisana, kwaviya yee amkundisae mweziwe, agosoa viya miko ikundavyo. 9 Miko yamba ivi, "Usekugosoa ukianga, usekukoma na usekubawa, na usekukunda kia ekuwacho nacho mwezio na miko mituhu yose, iikwa hamwe mwe mwiko mkuu umwe, mkundise mwezio inga viya wekundisavyo wee mwenye." 10 Mntu amkundisaye mwezie khamgosoeya ya ufyaimi. Kwaiyo mntu awakundisao wantu watuhu aiganiza mwiko.

11 Gosoani ivyo, kwaviya mwamanya kisingi kihehi cha kwenuka mwe usisiza, haika uohozi wetu uhehi isasa kusima kisingi kia tekuvokaho kuzumiiya. 12 Kio chasia na musi uhehi. Naho tibade mbui zose za kiza, doani vitoanavyo vya ung'azi. 13 Misi yose tekae kwa utunyo inga ikundigwavyo kwaajii tekaa mwe ung'azi wa musi, naho khio kwa shelehe fyaimi za kuda na kudomea, ufyaimi na ukianga, khumbizi na kinyuu. 14 Wekazi wenu uongweewe na Zumbe Yesu Klistu, naho mwesekugosoa viya mii ikundavyo.