1 Myahudi anakibwai kitendesacho kusima wantu watuhu? Hambu kugwiswa kunautana wani? 2 Yaambiza muno kwa sia nyingi. Bosi, kwaviya Muungu nee kazumiia kuwekha Wayahudi Mbui yakwe. 3 Akini yendaiwe viivihi inga wamwe wao khawekuzumiiya? Ivi, Muungu khanaagosoe dia ekugombekado kugosoa? 4 Bue! Muungu kasigaa kuwa ni yedi na mzumiiwa misi yose, etiho kia mntu ni mhokho. Inga yekuandikavyo,

"Kia ugombekaho,

Mbui zako ni kwei,

Na he kuamwiiya wee wavota."

5 Akini ikawa mavigaviga yetu yaonyesha haki ya Muungu viya atiamuiavyo tigombeke mbwai? Ivi, Muungu ni mtiizi atekhaho sugusa? Akini aya nagombeka kiuntudu. 6 Bue! Inga nee iwa ivyo, Muungu nee khadaha viivihi kuamwiiya wantu wa inusi?

7 Mntu adaha kuuza, "Inga uhokho wangu waambiza kuonyesha kuwa Muungu ni mzumiiwa na kutendesa ukuu wakwe, kwa mbwai mie naamuiiwa kuwa ni mwenye mavigaviga?" 8 Uko ni inga na kugombeka, "Tigosoe mavigaviga ili tihokee yedi." Wantu watuhu watisingiziavyo hata swie tahinya inga ivyo. Kauwa awa wose wendawaamwiiwe kutongeana na makwasukwasu yao.

9 Tambe mbwai? Swie Wayahudi ni wedi kusima wesaokuwa Wayahudi? Bue! Kwaviya khimanya kae aho bosi kuwa Wayahudi na wesaokuwa Wayahudi wose wana mavigaviga. 10 Inga yekuandikwavyo,

Khahana hata mntu yumwe ekuwaye yedi hemeso ya Muungu.

11 Khahana ata mntu yumwe amanyae kwei,

Naho khahana mntu akundae kumvikia Muungu.

12 Wose wambada Muungu

Wose wagosoa mavigaviga

Khahana agosoae yedi, khahana ata yumwe.

13 Mbui fyaimi kulawa mwe miomo yao ni inga ubuno fyaimi

Naho uwatiiya wantu kisingi chose na kuwatenda waogohe,

Mbui wazitamwiiazo zawaumiza wantu inga yeivyo usungu wa nyoka.

14 Mbui zao watamwizazo zimema kuwabadia lazi watuhu na zisuumizazo.

15 Wantu awo waguukia kuwasuumiza watuhu na kukoma,

16 Hohose waitaho wabananga vintu na kuwabada wantu wakawa na masumiizo.

17 Sia ya uivanisi khawaimanya,

18 Khawamtunya Muungu.

19 Ivyo tamanya kuwa miko ni ya wada waongoewao na miko iyo, naho khahana mbui yoyose ya kwevunia, na wantu wose wa inusi waasi ya kuamuiiwa na Muungu. 20 Kwaviya khahana mntu yoyose azumiiwaye kuwa ni yedi hemeso ya Muungu kwa kutoza miko, ndima ya miko ni kumuonesha du mntu kuwa kagosoa mavigaviga.

21 Akini isasa sia ya Muungu ya kuwatenda wantu wazumiiwe na kuwa wedi kwakwe iikwa pwii, naho khio kwa kukauwia miko. Mbui ya miko na waoni igombeka mbui inu. 22 Muungu awatenda wantu waoneke wedi hemeso yakwe kwa sia ya kumzumiia Yesu Klistu. Muungu agosoa ivyo kwa wose wamzumiiao, kwaviya khahana ubahuzi wowose kwa Wayahudi na wesaokuwa Wayahudi. 23 Kwaviya wantu wose wagosoa mavigaviga na wekazi wao khauonyesha ukuu wa Muungu. 24 Akini kwaajii Muungu ni yedi muno, awatenda wantu wazumiiwe hemeso yakwe kwa sia ya Yesu Klistu, awakomboae. 25 Muungu nee kamlavya Yesu ili kwa phome yakwe awe sia ya kuwaekea na kuwausia wantu mavigaviga yao kwa kumzumiiya yee. Muungu kagosoa ivyo ili aonyeshe kuwa yee ni yedi misi zose. Aho kae Muungu nekawa mzizimizi khekupatiiza mavigaviga ya wantu. 26 Kwa kutenda ivyo Muungu kaonyesha ekuwavyo yedi muno kisingi iki, kwa kuwatenda wantu wazumiiwe kwakwe kwa kumzumiia Yesu.

27 Nikihi tevuniacho? Khahana! Kwa mbwai? Ivi kwaajii ya kuiganiza miagiiyo? Bue! Akini ni kwaajii tazumiiya. 28 Kwaviya Muungu amzumiiya mntu kuwa yedi hemeso yakwe kwa kuzumiiya, akini khio kwa kugosoa kia kikundigwacho na miko. 29 Ivi, Muungu ni Muungu wa Wayahudi du, hambu ni Muungu wa wesao kuwa Wayahudi? Eee, ni Muungu wa Wayahudi na viavia ni Muungu wa wantu wesaokuwa Wayahudi. 30 Muungu ni yumwe, nae endaawatende Wayahudi wazumiiwe kwa kuzumiiya kwao, na wada wantu wesaokuwa Wayahudi wendawazumiiwe hemeso yakwe kwa kuzumiiya kwao. 31 Ivi tatozeeza uzumizi ili tesekuitegeeza miko? Khahana! Kwa kuibasa sia ya uzumizi tagosoa kikundigwacho na miko.