1 Muhokeeni kwenu mntu ekuwaye akundaye kuambizwa, akini msekuhigana naye kuusu fanyanyi zakwe 2 Wamwe wa wantu watuhu wazumiiya kuwa wadaha kuda mbai yoyose ya khande, akini wada wekuwao na kuogoha wada mboga za mani du. 3 Mntu adae kia kintu asekumbea yuda ambae khadaha kuda kia kintu, nae adae du mboga za mani asekumuamwiiya adae kia kintu, kwaviya Muungu kamzumiiya. 4 Wee nndai hata udahe kumuamuiiya mndima wa mtuhu? Akagooka na kugwa ni mbui ya zumbe wakwe, haika, endaagooke kwa untintimavu kwa via Zumbe adaha kumgosoa adahe kugooka. 5 Mntu kumamakhanya msi mtuhu kuwa wamana muno kusima mtuhu, mntu mtuhu adaha kumamakhanya misi zose ni mwenga. Kia yumwe na abase via akii yakwe ikundavyo. 6 Wada wamamakhanyao kuwa msi umwe ni muhimu kusima ntuhu wagosoa ivyo kwaajii ya Zumbe. Na wada wadao khande za mbai zose wagosoa ivyo kwaajii ya Zumbe. Neivyo, wamtogoa Muungu kwaajii ya khande, na wada waemeao kuda khande ya mbai ntuhu wagosoa ivyo kwaajii ya Zumbe. Nao wamtogoa Muungu. 7 Kwaviya khahana mntu yeyose gati yenu ekaae kwaajii yakwe mwenye, naho khahana auyae na nyuma kwaajii ya mwenye. 8 Mana tikekaa, tekaa kwaajii ya Zumbe, tiuyaho na nyuma, tauya na nyuma kwaajii ya Zumbe. Inga tikekaa hambu tikauya nyuma, swie ni wantu wa Zumbe. 9 Kwaviya Klistu nee kauya na nyuma, akayuyuka apate kuwa Zumbe wa wekuwao na ugima na wekuuyao na nyuma. 10 Kwa mbwai, wee wamuamwiiya nduguyo? Naho kwambwai wambea nduguyo? Swie wose tendatigooke he meso ya kigoda cha kuamuiiwa na Muungu. 11 Kwaviya Maandiko yamba,

"Inga nekaavyo, agombeka Zumbe,

Kia mntu endaeanikintie mavindi,

Na kia yumwe endaagombeke mie ni Muungu".

12 Ivyo, kia yumwe wetu endaalavye mbui zakwe mwenye he meso ya Muungu.

13 Ivyo, tieke kuahiana masa, naho tisekukunda kuwa kikwazo kwa ndugu hambu kumtenda agwe he mavigaviga. 14 Mwe kuwa hamwe na Zumbe Yesu, ni kwei khahana kintu chochose ambacho khakikundigwa ni Muungu kwa asili yakwe, akini mntu akamamakhanya kuwa kintu kituhu khakikundigwa ni Muungu, kwakwe uyo uwa khakikunda. 15 Inga ukamkima nduguyo kwaajii ya khande udayo, khachu yako khaiongweewa na ukundiso. Usekutenda khande yako udayo imwaze mntu yuda Klistu nee kauya na nyuma kwaajii yakwe! 16 Naho, msekuzumiia kintu muonaho kwenu kuwa ni yedi kibewe. 17 Kwaviya Useuta wa Muungu khio mbui ya kuda na kudomeea, naho mwahusika na kuwa wedi, uivanisi na nyemi iyetwayo ni Muye wa Muungu. 18 Amgosoea ndima Klistu kwa sia iyo, kumtamiza Muungu na kuzumiiwa na wantu. 19 Kwaiyo tiyatoze misi yose mbui zenye kueta uivanisi, na yatiambizayo kugeana moyo. 20 Naho msekuibananga ndima ya Muungu kwaajii ya kuigana uwanga ya khande. Khande zose ni ntana, akini khaifaa kuda khande ambayo kindakimtende mntu agwe mwe mavigaviga. 21 Ni vyedi kubada kuda nyama, kudomeea divai hambu kugosoa chochose ambacho chadaha kumtenda nduguyo kugwa. 22 Toza uzumiiacho gati yako na Muungu yako. Ebae mntu yuda ambae, mwe weamuiiya da kugosoa khaigana na moyo wakwe. 23 Akini mntu amamakhanyae mwe moyo wakwe mwe kia akundacho kuda, asekuda kintu icho, kwaajii akada kwa kuzumiiya ni kifyaimi he meso ya Muungu. Kwaviya chochose kigosolwacho kwesiho kuzumiiya ni mavigaviga.