1 Wazumizi wezwangu, Waisilaeli nakunda kwa moyo wangu wose muoholwe. Naho nawaombezea kwa Muungu misi yose. 2 Kwaviya mie kiona kuwa wagosoa kia wadahado kumuondeza Muungu akini khio kwa sia ya kwei. 3 Khawazati kumanya sia iyo ya Muungu ekuigosoayo ili wantu wazumiiwe hemeso yakwe, naho wakabasa sia zao wenye, na ivyo khawaizumiiya sia iyo yakuwatenda wantu wazumiiwe hemeso ya Muungu. 4 Kwaviya Klistu kaiganiza mbui zia ambazo miko nee ikakunda, ili mntu yoyose amzumiiaye azumiwe hemeso ya Muungu.

5 Msa nee kaandika ivi mwe mbui ya kuzumiwa hemeso ya Muungu kwa kutongea miko, "Mntu yoyose agosoaye yada yakundwayo ni miko endaekae kwa kutegeeza miko." 6 Akini mwe mbui ya kuzumiwa hemeso ya Muungu kwa sia ya kuzumiiya Maandiko yamba, "Usekweuza mwe moyo wako, nindai endaeakwee uko uwanga kwa Muungu?" Uko ni kumseeza asi Klistu. 7 Naho usekugombeka nindai endaeaite asi mwe si ya wantu wekuuyao nyuma? Kumyuyusa Klistu. 8 Akini Maandiko ya Muungu yamba ivi, "Mbui ya Muungu ihehi nawe, umo mwe muomo wako na moyo wako. Nee mbui ya uzumizi tubiikiao." 9 Inga ukagombeka wee mwenye kwa muomo wako kuwa Yesu ni Zumbe na kumzumiia mwe moyo wako kuwa Muungu nee kamyuyusa, wendauoholwe. 10 Kwaviya mntu huzumiiya kwa moyo na kuzumiwa hemeso ya Muungu, na kuwagombeka wantu watuhu uwanga ya uzumizi unu wendauoholwe. 11 Maandiko ya Muungu yamba, "Mntu yoyose amzumiae Klistu khanaagewe soni." 12 Mbui inu ni ya wose kwaviya khahana ubahuzi kwa Wayahudi na wantu wesaokuwa Wayahudi, wose ni kintu kimwe, kwaviya Zumbe wa wose ni yumwe nae uwaambiza wada wose wamwetangao. 13 Inga viya Maandiko ya Muungu yambavyo, "Kia mntu endaeadetange zina da Zumbe, endaaoholwe."

14 Akini wendawadetange viivihi zina da Zumbe wesaekumzumiiya? Naho wendawamzumiiye viivihi yee ambae khawazati kumtegeeza? Naho wendawamtegeeze viivihi kwesiho kuwa na mntu wa kuwabiikia? 15 Naho wantu wendawabiikie viivihi inga khawanawegalwe? Inga Maandiko ya Muungu yambavyo, "Ni nyemi khuu kweza kwa wada wabiikiao Mbui Yedi!" 16 Akini khio wose wekuzumiao Mbui Yedi. Kwaviya Isaya ekuwae muoni wa Muungu kagombeka, "Zumbe nindai ekuzumiiae mbui yetu?" 17 Ivyo uzumizi walawana na kutegeeza mbui, na iyo mbui yalawana na kumbiikia Klistu.

18 Akini nauza, ivi ni kwei khawekuutegeeza iyo mbui? Haika, wautegeeza inga Maandiko ya Muungu yambavyo,

"Wantu wabiikia mbui kia hantu,

Mbui zawo zibiikiwa kubua kisiikizi cha inusi."

19 Nauza vituhu, ivi yadahika kuwa wantu Waisilaeli khawekumanya? Musa mwenye ni wabosi kutambaisa,

"Nendaniwatende muwaonee kinyuu,

Wantu ambao khio wa si ya Isilaeli

Nendaniwatende muwe na maya nawo

Mwe si ya wantu wahezi."

20 Naho Isaya ekuwae muoni wa Muungu akagombeka kwesiho kuogoha,

"Wada wekuwao khawekuniondeza wanipata,

Keaviza kwa wantu wesaokweuza mbui zangu."

21 Akini mwe mbui za wantu wa Isilaeli agombeka, "Musi ngima nee khiwetanga wantu wangu waniuwiye akini ni wantu mabagaa na wesaokutegeeza."