1 Swie tekudahaao mwe kumzumiia Muungu, takundigwa kuwaambiza wada ambao khawazati kudahaa mwe kuzumiiya na khio kugosoa mbui za kwetamiza wenye. 2 Kia yumwe yetu akundigwa kumtamiza mweziwe kwa mbui zedi na kumgosoa atende mtintimavu mwe kuzumiiya. 3 Kwaviya Klistu khekutamiza mwenye, iya nekawa inga Maandiko yambavyo, "Soni zose wekukuaviazo wee Muungu zinipata mie." 4 Kwaviya mbui zose zekuandikwazo aho kae, ziandikwa kwaajii ya kutihinya swie. Maandiko ayo yatiambiza kuzizimiza na kuwa watintimavu ili tiwe na kauwio. 5 Muungu mwenye nee atiambizae tizizimize na kuwa watintimavu, ivyo nawavikia ili Muungu awaambize muwe mwagosoa mbui kwa kwevana. Kwaajii Klistu akunda mwekae inga viya yee ekwekaavyo. 6 Aho nee nywie wose mwadaha kumtogoa Muungu kwa moyo umwe ekuwae Tate wa Zumbe yetu Yesu Klistu.

7 Naho, muhokeane ninywi kwa ninywi ili Muungu atogolwe na wantu wose inga viya Klistu ekuwahokeavyo. 8 Kwaviya, nawagombeka Klistu nee kuwagosoea ndima Wayahudi kuonyesha Muungu tidahavyo kumzumiiya Muungu, ili viya viaga Muungu ekuwekhavyo baba zetu viiganie, 9 na kuwatenda ata wantu wesaokuwa Wayahudi wamtogoe Muungu kwa kwaajii ya mbazi zakwe. Inga Maandiko yagombekavyo

"Naho nendanikutogoe mwe wantu wesaokuwa Wayahudi,

Nendanitoe wiya wa kukutogoa wee."

10 Vituhu Maandiko yagombeka,

"Nywie wantu mwesaokuwa Wayahudi, muwe na nyemi hamwe na wantu wakwe Muungu."

11 Naho,

"Mtogoeni Muungu, nywie wantu wose wesaokuwa Wayahudi.

Wantu wose wamtogoe Zumbe."

12 Naho muoni Isaya agombeka, "Mntu yumwe kulawa mwe uvyaigwa wa Yese endaalawiiye,

Nae endaawagookee wantu wa si zose,

Naho wendawamkauwiie kuwa endaawaohoe."

13 Muungu nee atekhaye kauwio na kuwameza nywie nyemi yose na uivanisi kulawana na uzumizi wenu, ili makauwio yenu yadahe kugenyea kwa udaho wa Muye Muungu.

14 Wambuya wangu, mie mwenye nazumiiya kuwa mmema wedi na umanyi wose na mwadaha kuhinyana wenye. 15 Akini mwe bauwa inu khiwaandikia kwesiho kuogoha mbui za kuwakumbusa. Khigosoa ivyo kwaajii ya mbazi ekunekhayo Muungu, 16 ili nitende mndima wa Yesu Klistu kwa wantu wesaokuwa Wayahudi. Ni ndima yangu ya kiuviki kuibiikia Mbui Yedi ya Muungu ili wantu wesaokuwa Wayahudi watende inga malavyo yamtamizayo Muungu, malavyo yekuzingulwayo na Muye wa Muungu. 17 Kwaajii kiungana na Klistu Yesu, nevunia kumgosoea ndima Muungu. 18 Khina nigombeke chochose nekugosoacho mwenye. Nendanigombeke du yada Klistu ekugosoayo kwembokea mie mwe kuongweea wada wesaokuwa Wayahudi kumtegeeza Muungu. Ni yee ekutendae ndima mwe yada nekugombekayo na kugosoa, 19 kwa udaho wa viozo na vihii, na kwa udaho wa Muye wa Muungu. Naho kwa kutamba kiya hantu, kuvokea kuda Yelusalemu adi Iluliko, kibiikia vyedi Mbui Yedi ya Klistu. 20 Mwe ayo yose nagosoa kia nidahado kubiikia Mbui Yedi hantu ambaho wantu khawazati kubiikiwa mbui ya Yesu Klistu. Nagosoa ivyo ili nesekuuwiya kuvoka ndima mhya hantu ambaho mntu mtuhu kavoka kae. 21 Inga Maandiko ya Muungu yagombekavyo,

"Wantu wose ambao khawekugombekwa mbui zakwe wendawaone,

Nao wada ambao khawazati kutegeeza mbui zakwe, wendawamanye."

22 Ndima iyo nee yekunikindiayo maa nyingi kweza kwenu. 23 Akini kwaviya isasa khibinda ndima yangu mwe si izi, na kwaviya kwa myaka mingi nee nikakunda kweza kwenu, 24 nakauwia niwaone nikawa mwe ntambo ya kuita si ya Sipania. Nendanekae na ninywi kwa kisingi kijihi na kuwa na nyemi na ninywi, naho nendaniendeee na ntambo, ivyo naombeza kuniambiza kwa ntambo ya kuita Sipania. 25 Akini, isasa naita Yelusalemu kuwaambiza wantu wa Muungu. 26 Kwaviya mazumwezumwe ya wantu wekumzumiao Klistu wa Makedonia hamwe na Akaya walavya hea zao kuwaambiza wamwe wa wantu wa Muungu wekuwao wakiwa uko Yelusalemu. 27 Wowo wenye wakunda kugosoa ivyo, akini kwakwei ni kihendo chao. Kwaviya kwa wantu wesaokuwa Wayahudi, newawa hamwe mwe majaiwa ya kimuye ya Wayahudi, wakundigwa nao kuwaambiza Wayahudi mwe kiya kintu wakundacho. 28 Nendahonibinde ndima iyo na kuwekha hea izo zekusangwazo kwaajii yao, nendanembokee kwenu nikawa siai kuita si ya Isipania. 29 Namanya ya kuwa niwaho uko hamwe na nywie Klistu endaawajaie muno.

30 Naho, wandugu zangu, nawahembeeza kwa Zumbe yetu Yesu Klistu na kwa ukundiso uetwao na Muye wa Muungu, kuwani hamwe nami kwa kunivika kwa Muungu. 31 Vikani nilawe salama kwa wada wesaokumzumiiya Muungu weuko Uyahudi na ndima yangu idahe kuzumiwa na wantu wa Muungu wa uko Yelusalemu. 32 Ivyo, Muungu akakundisa, nidahe kweza kwenu na moyo wa nyemi, ili tigeane moyo. 33 Namuombeza Muungu mwenye kueta uivanisi awe nanywi nyose. Pepa.