1 Kwaivyo, wandugu zangu, kwaviya Muungu katifiia mbazi nawahembeeza kwa moyo wose. Mwelavye nywie wenye inga malavyo yekuwayo na ugima, yenye kumtamiiya Muungu na kugosoa ivyo nee sia yenu ya kwei ya kumvika Muungu. 2 Mwesekumamakhanya na kutenda inga wantu wa inusi inu, ziya mwekeeni Muungu ahitue ziya mamakhanyo. Nee aho mwendamdahe kumanya na kuonyesha ziya mbui akundazo Muungu kulawa kwenu, yada yekuwayo yedi na yamtamizayo yee na yaiganayo.

3 Isasa kwa wedi wa Klistu kanitenda niwe mwagiiwa wakwe. Ivyo namgombeka kia yumwe yetu ivi, ekani kumamakhanya kuwa ni wakuu kusima watuhu, iya mweone kia mntu kekhigwa uzumizi udauda na Muungu. 4 Inga mmanyavyo mwii ni umwe iya una vimamo vingi, na kia kimamo kina ndima yakwe. 5 Viavia, swie ni wangi, kwa kuungana na Klistu tiwa mwii umwe, kia yumwe wetu ni kimamo cha mweziwe. 6 Kia yumwe kekhigwa udaho kuigana na wedi wa Muungu. Ekwekhigwaye udaho wa kuwamba wantu Mbui ya Muungu na agosoe ivyo kwa kuzumiiya kwakwe. 7 Mntu ekwekhigwaye udaho wa kugosoa ndima na agosoe ndima vitana. Na mntu ekwekhigwaye udaho wa kuhinya na ahinye vitana. 8 Mwenye udaho wa kuwagea moyo wantu na agosoe ivyoivyo. Mwenye udaho wa kuwapangia wantu vintu via ekuwavyo navyo atende ivyo kwa moyo umwe. Mwenye udaho wa kugookea wantu, agookee vitana kia agosoado, mwenye udaho wa kuwaambiza watuhu na agosoe ivyo kwa nyemi.

9 Wakundiseni wezwenu kwa moyo ung'aao na mbade kugosoa mavigaviga iya mkagosoa yedi kisingi chose. 10 Kundisaneni nywie kwa nywie, inga wandugu na kia mntu atamiwe muno kumtunya mweziwe. 11 Gosoani ndima msekuegea, iya gosoani ndima ya Muungu kwa moyo wose. 12 Kuwani na nyemi kwaajii mwamkauwiya Muungu, zizimizani mpataho suuba, vikani misi yose. 13 Waambizani wantu wa Muungu kwa yada wayakundayo, naho wahokeeni wantu wose.

14 Muwakundie yedi wose wesaokumikunda, naho mwesekuwabadia lazi. 15 Kuwani na nyemi hamwe na wenao nyemi, iyani hamwe na waiyao. 16 Mwekae kwa kwevana kwa kia yumwe, mwesekwevuna, naho gosoani madodo, mwesekweona mwamanya vintu vyose.

17 Mntu akakugosoea masa Usekuihiza ufyaimi kwa ufyaimi, mgosoe dedi kia mntu endaadione nidakutogolwa. 18 Gosoani kia mdahado ili muwe na uivanisi na wantu wose. 19 Wandugu wesekugeeza kuihiza yoyose ekukugosoeae masa, mbade Mungu mwe maya yakwe amiihie kwaviya mwe Maandiko yakwe amba, "Ndima ya kuihiza ni yangu miye, miye nendanimvuzie." 20 Maandiko ya Muungu yamba, "Mmasa yako akawa na saa, mwekhe khande na akawa na khiu, mwekhe mazi adomee. Kwaviya kwa kutenda ivyo wendaumtende awe na soni muno." 21 Wesekuvotwa na ufyaimi, akini uuvote kwa kugosoa yedi.