1 Ivyo, khahana sugusa kwa wada ambao wekazi wao waungana na Yesu Klistu. 2 Kwaviya, miko ya Muye iyetayo ugima kwa kuungana na Klistu Yesu iniohowa mwe miko ya mavigaviga na ufe. 3 Muungu kagosoa mbui ida ambayo miko khaikudaha kugosoa kwaajii ya wantu khatina udaho. Muungu nee kamuagiiya mwanawe akawa na mwii inga wetu. 4 Muungu nee agosoa ivi tidahe kwekaa inga via miko ikundavyo. Isasa tadaha kwekaisa kwa kuongoewa na Muye wa Muungu na khio kwakuongoewa na mii yetu ya mavigaviga. 5 Kwaviya, wada wekaisao inga via mwii ukundavyo, waongweewa na mwii. Akini wada wekaisao inga via Muye wa Muungu ukundavyo, waongweewa na Muye wa Muungu. 6 Wantu wamzumiiao kuongoewa na mamakhanyi za mwii weetea ufe, akini wantu wamzumiiao kuongoewa na mamakhanyi za Muye weetea ugima na utuiivu. 7 Kwaviya mntu aongweewae na mamakhanyi za mwii ni khondo kwa Muungu, kwaajii mwii khautegeeza miko ya Muungu, naho khaudaha kuitegeeza. 8 Wantu wategeezao via mwii ukundavyo khawadaha kugosoa yada yakundwayo ni Muungu.

9 Akini ikawa Muye wa Muungu uumo mwenu nywie khamnamtegeeze via mwii ukundavyo iya mwamtegeeza Muye wa Muungu via akundavyo naho yoyose esayekuwa na Muye wa Klistu, uyo khio mntu wa Klistu. 10 Mii yenu yatenda iuya na nyuma kwaajii ya mavigaviga akini ikawa Klistu ekakaa umu mwenu, basi muye awekha ugima kwaajii tizumiiwa hemeso ya Muungu. 11 Ikawa Muye wa Muungu ekumyuyusae Klistu ekakaa umo mwenu, naho uyo Muye ekumyuyusae Klistu, endaayekhe ugima mii yenu ya kuuya na nyuma, endaagosoe ivyo kwa Muye wakwe ekaae umo mwenu.

12 Ivyo wandugu zangu, swie khatikundigwa kwekaisa kwa kutongea mii yetu ya mavigaviga. 13 Kwaviya inga mkekaa kwa kugosoa via mwii ukundavyo kwei mwendamuuye na nyuma, akini mkekaa kwa kugosoa inga via Muye ukundavyo, mwendamuwe mwayakoma mbui zenu za mavigaviga, aho mwendamwekae. 14 Kwaviya wose waongoewao na Muye wa Muungu, awo nee wana wa Muungu. 15 Kwaviya Muye wekwekhigwao na Muungu khawatenda nywie kuwa watumwa na kuwatenda muogohe, bada yakwe Muye uyo awatenda muwe wana wa Mungu na kwa udaho wa Muye tamwetanga Muungu Mungu aba yani baba. 16 Naho Muye wa Muungu mwenye agombeka kwei na mioyo yetu, kuwa swie tiwana wa Muungu. 17 Kwaviya swie tiwana wa Muungu, tendatihokee majaiwa na tendatishiiki majaiwa ayo hamwe na Klistu. Muungu endaatekhe yada yose ekumwekhayo Klistu. Swie tusuumikao isasa inga Klistu ekusuumikavyo tendatiwe hamwe na ukuu wakwe.

18 Nayataazia maasumizo ya kisingi iki cha isasa khio kintu tikaiganiza na yada Muungu ekutiikiayo ambayo endaatigubuiye. 19 Vintu vyose vyekuumbwavyo vyagoja na kukauwia muno kisingi Muungu endaoawaike pwii wana wakwe. 20 Kia kintu ekuumbacho Muungu nee kakibada kiwe khakiigania, vintu ivyo khavikukunda vyenye kuwa ivyo, akini Muungu nee kakunda ayo yalawiiye kwaajii ya kauwio da kukombolwa ili visekudagamizwa. 21 Naho vintu vyose vyekuumbwavyo vyagojea msi ambayo vindaviungane na wana wa Muungu mwe uhulu mkuu wa kulawa heufe na kubanika. 22 Kwaviya tamanya kuwa adi isasa vintu vyose ekuumbavyo Muungu vyaungumia kwa maumevu na inga usungu wa mvyee avyaae mwana. 23 Naho khivyo vintu ikedu ekuumbavyo Muungu iya hata na swie tekuwao na uyo Muye, ekuwaye wa bosi mwe funge za Muungu, swie tahuma umu mwetu, tikagoja tigosolwe wana wa Muungu, naho kuikomboa na kuhitua mii yetu iwe mihya. 24 Kwaviya tioholwa mwe kauwio idi, akini inga tiona kauwio ido khadidaha kuwa kauwio kwaajii tidiona. 25 Akini takauwiya kintu tesachokuwa nacho, nee mana tagojea kwa uzizimizi.

26 Viyaviya, nae Muye atiambiza he usokezi wetu. Kwaviya khatimanya ikundigwavyo kuvika. Akini Muye mwenye ativikia kwa Muungu kwa kuhuma kwesakokugombekeka 27 Nae Muungu aisunguumanyae mioyo ya wantu, amanya fanyanyi ya uyo Muye, kwaviya uyo Muye awavikia wantu wa Muungu kutongeana na via Muungu akundavyo.

28 Naswi tamanya kuwa mwe mbui zose Muungu agosoa ndima hamwe na wose wamkundisao, kwa kuwekha yekuwayo yedi kwa wada wekwetangwao kwaajii yakwe. 29 Wada Muungu ekuwasaguao kuvokea aho bosi, nee ekuwasaguae wadahe kuiganizwa na Mwanawe, ili mwana uyo awe mvyaigwa wa bosi mwe wana wose wa Muungu. 30 Na wada wekusagulwao ni Muungu nee awo ekuwetangao, na awo ekuwetangao nee awo ekuwatendao wazumiiwe hemeso yakwe, na awo wekuzumiwao hemeso yakwe nee awo ekuwaikiaho kiaga kuwekha ukuu.

31 Tigombeke mbwai kulawana na ayo? Ikawa Muungu yuphande yetu, nndai adahae kuhigana naswi. 32 Muungu khekumuonea mbazi mwanawe wa ikedu iya nee kamlavya ili auye na nyuma kwaajii yetu wose, ivyo viavia endaatekhe vintu vituhu vitana. 33 Nndai endaeawaahiye masa wantu wekusagulwao ni Muungu? Muungu mwenye agombeka khawana masa! 34 Nndai endaeawaamuiye sugusa? Kwaviya Klistu Yesu nee mwekuuya na nyuma, nee uyo mwekuyuyuka na yuuko phande ya kuume wa Muungu. Yee mwenye ativikia! 35 Nndai adahae kutibahuwa na ukundiso wa Klistu? Ivi ni suuba, hambu ni ziki, hambu ni masumizo, hambu ni gumbo, hambu ni sakaza ya magwanda, hambu hatai hambu ni ufe? 36 Inga Maandiko ya Muungu yambavyo,

"Kwaajii yako, wantu wageeza kutikoma kia kisingi,

Wationa inga ngoto wa kudumulwa singo."

37 Akini he mbui izi zose, tipata uvoti mkuu kwa uwambizi wakwe yee ekutikundisae. 38 Kwaviya namanya kwei kuwa khahana kintu kidahacho kutibahuwa na ukundiso wakwe, khio ufe wala ugima, wala wandima wa uwanga wa Muungu hambu udaho wa Ibiisi, wala yalawiiayo isasa, wala yendayoyalawiiye kisingi chezacho wala udaho mtuhu, 39 wala mbui zekuwao si ya uwanga, wala mbui zekuwazo asi muno. Khahana kintu chochose chendacho kidahe kutibahuwa na ukundiso wa Muungu mwe Klistu Yesu Zumbe yetu.