1 Mie nagombeka ukwei, kiungana na Klistu khigombeka uhokho. Udaho wangu wa kusagua yedi hambu mafyaimi ukaongoeewa na Muye wa Muungu waonyesha ni kwei. 2 Kwei mie nina usungu muno na maumevu yesayokusia mwe moyo wangu, 3 Kwaajii ya wayahudi wenzwangu, nee ntayali kubadiwa lazi na kubahulwa na Klistu ikawa kwa kugosoa ivyo nee kuwaambiza wandugu zangu wamzumiiye Klistu. 4 Awo nee wantu wa Isilaeli Muungu ekuwasaguao watende wana wakwe, akawatenda wawe mwe ukuu wakwe, na akagosoa nawo diyagane da kuwekha miko yakwe, uzumizi wa kwei na viaga vyakwe. 5 Wowo niuvyao wa mababa zetu wakuu yaani Ibulahimu na Isaka na Yakobo, na Klistu nee kavyaigwa kiuntu nee kavyaigwa kulawa muango uwo. Muungu agoekeaye vintu vyose, na atogolwe misi zose! Pepa.

6 Khina mana kuwa Muungu nee kavotwa kuiganiza kiaga chakwe kwa Wayahudi. Kwaviya khio wantu wose wa Isilaeli ni wantu wa Muungu. 7 Naho khio wekuvyaigwavyo wose ni wana wa kwei wa Ibulahimu. Iya, inga yambavyo Maandiko, "Vyekuvyaigwavyo vya Ibulahimu vyendavilawane na Isaka." 8 Nee kugombeka, khio wada wekuvyaigwaho kiuntu nee wana wa Muungu, akini ni wada wekuvyaigwao kulawana na kiaga cha Muungu nee wendaowetangwe wana wakwe. 9 Kwaviya kiaga chenye nee kigombeka ivi, "Kisingi chezacho inga iki, nendaniuye, naho Sala endaapate mwana wa kigosi."

10 Naho khio ivyo du, iya nae Lebeka nee kavyaa na tate yetu Isaka wana waidi mapacha. 11 Akini ili Muungu aoneke kuwa asagua akundavyo ata khawazati kuvyaigwa wada wandugu na khuzati kumanya kusagua yedi hambu mafyaimi. 12 Muungu akamwamba Lebeka kuwa yuda mwana wa bosi endaamgosoee ndima yuda mvunawe. Mbui iyo yaonyesha kuwa Mungu amwetanga mntu kutongeana na viya akundavyo yee Muungu na khio kutongeana na mbui za mntu uyo. 13 Inga viya Maandiko ya Muungu yagombekavyo, "Namkundisa muno Yakobo kusima Esau."

14 Naho, tambe mbwai? Ivi Muungu abahuwa wantu? Bue! 15 Kwaviya nee kamwamba Musa, "Nendanimgosoee wedi mntu yuda nikundae kumgosoea wedi na nendanimfiie mbazi mntu yuda nikundaye kumfiiya mbazi." 16 Kwa ivyo, mbui zose zakauwiya mbazi za Muungu na khio kwaviya wantu wakundavyo kugosoa. 17 Kwaviya Maandiko ya Muungu yamwamba Seuta Falao wa Misili, "Nee kakutenda Seuta, ili udaho wangu umanyike, na zina dangu dibiikiwe hohose mwe inusi." 18 Ivyo Muungu umfiiya mbazi mntu yoyose amkundaye kumfiiya mbazi naho inga akakunda amtenda mntu awe na moyo utogao, utenda ivyo.

19 Akini yumwe yenu adaha kuuza, "Ivi, kwa mbwai Muungu ationa tina masa, kwaviya nindai adahae kuhigana na viya Muungu akundavyo?" 20 Akini, wee ni mntu du. Wadaha kumtambaisa Muungu? Ivi, nyungu yadaha kumuuza mgosozi yakwe, "Kwa mbwai kunigosoa ivi?" 21 Mgosozi wa nyungu adaha kuugosoa uongo viya akundavyo na kugosoa nyungu mbii kwa uongo udauda, kimwe kwaajii ya kuikia mahambo na kituhu kwaajii ya kuikia mafusi.

22 Ivyo wantu watuhu waaho inga nyungu zekuwavyo tiyali kudagamizwa na Muungu. Ivyo maya yewekaiya uwanga yao na kuonyesha udaho wakwe, aho akawagoja na kuwazizimiza wada wekukundigwaho kudagamizwa. 23 Akakunda kuonyesha pwii ukuu wakwe kwa wada wakundao kuhokea mbazi zakwe, adaha kugosoa ivyo. 24 Kagosoa ayo kwetu swie ekutetangao, khio kulawa kwa Wayahudi du akini ni hamwe na wantu wesaokuwa Wayahudi. 25 Inga viya Zumbe ekugombekavyo mwe kitabu cha muoni Hosea,

"Wada wantu wekuwao khio wangu

Nendaniwetange ‘wantu wangu’.

Wada wantu ambao khekuwakundisa,

Aho nawetanga wantu wangu."

26 Na hada wekugombekwao, nywie khio wantu wangu

Aho wendawetangwe, "Wana wa Muungu mwenye mgima."

27 Isaya muoni wa Muungu awaiiya wantu wa Isilaeli kugombeka, "Etiho wantu wa Isilaeli ni wangi muno inga msanga wa phwani, akini ni wacheche du wendaowaoholwe." 28 Kwaviya, Zumbe khanaacheewe kuwaamuiiya wantu wa inusi kwakuiganiza. 29 Muoni Isaya ekugombekavyo aho bosi, "Zumbe mwenye udaho wose inga nekhekuwa atiekee wamwe wa wana wa Isilaeli, netiwa inga Sodoma, naho netiwa inga Gomola."

30 Naho tambe mbwai? Wantu wesaokuwa Wayuhudi ambao khawakuondeza wazumiiwe na Mungu, wekhigwa kuzumiwa uko kwa kuzumiiya kwao. 31 Akini wantu wa Isilaeli nee waondeza kuzumiwa hemeso ya Muungu kwa sia ya miko, akini khawakupata. 32 Kwa mbwai? Kwaviya nee wakauwiya mbui zao na khio kumzumiia Klistu. Nee wekungwaa mwe iwe kuu wakagwa, 33 inga yambavyo Maandiko ya Muungu,

"Kauwa, naika iwe mwe Sayuni, nado dendadodiwatende wantu wekungwae,

Iwe kuu dendadodiwatende wantu wagwe.

Akini mntu yoyose endayeamzumiiye khanaagewe soni."