1 Mbuyangu, inga wawaamwiiya watuhu, khudaha katu kwevunia, hata inga wee nindai. Kwaviya, kwa kuwaamwiiya watuhu weamuiiya wee mwenye kwaviya nawe wagosoa mbui idaida. 2 Uwamuiyo wa Muungu ni wa kwei hada alavyaho sugusa kwa wantu wagosoao mbui izo. 3 Akini wee mbuyangu uwaamwiiae wada wagosoao mbui inga izo ati wee mwenye wagosoa ivi wadaha viivihi kuhepa uwamuiyo wa Muungu? 4 Hambu waubea wedi wakwe mkuu na uzizimizi wakwe kwesiho khumanya kuwa wedi wa Muungu wakuongoea kuhituka na kubada mavigaviga. 5 Akini kwaajii ya utogaji wa moyo wako wesaokukunda kubada mavigaviga, na ivyo weikia sugusa kwa msi uda wa maya ya kuamuiiwa kwa kwei ya Muungu yendayo iikwe pwii. 6 Msi uwo Muungu endaamue kia yumwe kutongeana na mbui ekugosoazo. 7 Wada waendeeao kugosoa mbui zedi, waondeza kutunywa muno na Muungu na kupata wekazi wesaokubanika. Nae Muungu endaawekhe ugima wa kae na kae. 8 Akini kwa wada waondezao mbui zao wenye, waemeao kwei ya Muungu na kuzitongea sia zao fyaimi, Muungu endaawakime na endaawaamuiie. 9 Viavia kwendakuwe na masuumizi na maumevu kwa kia mntu agosoaye makwasukwasu. Ayo yendayawapate kuvokea Wayahudi na viavia Wagiiki. 10 Akini Muungu endaawatunye na kuzumiia na kuwekha uivanisi, kwa wantu wose wagosoao yedi, kuvokea Wayahudi na viavia Wesaokuwa Wayahudi. 11 Kwaviya Muungu khana ubahuzi kwa mntu yoyose.

12 Kwaviya wantu wose wagosoao mavigaviga kwesiho kuimanya miko wendawaamwiiwe kwa kutokumanya miko. Na wada waimanyao miko wendawaamuiwe kwa miko. 13 Kwaviya kuitegeeza miko khakuwatenda wantu wawe wenye kuoneka wedi kwa Muungu, wawa wedi hemeso yakwe, hada wagosoaho kia kiagiiwacho na miko. 14 Wantu wesaokuwa Wayahudi ambao khawekumanya miko iyo, akini wagosoao mbui zedi kwa kuongoewa na mioyo yao na mbui izo ni inga viya miko ikundavyo, ivyo wantu awo wagosoa mbui zifaazo. 15 Wowo waonyesha kuwa dia dikundigwado kugosoka viya mwiko ukundavyo diandikwa mwe mioyo yao na udaho wao wa kugosoa yedi hambu mafyaimi waonyesha mbui iyo na mamakhanyi zawo maa nyingi huwaamuiiya na maa tuhu uwavunia, 16 Nee yendavyoiwe msi wa kuamuiiwa, Muungu endaawaamuiiye wantu wa sia ya Yesu Klistu hata kwa mamakhanyi zao za sii na inu nee Mbui Yedi niibikiayo.

17 Akini wee wetangae Myahudi, naho waikauwiya miko na kwevunia kuwa ni mntu wa Muungu, 18 kwa sia ya miko wamanya viya Muungu akundavyo na kuzumiiya yekuwayo yedi, kwaviya kuhinywa na iyo miko, 19 Wee weona kuwa wadaha kuwahinya wantu watuhu kuusu Muungu. Wamamaakhanya kuwa wadaha kuwa inga ung'azi kwa wantu wekuwao he kiza. 20 Wee weona kuwa umhinyi wa wahezi na mhinyi wa wada wesaokuwa na umanyi, kwaviya kulawa he miko isasa una umanyi na kuimanya kwei. 21 Naho, wee wawahinya watuhu, kwa mbwai khwehinya wee mwenye? Wawabiikia watuhu wasekuwa wabavi, akini wee mwenye umbavi. 22 Wamba, "Msekugosoa ukianga, uku wee mwenye wagosoa ukianga, khukundisa vizuu vya miuungu etiho wee mwenye weikia vintu vingi kwa kubawa vintu he nyumba ya miuungu." 23 Wee wevunae kuwa wamanya miko ya Muungu kisingi icho wamdumua Muungu kwa kubananga miko yakwe? 24 Inga via Maandiko Ya Muungu yagombekavyo, "Wantu wesaokuwa wayahudi wabea zina da Muungu kwaajii yenu Wayahudi."

25 Ikawa mwaibasa miko, kugwiswa kwenu kuna mana. Akini mwesahokuitegeeza miko, mwawa inga wantu ambao khamkugwiswa. 26 Inga mntu esaekuwa Myahudi ambae khekugwiswa, akagosoa yada yakundigwayo na miko yakunda, haika endaamamakhanywe kagwiswa? 27 Wantu wesaokuwa Wayahudi wendawakuamwiiye wee Myahudi inga ukahitua miko, etiho unayo maandiko ya miko na kugwiswa, etiho wowo wategeeza miko akini khawekugwiswa. 28 Khio kia mwekuvyaigwa na Myahudi endaawe mntu wa Muungu na wala mntu khadaha kuwa mntu wa Muungu kulawana na kugwiswa kimwii. 29 Iya mntu wa Muungu ni yuda amtegeezae Muungu kwa moyo wakwe wose. Kugwiswa kwa kwei kwagosolwa na Muye wa Muungu mwe moyo na khio kwa kutoza miko yekuandikwayo, mntu inga uyo khahokea ntogoo kulawa kwa wantu iya endaatogolwe na Muungu mwenye.