1 Miye Paolo, mndima wa Yesu Klistu, nekwetangwae ni Muungu kuwa mwaagiiwa naho khisagulwa niwabiikie wantu Mbui Yedi.

2 Mbui inu Yedi nee ekuikiayo kiaga Muungu kwa wantu wakwe kuvokea aho kae kwembokea waoni wakwe wekuiandikayo mwe Maandiko ya Muungu. 3 Mbui Yedi inu yatamwiia mbui za Mwana wa Muungu, Zumbe yetu Yesu klistu uyo mwe untu wakwe, kavyaigwa mwe muwango wa Seuta Daudi, 4 Akini Muye wa Muungu aonyesha kuwa Zumbe yetu Yesu Klistu ni Mwana wa Muungu mwenye ung'azi hada ekumyuyusaho. 5 Kwembokea Yesu Klistu Muungu kanekha udaho kwa kutendwa mwagiiwa ili niwatende wantu mwe sii zose wadahe kumzumiia na kumtegeeza. 6 Nywie nanywi ni wamwe wa wantu awo wa uko Lumi, mwekwetangwao muwe wantu wakwe Yesu Klistu. 7 Naho nawaandikia nywinywi nyose mweuko mzi wa Lumi mwekukundiswao ni Muungu, akawasagua muwe wantu wakwe.

Namuombeza Muungu Tati yetu na Zumbe Yesu Klistu awekheni wedi na uivanisi.

8 Navoka kumtogoa Muungu kwaajii yenu nyose kwembokea Yesu Klistu, kwaviya wantu wose mwe inusi wategeeza kuzumiiya kwenu. 9 Muungu uyo nimgosoeaye ndima kwa moyo wangu wose, kwa kubiikia Mbui Yedi ya Mwanawe, ni mvuhuzi wangu kuwa nawakumbuka mwe maviki yangu, 10 misi yose, namvikia Muungu atamiwaho, anekhe phasi ntana ya kweza kwenu. 11 Kwaviya ninahovu muno kweza kuwavuiiya ili nidahe kuekha funge mwe wekazi wenu wa kimuye ili mtintimae mwe uzumizi. 12 Nawamba kuwa nakunda titintimizane mwe uzumizi tekuwao nao. Uzumizi wenu kwa Muungu unitintimaze miye na uzumizi wangu kwa Muungu uwatintimaze nywie.

13 Wandugu zangu, nakunda mmanye kuwa maa nyingi nee nikakunda kuwavuiiya, akini adi isasa kuna mbui inikindia, ili nidahe kuwatenda wantu wamzumiiye Yesu Klistu gatigati yenu inga viya nekupatavyo gatigati ya wantu wesaokuwa wayahudi. 14 Muungu kaniagiiya kubiikia Mbui Yedi kwa wantu wose, Wageni na wesaokuwa wageni, wenye umanyi na wesaokuwa na umanyi. 15 Nee mana nakunda muno kubiikia Mbui Yedi kwenu nywie mwekaao uko Lumi.

16 Kisingi chose nchekuona soni kubiikia Mbui Yedi, yenye ina udaho wa Muungu uwaohowao wose wazumiiyao, kuvokea Wayahudi na Wagiiki. 17 Kwaviya Mbui Yedi iyonyesha pwii kuwa Muungu awagosoavyo wantu wawe wedi hemeso yakwe kwa sia ya kuzumiiya, kuvokea aho bosi adi kisiikizi. Na inga yekuandikwavyo he Maandiko yakwe, "Mntu yedi agosoaye yedi hemeso ya Muungu endaekae kwa kunizumiiya."

18 Maya khai ya Muungu kulawa uko uwanga kwa Muungu ionyeshwa kwa wantu wose wamuemeao Muungu na wagosoao makwasukwasu watenda kwei yesekumanyika kwa mbui zao fyaimi. 19 Kwaviya, mbui zose zimtendazo Muungu kumanyika ziwa pwii kwao. 20 Kuvokea Muungu ekuumbavyo inusi, udaho wakwe misi yose na uda Uungu wakwe etiho mbui izo khazioneka kwa meso zamanyika pwii. Wantu wadaha kummanya Muungu kwa kukauwa yada ekugosoayo. Ivyo khawana sia yoyose ya kwevunia. 21 Hamwe na kuwa wammanya Muungu, akini khawokumtunya, naho khawekumtogoa. Bada yakwe mamaakhanyi zao ziwa fyaimi na akii zao zigewa kiza na khawekudaha kumanya mbui ya Muungu. 22 Waketenda ni wamanyi, akini wawa ni wahezi, 23 waeka kumvika Muungu ekaae kae na kae, na bada yakwe wavikia vizuu vyekuwavyo msimo wa mntu esaekwekaa kae na kae, na vizuu vya msimo wa wanyama na wadege na wadudu wabuutikao.

24 Ivyo Muungu kawabada wabase khwiina za ufyaimi za mioyo yao na kugosoeyana mbui za soni mwe mii yao. 25 Wakabada kuzumiiya ukwei wa Muungu na kutongea uhokho. Watunya na kuvivika viumbe ekuumbavyo Muungu bada ya kumvika Muungu ekuumbae vintu ivyo. Yee nee akundigwaye kutogolwa kisingi chose. Pepa.

26 Ivyo, kwaviya wantu khawokumtunya Muungu, Muungu nee awabada watongee khwiina zao za soni. Wavyee wakabada kugona na wagosi wao wakagonana wowo kwa wowo. 27 Wagosi nao wakatenda ivyoivyo. Naho wabada kugona na wavyee wao inga ikundigwavyo, nee wavoka kugonana wagosi kwa wagosi. Wagosi wakagosweana mbui za soni. Naho weetea soni inu uwanga yao wenye, wakapata yada wakundigwayo kwa mbui zao fyaimi.

28 Kwaviya wantu waemea kummanya Muungu, Muungu nae akawabada wabase fanyanyi zao za ufyaimi, wakagosoa yada ambayo khawakukundigwa kugosoa. 29 Wantu awo wamema kia mbui ya mbai ya ufyaimi, makwasukwasu na khwiina ya kukunda kia kintu kiwe chakwe na khwiina ya ufyaimi na kinyuu na kukoma wantu na khumbizi na utiizi na mamaakhanyi fyaimi na wenye kugombeka mafyaimi wezwao. 30 Na kuahiyana masa kwa uhokho, wantu wamkimao Muungu, wenye kibui na kuhikuka. Awo waondeza sia ya kugosoa mavigaviga na khawategeeza wavyazi wao, 31 ni wahezi, khawaiganiza viaga vyao na khawana mbazi, naho khawana mbazi kwa wantu watuhu. 32 Etiho, wamanya miagiiyo ya Muungu yamba kuwa wantu wagosoayo ivyo, wakundigwa kuuya na nyuma. Khawagosoa mbui izo du iya wawagea moyo wantu wagosoayo ayo.