1 Tekubuaho vyedi mwe si khavu, tikabukhua kuwa kida kisiwa chetangwa Malita. 2 Wenyezi wa aho newawa wedi muno kwetu na fua ikavoka kunya naho nekuwa na pheho, ivyo ne wagimba moto na kutetanga. 3 Paolo akadodoa kazio kadodo ka khuni nee azigea mwe moto, na kwaajii ya kizuguto cha moto, nee kwaawia mdudu mwe zia khuni akamzengeteza he mkono wa Paolo na kung'ang'ania hada. 4 Wenyezi wa hada wekuonaho mdudu kezengeteza he mkono wa Paolo nee wamba, "Mntu uyu kakoma hetiho khekuuya na nyuma mwe mazimshindo, Muungu amuamuiya isasa kwaajii ya ntendwa zakwe za ufyaimi." 5 Akini Paolo nee amkung'utia mwe moto yuda mdudu naho khakuumizwa hohose. 6 Wada wantu nee wakakauwiya kugombeka ati endaameme, hambu nee kagwa asi na kuuya na nyuma aho. Akini bada ya kugoja mda ulehao, kwesiho koona Paolo kapatwa na mbui yoyose ida, wakahitua mamakhanyo zawo kwakwe na kugombeka, yee ni muungu!

7 Hehi na hantu hada nekuwa na minda ya Pubilio, mkuu wa kisiwa kiya. Pubilio katihokea kimbuya na kuwa wageni wakwe kwa misi mitatu. 8 Tati yakwe Pubilio nee ni mtamu mwe usazi, kawa ahuma bom bom khai na kuhala phome, Paolo nee engia gati kwakwe, akavika na kuika mikono uwanga yakwe na kumhonya. 9 Kuawana na mbui iyo, watamu wose mwe kisiwa kiya nee weza na kuhonywa. 10 Wakatekha ntunyo nyingi, naho tekuwaho tavoka ntambo nee wagea mwe meli vintu vingi tekuwavyo tavikunda.

11 Yekwembokayo miongo mitatu, tikatamba kwa meli yekulawayo Alekizandilia, yetangwayo miungu pasa. Meli iyo nee igea kigomogomo he kisiwa kisingi chose cha pheho. 12 Tikabua mwe mzi wa Silakusa, nee tekaa aho kwa misi mitatu. 13 Kulawa uko tikavoka ntambo na kubua mwe mzi wa Legio. Wekwembokaho msi umwe khusi ikavoka kutoa kulawa kusini, naho yekwembokaho misi miidi tikabua mwe mzi wa Potioli. 14 Uko tikawabwiiya wandugu wekumzumiao Klistu, ambaho watiombeza tekae nao kwa misi mfungate. Neivyo tikabua mzi wa Lumi. 15 Wazumizi wa kuda mwe mzi wa Lumi wekupatao mbui zetu, wamwe wao nee weza kutihokea hantu ha guwio da Apio na watuhu he nyumba tatu za wageni, Paolo ekuwaonaho, akamtogoa Muungu na kupata nguvu.

16 Tekubuaho mwe mzi wa Lumi, Paolo akaekwa kwekaa ikedu hamwe na asikai yumwe wa kumuinda.

17 Yekwembokaho misi mitatu Paolo akawetanga wakuu wa Kiyahudi wa hantu aho weze wakintane, Paolo ne awamba, "Waisilaeli wezwangu miye hetiho khekugosoa chochose kifyaimu wala kuhigana na mazweeya ya wadaa wetu, wakanigwia kuda mwe mzi wa Yelusalemu na kunekhiiza kwa Walumi. 18 Wekuniuzaho na koona khina masa yoyose yakundigwayo nikomwe, Walumi wakakunda kuniekewe. 19 Akini Wayahudi watuhu wekuemeaho nesekuekewa, nchekumanya cha kugosoa nikaombeza masa yangu yakategeezwe kwa Kaisali Seuta mkuu wa Lumi. 20 Kwaajii iyo khiombeza kukintana na kugombeka nanywi, kwaviya khizongomezwa minyololo inu kwaajii ya kauwio da wantu wa Isilaeli."

21 Wowo wakamwamba, "Swie khatikuhokea bauwa yoyose kuawa Yudea, naho khahana ndugu yoyose mwekubuae aha na kugombeka mbui yoyose kuusu wee. 22 Akini takunda tikutegeeze kia ambacho wee wakizumiiya, kwaajii tamanya kuwa kizumwezumwe iki chatamwiiwa mbui za ufyaimi kia hantu."

23 Aho, wakapanga msi wa kukintana nae, naho wantu wangi wakabua uko ekuwaho akekaa. Kuvokea keo adi guoni Paolo akawamba na kuwasosoea mbui za Useuta wa Muungu, akawageeza kuwatenda wazumiie mbui ya Yesu kuawa mwe miko ya Musa na maandiko ya waoni wa Muungu. 24 Wamwe wa wantu wakazumiia mbui zakwe, akini watuhu khawekuzumiiya. 25 Ivyo khawekwevana nao wekuwaho wakahauka, Paolo akagombeka, "Muye wa Muungu nee kagombeka ukwei na wadaa wetu, kwembokea kwa muoni wa Muungu Isaya! 26 Akagombeka,

‘Hita ukawambe wantu awa,

Kutegeeza mwendamtegeeze akini khamnammanye,

Kukauwa mwendamkauwe, akini khamnamwone,

27 Kwaviya mioyo ya wantu awa yatoga,

Na magutwi yao ndii,

Naho wagubika meso yao,

Ili wesekweza koona kwa meso yao,

Na kutegeeza kwa magutwi yao,

Na kumanya mwe mioyo yao

Na kuhituka agombeka Zumbe

Nami nee nikawahonya.’"

28 Paolo akagombeka, "Aho manyeni kuwa mbui ya Muungu ya uohozi yegalwa kwa wantu wesao kuwa Wayahudi, wowo wendawategeeze!" 29 Paolo ekubindaho kugombeka ayo, Wayahudi wakaawa uku wahigana wowo kwa wowo.

30 Kwa myaka miidi Paolo akekaa uko mwe nyumba yakwe mwenye ekuwayo kakodi, nee awahokea wose wekuitaho kumuugusa. 31 Nekawa akabiikia Useuta wa Muungu na kuhinya mbui za Zumbe Yesu Klistu kwa utintimavu kwesiho vikindio vyovyose.