1 Sauli nae nee yuaho, akoona mbui ya kukomwa Sitefano nsawa.

Misi iyoiyo zumwezumwe da wantu wekumzumiao Klistu wa mzi wa Yelusalemu dikavoka kusuumizwa muno, wantu wamzumiao Klistu wose kwesiho waagiiwa, nee waambazika kwe mzi wa Yudea na Samalia. 2 Wantu wamtegeezao Muungu nee wamgea Sitefano mwe mbia na kumgosoea bwaimbo kuu.

3 Kisingi ichoicho, Sauli nee ageeza kudagamiza zumwezumwe da wantu wekumzumiao Klistu. Akaita kia kaya, akawalavya chongoi wantu wekumzumiao Klistu, wagosi kwa wavyee, na kuwagea mwe geeza.

4 Wantu wada wekweambazikao, wakabiikia Mbui Yedi kia hantu wekuitako. 5 Filipo akaita mwe mzi wa Samalia na kubiikia wantu Mbui Yedi ya Klistu. 6 Zumwezumwe da wantu wekumtegeezaho Filipo na koona vihii ekugosoavyo, wose wakategeeza vitana kwa yada agombekayo. 7 Mazaiko nee yakawaawa wantu wangi, uku watoa vuzo na wangi wekuhooawo na wekuviao miundi wakahonywa. 8 Ivyo wantu wa mzi uda wakawa na nyemi muno.

9 Kuwa na mgosi yumwe etangwae Simoni ambae nee kagosoa usawi kwa kisingi kilehacho mwe mzi uwo, akawahondomaza wantu wose wa mzi wa Samalia. Naho nee aketutumua kuwa yee ni mntu mkuu, 10 wantu wose wadodo kwa wakuu wakamtegeeza na kutozwa na umako wakamba, "Yee nee udaho wa Muungu umanyikanao inga ‘Udaho Mkuu.’ " 11 Wantu newawa wakamtegeeza kwaajii misi mingi nekawa akawahondomaza kwa ndima zakwe za usawi. 12 Akini wantu wekuzumiao Mbui Yedi ya Useuta wa Muungu na Mbui ya Yesu Klistu ekuwabiikiao Filipo, wose wakabatizwa wavyee kwa wagosi. 13 Simoni nae akazumiiya na kubatiizwa, akatongeana na Filipo kia hantu na akahondomazwa na vihii na ntangio ekuzionazo.

14 Aho waagiiwa wekuwao mwe mzi wa Yelusalemu wekutegeezaho kuwa wantu wa Samalia wazumia Mbui ya Muungu, wakawaagiiya Petulo na Yohana waite uko. 15 Wekubuaho wakawavikia wada wantu wekumzumiao Klistu wahokee Muye wa Muungu. 16 Kwaviya Muye wa Muungu nee khazati kweza kwa yoyose gatigati yao, iya wabatiizwa du kwa zina da Zumbe Yesu. 17 Naho Petulo na Yohana wakawaikia mikono yao na kuwavikia, wakahokea Muye wa Muungu.

18 Simoni ekuonaho kuwa wazumizi wahokea Muye wa Muungu kwa kuikiwa mikono na waagiiwa. Akakunda kuwekha hea Petulo na Yohana, 19 akagombeka, "Nekhani na miye udaho unu, ili mntu yoyose nendae nimuikie mikono ahokee Muye wa Muungu."

20 Akini Petulo akamtambaisa, "Wee na hea yako dagamieni hae, kwaviya wamamakhanya udaho wa Muungu wagulwa kwa hea! 21 Wee khauho hamwe na swie mwe ndima inu kwaajii moyo wako ni mfyaimi hemeso ya Muungu. 22 Kwaivyo mhitukie Zumbe, na kueka ufyaimi wako, nae endaakuekee mamakhanyo zekuwazo mwe moyo wako. 23 Naona kumema kinyuu nawe kwekaiwa na mavigaviga."

24 Nee Simoni akawatambaisa Petulo na Yohana, "Nivikieni kwa Zumbe, desekunilawia dodose kwa yada mwekugombekayo."

25 Petulo na Yohana wekubindaho kuwamba wantu ni viivihi wammanyavyo Yesu na kubiikia Mbui ya Muungu, wakauya mwe mzi wa Yelusalemu, wakabiikia Mbui Yedi kwe mizi mingi ya Samalia.

26 Msi umwe mndima wa uwanga kwa Zumbe akamwamba Filipo, "Hita phande ya kusini kwembokea sia ida ya kiwawe iseeayo Yelusalemu kuita Gaza." 27 Aho Filipo akavoka ntambo, akiwa siai ne akintana na mntu yumwe Mwesiopia bunyenge, mntu uyo nekawa mgookezi wa vintu vyose vya Kandake seuta wa kivyee wa Esiopia, nekawa kaita Yelusalemu kumvikia Muungu. 28 Nae ekuwaho siai kuuya kaya ne kekaa mwe gai dakwe, akasoma kitabu cha muoni wa Muungu Isaya. 29 Muye wa Muungu akamwamba Filipo, "Hita kwe dia gai wekae hehi nado." 30 Ndiho Filipo akaguukia dia gai na kumtegeeza yuda mntu asoma kitabu cha muoni Isaya. Filipo akamuuza, "Uwo wamanya ayo usomayo?"

31 Yuda mkuu akatambaisa, "Nendanimanye vivihi nikesekupata mntu wa kunimanyisa?" Nee amwamba Filipo akwee mwe gai na kwekaa hamwe nae. 32 Hantu ha Maandiko ya Muungu ambaho nee akasoma mntu uyo nee inu,

"Inga ngoto egalwae kudumulwa singo,

Inga viya mwanangoto amogwae mazoya,

Esavyokudaha kugombeka mbui yoyose.

33 Kagewa soni na kuongoewa.

Nndai adahae kutamwiiza uvyazi wakwe?

Kwaviya ugima wakwe uusigwa mwe inusi."

34 Bunyenge akamuuza Filipo, "Nigombeke muoni uyu wa Muungu agombeka kwa mbui za ndai, mbui zakwe mwenye hambu za mntu mtuhu?" 35 Aho, Filipo akavoka na hantu aho mwe Maandiko ya Muungu kumtamwiiza Mbui Yedi ya Yesu. 36 Wekuwaho waendeea na ntambo yao wakabua hantu hekuwaho na mazi, mkuu yuda akamwamba Filipo, "Aha hana mazi, kintu chani chendacho kinikindie nesekubatizwa?"Mntu abatiiza 37 Filipo akamwamba, "Wadaha kubatizwa inga ukazumiiya kwa moyo wako wose." Yuda bunyenge akatambaisa, "Namzumiiya Yesu Klistu ni Mwana wa Muungu."

38 Akakunda gai digooswe, nee Filipo hamwe na yuda bunyenge wakaseeya mwe mazi, naho Filipo akambatiiza. 39 Naho wekuwao walawa mwe mazi, Muye wa Zumbe ukamdoa Filipo. Naho yuda bunyenge khekumwona vituhu, akini akaendeea na ntambo yakwe uku kamema kinyemi. 40 Filipo akabwiiya yu mwe mzi wa Azoto, akemboka mwe mizi yose akibiikia Mbui Yedi adi Kaisalia.