1 Yekwembokaho misi mitatu Fesito akabua Kaisalia akadoa ugookezi uhya, akakwea na kuita Yelusalemu. 2 Uko Waviki wakuu hamwe na wagookezi wa Kiyahudi nee waita hemeso ya Fesito na wakamuahia masa Paolo vituhu. 3 Wakamuombeza Fesito wagosoee inga wakundavyo amwete Paolo mwe mzi wa Yelusalemu nee wabawana kae njama ili wamkome siai. 4 Akini Fesito akatambaisa, "Paolo endaasigae mwe kifungo uko mwe mzi wa Kaisalia na miye ni hehi kuita uko. 5 Wabadeni wagookezi wenu waite uko kaisalia hamwe na miye wakaavye masa kuusu yee, inga kagosoa dodose da ufyaimu."

6 Fesito akekaa nao kwa mda wa misi kumi dimwe nee auya mwe mzi wa Kaisalia, kioi dakwe akaita he mkonga akakunda Paolo aetwe mda ndani. 7 Paolo ekubuaho, Wayahudi wekulawao mwe mzi wa Yelusalemu wakamuikia bunga, wakavoka kuavya masa makuu ambayo khawokudaha koonyesha kuwa ni kwei. 8 Aho Paolo evunia kwa kugombeka, "Mie nchekugosoa masa yoyose mafyaimi mwe miko ya Wayahudi wala he Nyumba ya Muungu wala kuhigana na seuta Mkuu wa Lumi."

9 Fesito akakunda awatamize Wayahudi na ivyo akamuuza Paolo, "Wee wakunda uite mwe mzi wa Yelusalemu na uko ukaamuiwe hemeso yangu kwa masa aya?"

10 Paolo akatambaisa, akamba, "Nagooka hemeso ya muamua wa miko ambae kaikwa na seuta mkuu wa Lumi, ahaaha nee nikundigwaho kuamuiwa kwa miko, khahana dodose nekubanangado kwa Wayahudi inga wee mwenye umanyavyo vitana. 11 Ati khigosoa masa yoyose nikundigwayo niuye na nyuma, ni tayali kuuya na nyuma, akini inga masa yekuetwayo ni Wayahudi kuusu miye khio ya kwei, khahana yoyose endaeanekhize kwao. Naombeza niite nikategeezwe kwa seuta mkuu wa Lumi."

12 Fesito ekubindaho kutamwiiya na waambiza wakwe, akamwamba Paolo, "Kuombeza kutegeezwa kwa seuta mkuu wa Lumi, naho wenda uite kwa Mkuu wa Lumi."

13 Misi micheche yekwembokaho seuta Agilipa na Belinike wakabua mwe mzi wa Kaisalia, ili kumwekha ntunyo Fesito mkuu wa Lumi. 14 Wawa uko misi micheche nae Fesito akamwamba seuta masa ya Paolo, "Hana mntu yumwe hanu ambae Felikisi kambada mwe kifungo. 15 Nekuitaho mzi wa Yelusalemu waviki wakuu na wadaa wa Wayahudi wakamkoea masa na kunikunda nimwamuie. 16 Akini miye nikawatambaisa, kuwa khio mazweeya ya Walumi kumlavya mntu asuumizwe kisingi wekumkweao masa khawazati kukintana meso kwa meso na ekukoewae masa na kwekhigwa phasi ya kwevunia masa ayo. 17 Naho wekubuaho hanu nchekucheewa kugosoa chekao hakuamuia kioi yakwe, nikakunda mntu uyu aetwe aha. 18 Wamasa wakwe wakagooka akini khawekuwa na mbui yoyose ya kumuahia masa inga nekuavyo nikakauwia. 19 Iya newawa na mahigano macheche hamwe nae kuusu dini yao na kuusu mntu yumwe etangwae Yesu ambae kauya na nyuma kae akini Paolo atozeeza kuwa yu mgima. 20 Nchekumanya dakugosoa kuusu mbui iyo, ivyo nee namuuza Paolo inga akunda kuita kuda mwe mzi wa Yelusalemu akaamuiwe kwaajii ya masa ekukoewayo. 21 Akini Paolo akaombeza akategeezwe na seuta mkuu wa Lumi, ivyo nikambada awe mwe kifungo adi nendaho nimwegae kwa Mkuu wa Lumi."

22 Nee Agilipa akamwamba Fesito, "Naonda kumtegeeza mntu uyo miye mwenye."

Fesito akamtambaisa, "Wenda umtegeeze kioi."

23 Ivyo kioi yakwe Agilipa na Belinike wakabua kwa nyemi mwe buha da mikuntano uku watongeana na wakuu wa maasikai na wagookezi wa mzi, Fesito akaagiiya Paolo aetwe mda ndani ya buha. 24 Fesito ne amba, "Seuta Agilipa na wose mweaha hanu hamwe na swie! Hanu hemeso yenu yuuko mntu ambae Wayahudi wose hanu na kuda mwe mzi wa Yelusalemu wakamng'ung'uzikia kwa kutoa vuzo kuwa akundigwa akomwe." 25 Akini miye nchekuona inga kagosoa dodose dimkundado akomwe, akini kwaviya Paolo mwenye nee akakunda kuamuiwa na seuta mkuu wa Lumi nikaamua kumwegaa uko kwa seuta wa lumi. 26 Mie khina mbui yoyose kwakwe ambayo nee khiiandika kwa Seuta wetu Mkuu, nee maana khimueta hanu hemeso yenu na hemeso yako Seuta Agilipa, ili tikabinda kumsungumanya nidahe kupata kintu cha kuandika. 27 Kwaviya namamakhanya khio vitana kumwegaa mntu kwa Mkuu wa Lumi kwesiho kugombeka masa ekuwayo nayo.