1 Paolo akabua mzi wa Delibe na Lusitila ambaho ne akekaa mhina yumwe mwetangwae Timoseo. Mami yakwe nekawa Myahudi mwekumzumia Klistu, akini tati yakwe nekawa Mgiiki. 2 Timoseo nekawa na ntunyo khuu gatigati ya wada wantu wamzumiao Klistu wa Lusitila na Ikonio. 3 Paolo nee kakunda Timoseo atongeane nae mwe ntambo kwa ivyo akamgwisa, katenda ivyo kwaajii Wayahudi wose wekwekaao hantu hao nee wakamanya tati yakwe Timoseo nee ni Mgiiki. 4 Wekuwaho wemboka gatigati ya ida mizi wakawekha wantu wamzumiao Klistu ida miagiyo yekuavigwayo na waagiiwa wa Yesu na wadaa wa zumwezumwe da wantu wamzumiao Klistu wa kuda Yelusalemu wakawamba waitozeeze. 5 Ivyo zumwezumwe da wada wantu wamzumiao Klistu wakaendeea kuwa watintimavu mwe uzumizi na wakagenyea kia msi.

6 Paolo hamwe na weziwe wakatamba adi mzi wa Filigia na Galatia uku waemezwa na Muye wa Muungu wasekubiikia Mbui ya Muungu uko Asia. 7 Wekubuaho mwe mihaka ya Misia, wakageeza kwengia mwe mzi wa Bisinia, akini Muye wa Yesu khawekukunda kutenda ivyo. 8 Naho wakemboka Misia wakaita adi Toloa. 9 Kio icho, Muungu akamuonyesha Paolo kintu, kamwona mntu yumwe wa Makedonia kagooka hada kumwombeza, "Dumua weze Makedonia utiambize!" 10 Naho Paolo ekubindaho koona kiya kintu ekuonyweshwacho ni Muungu, tikavoka kuita Makedonia kwesiho kucheewa, uku tamanya Muungu katetanga tiwabiikie Mbui Yedi wantu wa uko.

11 Tikaawa Toloa tikatamba kwa ngaawa adi Samosileki na kioi yakwe tikabua Neapoli. 12 Kuawa uko tikaita adi Filipi mzi wa Makedonia, ni mzi mkuu mwe si ida hantu ambaho Walumi nee wakagookea, tikekaa mwe mzi uwo misi micheche. 13 Msi wa Kuhumwiiza tikalawa chongoi ya mzi, tikaita khandakhanda ya zigizigi da mazi, netiwa na makauwio ya koona hantu ambaho wantu wamvikia Muungu. Tikekaa tikatamwiia na wavyee wekukintanaho hantu aho. 14 Yumwe wa wada wekutitegeezao, nekawa mvyee yumwe mumzumiiya Muungu etangwae Lidia mwenyezi wa Tiatila, nekawa mta biashaa ya nguo za langi ya zambalau. Zumbe kauvugua moyo wakwe hata akazihokea zia mbui Paolo ekuwazo atamwiiya. 15 Lidia na wanduguze wekubatizwao, akatigoneka akamba, "Ati muona kuwa miye namzumiiya Zumbe kaibuni kaya hangu mkekae." Akatushuutiza tiite.

16 Msi umwe tekuwaho taita hantu ha kuvika, mndee yumwe mwekuwa na zaiko da udaho wa kuagua tikakintana nae. Mndee uyo nekawa akawaambiza wakuu wakwe wapate hea nyingi kwa uganga wakwe. 17 Naho uyo mndee akambasa Paolo na Sila akatoa vuzo na kugombeka, "Awa wantu ni wandima wa Muungu Mwe uko Uwanga Muno, wawabiikia mbui za uohozi!" 18 Akawa agosoa ivyo kwa misi mingi hata msi umwe Paolo akakimwa akamhitukia na kudamba ido zaiko, "Nakuagiiya kwa zina da Yesu Klistu muawe mntu uyu!" Ahoaho ido zaiko dikamlawa. 19 Wakuu wa yuda mndee wekumanyaho wamwaza kae mwekuwaambiza wapate mai, wakawagwia Paolo na Sila, wakawabuuta adi kwa waamua wa mzi. 20 Wekuwabuzaho hemeso ya waamua wakawakoea masa wakamba, "Wantu awa ni Wayahudi na wagosoa khumbizi mwe mzi wetu. 21 Watihinya mazweeya ambayo yahigana na Miko yetu swie wantu wa Lumi, naho khatidaha kuzihokea wala kuzizumiiya." 22 Zumwezumwe da wantu dikawa hamwe wakamsangia Paolo na Sila.

Na wada waamuiia wakawatatuwia magwanda yao na kuwagiia Paolo na Sila watoigwe ngoda. 23 Wekubindaho kuwatoa muno wakawagea mwe geeza na wakaagiia semgoja wa geeza awe meso nao. 24 Kuawana na miagiiyo iyo, uyo semgoja akawaika gati mwe geeza na kuwazengeteza sigi za miundi mwe magogo.Wantu waidi wekuzengetwao sigi za miundi mwemagogo

25 Hehi na kio kikuu Paolo na Sila wakawa wavika na kuimba mawiya ya kumtogoa Muungu uku wafungwa watuhu wawategeeza. 26 Vuu puu, kukaawiia uzingizo mkuu wa alizi ambao usingisa misingi ya geeza. Ahoaho nyuvi zose zikavuguka na minyololo wekuzongomezwayo kia yumwe ikavuguka. 27 Mgoji wa geeza akenuka na kukauwa nyuvi za geeza zivugulwa, akamamakhanya kuwa wafungwa wose wanyiika na ivyo akasoomoa paange dakwe, akaonda kwekoma. 28 Akini Paolo akakema kwa mgutio mkuu, "Usekwekoma mwenye kwaviya swie wose tihanu!"

29 Mgoji wa geeza akakunda taa zietwe, akaguukia mda ndani, aketambika he miundi ya Paolo na Sila uku akakama kwa ukeng'enta. 30 Naho akawalavya chongoi akawauza, "Wakuu nitende viivihi nidahe kuoholwa?"

31 Wowo wakamtambaisa, "Mzumiie Zumbe Yesu, nawe wendauoholwe hamwe na wanduguzo wose." 32 Aho wakambiikia mbui ya Zumbe yee na wantu wose wekuwamo mwe nyumba yakwe. 33 Saa idaida ya kio yuda mgoji akawadoa, akawasunta vionda vyao, naho yee na wanduguze wakabatizwa ahoaho. 34 Wekubindaho akawadoa Paolo na Sila kuwegaa kaya kwakwe akawekha khande, yee na wanduguze wose wakagosoa kinyemi kwaviya isasa wamzumiia Muungu.

35 Kioi yakwe keokeo, wada waamua wakawaagiiya wakuu wa maasikai na kuwamba, "Wavugueni wada wantu, waite."

36 Yuda mgoji wa geeza akamwamba Paolo mbui inu, "Waamua waagiiya wantu, mvuguiwe isasa mwadaha kuawa na kuita kwenu kwa utuivu."

37 Akini Paolo akatambaisa, "Etiho khatekukoa masa yoyose, watitoa ngoda hewazo na swie tiwantu wa Lumi. Naho wakatigea mwe geeza na isasa waonda wativuguie kwa sii? Khaidahikana kuwa ivyo! Yakudigwa awo wenye weze hanu wativuguie."

38 Awo maasikai wakawegaia mbui iyo kwa wada waamua na wekusikiaho kuwa Paolo na Sila ni wantu wa Lumi wakaogoha. 39 Ivyo wakawabasa wakawahembeeza, wakawalavya geezani na kuwakunda walawe mwe mzi uda. 40 Paolo na Sila wakalawa geezani, wakaita kaya kwa Lidia. Uko wakakintana na wandugu wekuzumiao na kuwamba mbui za kuwagea moyo, wakahauka.