1 Yekwembokaho misi mishano, Anania mviki mkuu nee abua mwe mzi wa Kaisalia na wamwe wa wadaa na mhinyi yumwe wa miko etangwae Tetulo, nee wamtimia mkuu wa si etangwae Filisiki wakamwamba masa yao kuusu Paolo. 2 Paolo ekwetangwaho na Tetulo akavoka kugombeka.

"Mkuu Felikisi, tiwa na nyemi kwekaisa kwa utuivu kwa misi mingi mwe ugookezi wako na mbui ntuhu yekukundigwayo kugosoa kwaajii ya si yetu. 3 Tahokea mbui inu kwa nyemi misi yose na kulavya ntogoo kwako hantu hohose na kwa sia yoyose. 4 Akini nesekweza kukusokeza muno, nakuhembeeza utitegeeze mbui yetu njihi. 5 Tibukhua ati mntu uyu ni wa hatai muno, yee avoka khumbizi gatigati ya Wayahudi wose mwe inusi ngima ni mgookezi wa Wanazaleti. 6 Nee akakunda kuigosoa Nyumba ya Muungu isekuwa inga Muungu yetu akundavyo, nee swie tikamgwia. 7 Akini Lusia mkuu wa maasikai akatezea na kutihoka kwa nguvu mntu uyo kuawa kwetu, 8 inga ukamuuza mntu uyu, wee mwenye wadaha kumanya masa yose tekuyaetayo kwako." 9 Wayahudi wakevana na masa ayo wakagombeka yose ayo ni ya kwei.

10 Mkuu Filikisi nee amwekha Paolo utangio agombeke, Paolo nee amba.

"Namanya wee kuwa nee muamua mwe si inu kwa myaka mingi, ivyo nina kinyemi kugombeka hemeso yako. 11 Wadaha kugombeka zemboka misi kumi dimwe na mbii, kuvokea hada nekuitaho mzi wa Yelusalemu kuvika." 12 Wamasa wangu khawekunibwiia nikatambaisana na mntu yoyose, wala khawekunibwiia nikabibiza wantu he Nyumba ya Muungu, wala mwe Nyumba za kuvikia Wayahudi, wala hantu hatuhu hohose mwe mzi uwo. 13 Naho khawadaha kuonyesha masa yao kwangu ati ni ya kwei. 14 Kintu nizumiacho hemeso yako ni kugombeka, miye namvikia Muungu wa wadaa wetu kwa kutongea sia ida ambaho wowo wayetanga ni uhokho, Akini nazumiiya mbui zose zekuandikwazo mwe vitabu vya miko ya Musa, hamwe na waoni wa Muungu. 15 Mie nina makauwio kwa Muungu, na wowo wanamakauwio ya kugombeka wantu wedi na wafyaimu wendawayuyuke. 16 Kwaivyo nagosoa kia nidahacho misi yose kuwa na moyo wesao kuwa na kasoo hemeso ya Muungu na wantu.

17 "Bada ya kwekaa hae na mzi wa Yelusalemu kwa misi mingi, nikauya Yelusalemu kuwegaia wandugu zangu uwambizi na kulavya ntambiko." 18 Kisingi nekuwaho nikagosoa ayo nee wanibwiiya he Nyumba ya Muungu, naho nikawa khibindiiza kae kugosoa mviko wa kwesunta khahekuwa na zumwezumwe da wantu wala khumbizi yoyose. 19 Akini nekuwa na wamwe wa Wayahudi kulawa mwe si ya Asia, awo nee wakundigwao kuwa aha hemeso yako na kugombeka masa yao kwa miye. 20 Hambu waeke wantu awa weaha wagombeke masa wekuyaonayo kwangu nekugookaho hemeso ya wantu wa mkonga wao mkuu, 21 Akini mbui inu nee nikugombekayo nekugookaho hemeso yao, "Kuwa miye naamuiwa hemeso yako ivyeo kwaviya nazumiiya kuwa wekuuyao na nyuma wendawayuyuswe."

22 Aho Felikisi yuda ekuwae amanya vitana sia ida ya Zumbe Yesu nee awamba, "Nendaniamuie masa ayo aho endaho abue aha Lusia, mkuu wa maasikai." 23 Naho Felikisi akamwagiiya asikai amuike Paolo mwe kifungo, akini amuwekee kidodo ili awabade wambuya wakwe wamuambize.

24 Yekwembokaho misi micheche, Felikisi nee abua hamwe na mkaziwe Dulusila, uyo nee ni Myahudi. Akaagiiya Paolo eze, nee amtegeeza agombekavyo mbui za kumzumiia Yesu Klistu. 25 Akini Paolo ekuvokaho kugombeka mbui ya wedi, mbui ya kuwa na kihimo na mbui ya msi wa kuamuiwa wezaho, Felikisi akaogoha nee amwamba, "Ekaeka isasa wadaha kuita, nendanekwetange vituhu nendaho nipate phasi." 26 Kisingi ichoicho Felikisi nee akakauwiya kuwa Paolo enda amwekhe hea, kwaajii iyo nee akamwetanga Paolo maa kwa maa na kutamwiana nae.

27 Yekwembokaho myaka miidi Pokio Fesito nekawa mkuu wa Lumi hantu ha Felikisi. Kwaajii nee kakunda kwetamiza kwa Wayahudi, nee amsigaza Paolo mwe kifungo.