1 Seuta Agilipa akamwamba Paolo, "Khikwekha uhusa ya kugombeka." Aho Paolo akawekha wantu utangio kwa mkono wakwe na kuvoka kwevunia.

2 "Seuta Agilipa! Neona inga ni mwenye ebae ya kugombeka hemeso yako kulawana na masa yose ambayo Wayahudi wekugombekayo kuusu miye, 3 kwaviya wee mwenye wamanya vitana mazweeya ya Wayahudi hamwe na mbui zao, ivyo nakuombeza unitegeeze kwa kuzizimiza.

4 "Wayahudi wamanya kwekaisa kwangu kuvokea udodo wangu, nekuwavyo aho bosi mwe si yangu na uko mwe mzi wa Yelusalemu. 5 Wanimanya muno kwa kisingi kilehacho na wadaha kunigombekea inga wakakunda, kuwa kuvokea aho bosi nchekaisa inga yumwe wa kizumwezumwe cha Mafalisayo welavyao muno kutongea miko ya Muungu. 6 Naamuiwa masa ivyeo kwaajii ya kauwio dangu mwe kia ambacho Muungu kawaikia kiaga baba zetu, 7 Iki ni kiaga ambacho mbai kumi dimwe na mbii wakauwia kuhokea wamvikiaho Muungu kwa bidii kio na musi, na kwaajii ya kukauwia uko Seuta yangu, niaha khikoewa masa na Wayahudi. 8 Kwambwai nywie mwaona kuwa Muungu khadaha kuwayuyusa wekuuyao na nyuma?

9 "Miye mwenye nee khizumiia kuwa khikundigwa kugosoa yoyose yada kuhigana na zina da Yesu wa mzi wa Nazaleti. 10 Mbui izo nee nikugosoazo uko Yelusalemu, miye mwenye khiwa nchekhigwa udaho kuawa kwa waviki wakuu, nee nikawengiza mwe kifungo wangi wa wantu wa Muungu na wekuamuiwao kukomwa, miye nikazumiia wakomwe. 11 Maa nyingi khiwatenda wasuumizwe mwe Nyumba za kuvikia Wayahudi zekuwazo hantu mbaimbai, nikawashuutiza waemee uzumizi wao. Maya yangu kwao nee ni khuu muno hata nikawaondeza adi mizi ya hae.

12 "Msi umwe nekuwaho mwe mwenga ya ntambo ya kuita Damesiki nikawa chekhigwa udaho na miagiiyo kulawa kwa waviki wakuu. 13 Eeeh Seuta nekuwaho siai, saa mtandatu wa musi, nee nikaona ung'azi mkuu kusima ung'azi wa zua kuawa uwanga kwa Muungu, nee wanimuika phande zose, miye na wantambo wezwangu. 14 Swie wose nee tagwa asi, miye nikategeeza mgutio kwa mbai ya Kiebulania, ‘Sauli, Sauli, kwambwai wanisuumiza? Wesuumiza buwe inga ng'ombe ekutoae tekhe ngoda ya zumbe yakwe.’ 15 Miye nikauza, ‘Nindai wee Zumbe?’ Nae akanitambaisa, ‘Miye Yesu unisuumizae. 16 Hata ivyo gooka, khikuawiya ili nikutende mndima yangu, na wendauwambe wantu watuhu mbui wekuonazo ivyeo na yada ambayo nendanikuonyeshe. 17 Nenda nikuohoe kulawa kwa Wayahudi wezio na wantu wesao kuwa Wayahudi ambao nendanikuagiiye kwao. 18 Wendauwamanyise na kuwadahiza kulawa mwe kiza na kuwengiza mwe ung'azi, walawe kwe udaho wa ibiisi wamhitukie Muungu, ili kwa kuzumiiya kwao wadahe kuekewa mavigaviga yao na kuhokea hantu hao gatigati ya wada wekusagulwao kuwa wantu wa Muungu.’

19 "Ivyo Seuta Agilipa nchekubada kutegeeza mbui ambazo Muungu nee kanionyesha kulawa uwanga kwa Muungu. 20 Ne navoka mwe mzi wa Damesiki, na mzi wa Yelusalemu, naho nikabua Uyahudi yose na kwa wantu wesao kuwa Wayahudi nikawabiikia waeke mavigaviga na kumhitukia Muungu na kumanyisa kwa ntendwa zao kuwa wahituka kwei. 21 Kwaajii iyo Wayahudi wakanigwia he Nyumba ya Muungu na kugeeza kunikoma. 22 Akini Muungu kaniambiza adi msi wa ivyeo khigooka kwa kutintimaa nikagombeka kwa wose wakuu na wadodo yada nekuyaonayo. Nigombekayo ni yada yekutamwiwayo na waoni wa Muungu na Musa kuwa yendayalawie, 23 kuwa ikundigwa Klistu asuumizwe na kutenda wa bosi kuyuyuka kulawa kwa wekuuyao na nyuma, na kugombeka mbui za uohozi kwa Wayahudi na wesao kuwa Wayahudi."

24 Paolo ekuwaho aendeea kugombeka, Fesito akagombeka kwa mgutio mkuu, "Paolo una kiyau! Kusoma kwako kwakugea kiyau!"

25 Akini Paolo akatambaisa, "Zumbe yangu, miye khio mkiyau, kiya nigombekacho ni ukwei haika. 26 Seuta Agilipa wayamanya aya, kwa ivyo nadaha kugombeka kwesiho kuogoha hemeso yako. Khina maatu kugombeka mbui izi, kwaviya mbui izi zamanyika kwako khazikugosoka kwa sii. 27 Seuta Agilipa wawazumia waoni wa Muungu? Namanya wawazumia!"

28 Agilipa akamtambaisa Paolo, "Kwa kisingi iki kijihi wamamakhanya kuwa wendaudahe kunibibiiza kunitenda Mklistu?"

29 Paolo nee amtambaisa, "Namuombeza Muungu kuwa iwe kwa mda mjihi au ulehao, khio wewedu iya wose wanitegeezao ivyeo wadahe kuwa inga neivyo miye, akini kwesiho minyololo inu!"

30 Aho Seuta Agilipa hamwe na Mkuu wa si na Belinike na wantu watuhu wose wakagooka, 31 Wekulawaho, nee waambizana, "Mntu uyu khekugosoa dodose dimtendado akomwe au agewe mwe kifungo." 32 Agilipa akamwamba Fesito, "Mntu uyu nee ikadahika kuekewa inga khekuomba masa yakwe yakategeezwe na Kaisali Seuta mkuu wa Lumi."