1 Tekubindaho kuagana nao tikakwea ngaawa tikaita mwenga kwa mwenga adi mwe mzi wa Kosi, kioi yakwe tikabua mwe mzi wa Lode na kulawa uko tikaita mwe mzi wa Patala. 2 Uko tikabwiia meli yekuwayo yaita mwe mzi wa Foinike, ivyo tikakwea na kutamba. 3 Tekuonaho kisiwa cha Kipulo tikakibada phande ya kumoso, tikatamba adi mwe mzi wa Silia hada tikaseeya mwe mzi wa Tilo, kwaviya uko nee ngaawa yetu yenda iseeze mizigo yekuwayo ndani yakwe. 4 Uko tikawabwiiya wazumizi tikekaa hamwe kwa mda wa misi mfungate, kwa udaho wa Muye wa Muungu, wakamwamba Paolo asekuita mwe mzi wa Yelusalemu. 5 Akini mda wetu wekusiaho tikahauka, wavyee na wana wao wose hamwe wakategaa adi chongoi ya mzi, tekubuaho phwani wose tikakinta mavindi tikamvikia Muungu. 6 Tekubindaho tikaagana, swie tikakwea ngaawa wowo wakauya koo kaya.

7 Swie tikaendeea na ntambo yetu kwa ngaawa kulawa mzi wa Tilo tikabua mwe mzi wa Tolemaisi ambaho tiwaugusa wantu wekumzumiao Klistu, tikekaa nao msi umwe. 8 Kioi yakwe tikahauka tikaita mwe mzi wa Kaisalia, uko tikabua kwa mbiikizi Filipo, yee ne yumwe aho ya wada mfungate wekusagulwao kuda mwe mzi wa Yelusalemu. 9 Nekawa na wana kivyee wane ambao newana na viwaa, ambao wose newawa wakagombeka mbui ambazo Muungu endaagosoe. 10 Bada ya kwekaa misi micheche, muoni yumwe etangwae Agabo akabua kulawa si ya Yudea. 11 Akatezea akadoa mkwiji wa Paolo akezongomeza mikono na miundi nee amba, "Muye wa Muungu agombeka ivi, Wayahudi kuda mzi wa Yelusalemu wenda wamzongomeze kwa namna inu mntu mwenye mkwiji unu na kumgea kwa wantu wesao kuwa Wayahudi."

12 Tekutegeezaho ayo, swie na wada wantu watuhu wekuwao aho tikamhembeeza Paolo asekuita mwe mzi wa Yelusalemu. 13 Akini Paolo akatambaisa, "Kwambwai mwaiya na kunivuza nyuma? Mie nitayali khio du kugewa mwe kifungo, iya hata kuuya na nyuma mwe mzi wa Yelusalemu kwaajii ya zina da Zumbe Yesu."

14 Tekuvotwaho kumhembeeza ili asekuita tikambada tikamba, "Akundavyo Zumbe na vigosoke."

15 Bada ya kwekaa hada kwa mda, tikafunganya mafuushi yetu na kuhauka kuita mwe mzi wa Yelusalemu. 16 Wamwe wa wada wahina wa Kaisalia wakahauka hamwe na swie wakategaa kaya kwa mntu etangwae Mnasoni ambae tiita kwekaa nae kwa mda, Mnasoni nekawa mwenyezi wa mzi wa Kipulo naho nekawa mzumizi wa kuvokea aho kae.

17 Tekubuaho mwe mzi wa Yelusalemu wandugu wamzumiao Klistu wakatihokea kwa nyemi. 18 Kioi dakwe Paolo akaita hamwe na swie, kumvuia Yakobo na wadaa wose wa zumwezumwe da wantu wamzumiao Klistu nee waaho. 19 Tekubindaho kuwaugusa, Paolo akawamba mbui mwenga bada ya tuhu mwe yada ekugosoayo Muungu gatigati ya wantu wesao kuwa Wayahudi kwembokea undima wakwe. 20 Wekuyategeezaho ayo wakamtogoa Muungu, naho wakamwamba Paolo, "Ndugu wadaha kukauwa mazumwezumwe ya maelufu ya Wayahudi ambao isasa wawa kae wazumizi na wose awo utozeeza miko ya Musa kwa uiganizi. 21 Nee wategeeza kuwa wahinya Wayahudi wose ambao wekaa mwe si ambayo khio ya Wayahudi kuwa wasekupatiiza miko ya Musa, ukawahinya kuwa wasekuwagwisa wana wao vituhu naho wasekubasa mazweeya yetu ya Kiyahudi. 22 Isasa titende viivihi? Kwaani wendawamanye kuwa kubua kae Yelusalemu. 23 Gosoa inga tambavyo, hanu tina wantu wane ambao waika ninda kwa Muungu. 24 Kuwa hamwe na wantu awo mwe nyemi yao ya mviko wakwesunta, ukaihe vikundigwavyo naho wamogwe fii zao. Ivyo wantu wose wendawamanye mbui zia wekwembigwazo kuusu weye, khazina mana yoyose na kuwa wee mwenye wekaa kwa kutongea miagio ya Musa. 25 Kuusu wada wantu wesao kuwa Wayahudi ambaho wawa kae wazumizi wa klistu, tiwaandikia bauwa tawamba kuwa khawakundigwa kuda khande yoyose yekulavigwayo mviko kwa miuungu, wala wasekudomea phome na wasekuda nyama yekuhohotolwayo na wasekugosoa ukianga."

26 Ndiho Paolo akawadoa wada wagosi wane na msi wa kaidi akesunta hamwe nao, akengiya he Nyumba ya Muungu akaambaza mbui yakugenyeza misi ya kwesunta na malavyo yendayo yalavigwe kwa kia yumwe.

27 Misi mfungate yekuwaho hehi na kusia, Wayahudi wekuwaho wakalawa mwe mzi mkuu wa Asia wakamwona Paolo he Nyumba ya Muungu wakabibiiza zumwezumwe dose da wantu wamgwiie. 28 Wakatoa vuzo, "Wantu wa Isilaeli mtiambize uyu nee yuda mntu awahinyae wantu kia hantu mbui ihiganayo na wantu wa Isilaeli, yahigana nayo na miko ya Musa na hantu hanu hang'azi hata isasa kawengiza wantu wesao kuwa Wayahudi he Nyumba ya Muungu na kuhagea usama hantu aha hang'azi!" 29 Wamba ivyo kwaajii nee wamwona Tolofimo mwenyezi wa mzi wa Efeso akenda hamwe na Paolo mwe mzi, wakamamakhanya kuwa Paolo nee kamwengiza he Nyumba ya Muungu.

30 Mzi wose ukamema khumbizi wantu wakeza kulawa phande zose wakamgwiiya Paolo, wakambuutiza wakamlavya chongoi ya Nyumba ya Muungu na ahoaho nyuvi za buha da Nyumba ya Muungu zikavugalwa. 31 Kisingi wantu awo wekuwaho wakakunda kumkoma Paolo, mbui iyo ikambwiiya mkuu wa asikali wa kilumi kuwa mzi wose wa Yelusalemu umema khumbizi. 32 Ahoaho mkuu wa maasikai akawadoa wagookezi wa asikai akadengiiya dia zumwezumwe da wantu na wekumuonaho mkuu wa maasikai na asikai wakaeka kumtoa Paolo. 33 Mkuu wa maasikai akamtimia Paolo akamgwia na kuagiia azongomezwe minyololo miidi, naho nee awauza, "Ni mntu yani uyu na katenda mbwai?" 34 Watuhu mwe zumwezumwe dia wakatoa vuzo wakamba ivi na watuhu ivi, naho yuda muongoezi ekuonaho khadaha kupata ukwei wa mbui iyo, kwaajii ya dia vuzo, akaagiiya Paolo egalwe mwe khambi ya maasikai. 35 Paolo ekubuaho he ngazi, asikai wada wakamwenua kwaajii nekuwa na khumbizi muno. 36 Dia zumwezumwe da wantu wakamtimia na kutoa vuzo, "Mkome, mkomeni uyo!"

37 Asikai wekuwaho wamwengiza Paolo mwe khambi yao, Paolo akamwombeza mkuu wa maasikai akamba, "Nadaha kukwamba mbui?"

Yuda mkuu wa maasikai akamtambaisa, "Wee wadaha kugombeka Kigiiki?" 38 "Wee kwani khio yuda Mmisili ambae ivi mazuzi nee kavoka khumbizi na kuwaongweeya mabagaa elufu nne wenye maguha adi he kiwawe?"

39 Paolo akatambaisa, "Mie ni Myahudi mvyaigwa wa mzi wa Taso uko Kilikia, miye ni mntu wa mzi umanyikanao. Nakuombeza nieke nitamwiie na wantu awa."

40 Yuda mkuu wa maasikai akamwetikia, ivyo Paolo akagooka he ngazi akawahungia mkono wada wantu na wekutwiaho akavoka kutamwiiya nao kwa mbai ya Kiebulania.