1 Wamwe wao mwe zumwezumwe da wantu wekumzumiao Klistu wa mzi wa Antiokia nekuwa na waoni wa Muungu na wahinyi ambao ni Balinaba na Simoni zina tuhu Mchuta na Lukio ekulawae Kilene na Manaeni ambae kaeewa hamwe na Seuta Helode na Sauli. 2 Wekuwaho wakavika kwa Zumbe na kwehiniza kuda, Muye wa Muungu akamba, "Waikeni visivu Balinaba na Sauli kwaajii ya ndima ida nekuwetangiayo."

3 Wekubindaho kuvika na kwehiniza kuda, wakawaikia mikono na kuwakundia pheho zedi waite.

4 Balinaba na Sauli wekubindaho kuagiiwa na Muye wa Muungu, wakaseeya adi Seleukia na kutamba na ngaawa mwe mazimshindo mwe kisiwa cha Kipulo. 5 Wekubuaho mwe mzi wa Salama wakabiikia Mbui ya Muungu mwe Nyumba ya kuvikia Wayahudi, naho Yohana ambae zina dakwe tuhu ne aketangwa Maliko nekawa mwambizi yao.

6 Wakatamba mwe si yose ya kipulo, wakabua mwe mzi umwe wetangwao Pafo. Uko nee wambwiiya Myahudi yumwe msawi muoni wa uhokho zina dakwe Baliyesu. 7 Mntu uyo nekawa muambizi wa Seligino Paolo mkuu wa kida kisiwa, nekawa mntu mwenye akii muno. Saligio Paolo nee awetanga Balinaba na Sauli kwakwe, kwaajii ne akakunda kutegeeza Mbui ya Muungu. 8 Akini Baliyesu msawi ambae zina dakwe kwa kigiiki nee aketagwa Elima, akageeza kuhigana na Balinaba na Sauli ili kumkindia uyo Mkuu wa kisiwa asekweza akazumiiya mahinyo yao kuusu Yesu. 9 Aho Sauli ekwetangwae Paolo akawa kamema Muye wa Muungu, wakamfuia meso yuda msawi, 10 akamwamba, "Wee mwana Ibilisi, wee ni mmasa wa mbui zose za kwei hemeso ya Muungu! Kumema mbui zose za uhokho na unyanyi wa kuwatiiya watuhu. Khueka kuzihitua sia za Zumbe zekuwazo saasawa."

11 Udaho wa Zumbe wendaukwekhe sugusa, wendauwe tuntu, khunaudione zua kwa mda mjihi. Vuupuu kia kintu ne chatenda inga khungugu na kiza kwakwe, akavoka kuita uko na uko akaonda mntu amtoze mkono wamuongoee. 12 Naho mkuu wa kisiwa ekuonaho ayo nee amzumia Zumbe akahituka, kwaajii nee kahondomazwa muno na mahinyo ya Zumbe.

13 Naho Paolo na weziwe wakakwea ngaawa kuawa Pafo na kubua Peliga mwe mzi wa Pamfilia, akini Yohana etangwae Maliko akawabada uko na kuuya Yelusalemu. 14 Akini wowo wakaendeea na ntambo kuawa Peliga, wakabua mwe mzi wa Antiokio ya Pisidia. Mwe Msi wa Kuhumwiiza wakengia mwe Nyumba ya kuvikia Wayahudi wakekaa. 15 Wekubindaho kusoma kitabu cha miko ya Musa na Maandiko ya waoni wa Muungu, wakuu wa ida Nyumba ya kuvikia Wayahudi wakawamba mbui inu, "Wandugu inga mnayo mbui yoyose ya kuwagombeka wantu ya kuwagea moyo, gombekani." 16 Nee Paolo agooka akawahungia mkono wanyamae akawamba.

"Enywi waisilaeli wezwangu na ninywi mwesaokuwa Wayahudi ambao mwamtegeeza Muungu mnitegeeze! 17 Muungu wa wantu waisilaeli nee kawasagua baba zetu, akawatenda wawe wantu wangi, wekuwaho wakekaa si yesayo kuwa yao uko Misili, kuawa aho Muungu akawalavya uko kwa udaho wakwe mkuu, 18 kawazizimiza kwa mda wa myaka makumi mane wekuwaho kuda kwe kiwawe. 19 Akawadagamiza wantu wa si mfungate wekuwaho wakekaa si ya Kanaani, akawekha wantu wakwe wa Isilaeli ida si iwe mai yao. 20 Mbui izo zose zigosoka kwa myaka mia nne na makumi mashano.

"Yekwembokaho ayo Muungu akawekha waamua wawaongoee adi kisingi cha Samweli muoni wa Muungu. 21 Naho Wekuombezao wawe na Seuta yao, Muungu akawekha Sauli mwana Kishi wa mbai ya Benjamini akawa seuta yao kwa myaka makumi mane. 22 Kisingi Muungu ekumlavyaho Sauli, Muungu akamsagua Daudi kuwa seuta yao. Muungu akamkundisa Daudi na akagombeka, ‘Khimwona Daudi mwana Yese ni mntu anitamiae mwe moyo wangu, nee endaeagosoe yose nikundayo ayagosoe.’ 23 Kuawana na uvyaigwa wakwe Daudi, Muungu kawaetea wantu wa si ya Isilaeli mwohozi Yesu inga ekuikavyo kiaga. 24 Kisingi Yesu khazati kuvoka ndima yakwe, Yohana akamuongoeya akawabiikia wantu wose wa si ya Isilaeli, kuwa yakudigwa wabade mavigaviga na kubatiizwa. 25 Yohana ekuwaho hehi na kubindiiza ndima yakwe akawamba wantu, ‘Mwamamakhanya miye nndai? Mie khio yuda mumkauwiae, akini tegeezani yee eza bada yangu na miye khifaa hata kuchopoa sigi za sabana zakwe.’

26 "Wandugu zangu Waisilaeli nywie wavyaigwa wa Iblahimu na wantu wose weaha mumvikiao Muungu mbui izi za uohozi zietwa kwajii yetu! 27 Kwaviya wantu wa mzi wa Yelusalemu na wakuu wao khawekumanya kuwa yee nee mwohozi, naho khawekumanya mbui ya waoni wa Muungu wekuzisomazo kwa kia Msi wa Kuhumwiiza. Nee ivyo wakazigosoa mbui za waoni wa Muungu zigenyee kwa kumwekha sugusa ya ufe. 28 Etiho khawekuona masa yoyose yekumtendayo akomwe, iya wakamwombeza Pilato awekhe wamkome. 29 Wekubindao kugosoa yose yekugondwayo kuusu Yesu, wakamseeza he mhamba wakamwika mwe mbia. 30 Akini Muungu akamyuyusa, 31 naho kwa misi mingi, akawalawiiya wada wekutongeana nae kulawa mzi wa Galilaya adi mzi wa Yelusalemu. Awo nee wekuonao na kuwamba wantu wa Isilaeli yada wekuyaonayo. 32 Swie tiwezea hanu kuwaetea Mbui Yedi, mbui ida ambayo Muungu ekuwaikiyao kiaga baba zetu. 33 Akini isasa aiganiza kwetu swie wana wao, kwa kumyuyusa Yesu inga yekuandikwavyo mwe kitabu cha Zabui ya kaidi

‘Wee u mwanangu,

Ivyeo miye khitenda tati yako.’

34 Kwaviya Muungu ne kamyuyusa Yesu, asekuvunda katu, Muungu akagombeka ivi,

‘Nendanikwekhe majaiwa yangu ya kwei,

Nikumwiikiayo kiaga Daudi.’

35 Naho mwe hantu hatuhu he Zabui agombeka,

‘Khunaumbade mndima wako mng'azi avunde.’

36 Akini Daudi mwenye kagosoa yada yose ekukundayo Muungu kwa wantu wa kivyazi chakwe, nee auya na nyuma na kugewa mwe mbia hehi na wadaa wakwe na mwii wakwe ukavunda. 37 Akini yuda ambae Muungu kamyuyusa, khekuvunda. 38 Wandugu zangu Waisilaeli nakunda mmanye kuwa kwembokea uyu Yesu mbui za kuekewa mavigaviga zabiikiwa kwenu, 39 na kia mntu endaeamzumiie endaaekewe mavigaviga yakwe yose. Mbui iyo khaidahikana kwa sia ya miko. 40 Naho ekaani hae yasekweza kuawiia yada yekugombekwayo na waoni wa Muungu. 41 Kauwani, ‘Nywie wabezi hondomaani na muuye na nyuma!

Kwaviya nendachonigosoe ivyeo,

Ni kintu ambacho khamnamkizumie

Hata mntu akawatamwiiza!’ "

42 Paolo na Balinaba wekuwaho walawa mwe ida Nyumba ya kuvikia Wayahudi, wada wantu wakawagoneka weze vituhu Msi wa Kuhumwiiza utongeao, watamwiie kuusu mbui iyo. 43 Wantu wekuhaukao, Wayahudi wangi na wantu watuhu wekuwao wazumizi wa dini ya Kiyahudi, wakawabasa Paolo na Balinaba. Awo waagiiwa wa Yesu wakatamwiiya nao wakawagea moyo, waendee kwekaa mwe wedi wa Muungu.

44 Msi wa Kuhumwiiza wekutongeao wantu wose wa mzi uda wakeza kutegeeza mbui ya Zumbe. 45 Akini Wayahudi wekudionaho ido zumwezumwe kuu da wantu wakawa na kinyuu, wakahigana na kia ekutamwiiacho Paolo na kumdumua. 46 Akini Paolo na Balinaba wakawatambaisa kwa utintimavu muno na wakawagombeka, "Nee ikundigwa tivoke kugombeka mbui ya Muungu kwenu, kwaviya muiemea na kweona khamfaa ugima wa kae na kae, kwaivyo tawabada taita kwa wantu wesao kuwa Wayahudi. 47 Kwaajii iyo Zumbe katiagiiya ivi,

‘Khiwatenda nywie muwe ung'azi kwa wantu wesao kuwa Wayahudi,

Ili wantu wose mwe inusi waoholwe.’ "

48 Wantu wesao kuwa Wayahudi wekutegeezaho mbui iyo wakatamiwa na wakaitogoa mbui ya Zumbe na wada wose wekuwao wasagulwa kwekhigwa ugima wa kae na kae wakazumiia.

49 Mbui ya Zumbe ikaambazika kia hantu mwe mzi uda. 50 Akini Wayahudi wakawabibiiza wavyee wenye ntunyo ambao khio Wayahudi ambao nee wamzumiia Muungu na wakuu wa mzi uwo, wakawabibiiza wantu wawasumiize Paolo na Balinaba, naho wakawaguusa na kuwalavya mwe si yao. 51 Paolo na Balinaba wakakung'uta sanga yekuwayo mwe miundi yao inga hinyo kwa wantu wa mzi uwo, nee waita Ikonio. 52 Akini awo Wahina wa Yesu wa Antiokio wakawa na nyemi naho wakaongoewa na Muye wa Muungu.