1 Kisingi kiakia, Seuta Helode akavoka kuwasuumiza wamwe wa wamzumiao Klistu. 2 Akamkoma kwa paange Yakobo nduguye da Yohana. 3 Ekuonaho ekugosoavyo viwatamia Wayahudi, akaendeea akamgwiiya Petulo. Mbui iyo igosoka kisingi cha sikukhuu ya mabumunda yesayo kugewa hamila. 4 Ekubindaho kugwiwa, akamwiika Petulo mwe geeza, akaikwa asi ya vizumwezumwe vine vya asikai na kia kizumwezumwe nekiwa na asikai wane wamwiinde. Helode nee akakunda kumlavya kwa wantu wamkome bada ya sikukhuu ya Pasaka. 5 Na Petulo ekuwaho mwe geeza, wantu wekumzumiao Klistu newawa wakamvikia Muungu kwa moyo wose.

6 Kio kia, kabla ya msi uda ambaho Helode nee kamwekhiiza kwa wantu, Petulo nekawa kagona gatigati ya asikai waidi uku kazongotezwa minyololo miidi na wagoji newawa wakainda uvi wa geeza. 7 Ahoaho mndima wa uwanga kwa Muungu akagooka hehi nae na mweenge ukang'aa mwe kia chumba cha geeza. Mndima wa uwanga kwa Muungu akamsingisa mwe ubavu akamwenua na kumwamba, "Enuka kinyio!" Ahoaho minyololo yekuwayo he mikono yakwe ikadumka na kugwa asi. 8 Mndima wa uwanga kwa Muungu akamwamba, "Efunge mkanda wako, vaa sabana zako." Petulo akagosoa ivyo. Naho mndima wa uwanga kwa Muungu akamwamba, "Efunge gwanda dako na unibase." 9 Petulo akambasa akalawa chongoi ya geeza, akini khekumanya kuwa mbui izo zekuwazo zagosolwa ni mndima wa uwanga kwa Muungu neziwa za kwei, akamamakhanya kuwa Muungu amuonyesha kintu. 10 Petulo na yuda mndima wa uwanga kwa Muungu wakemboka kwa maasikali ambao newawa wainda uvi wa bosi na wakaidi, wakabua he uvi wa chuma wa kuawa geezani kwengia mwe mzi, uvi uwo nee uvuguka wenye wakalawa chongoi. Wekuwao wenda he sia mwenga, ahoaho yuda mndima wa uwanga kwa Muungu akambada Petulo ikedu.

11 Aho ndiho Petulo ekumanyaho yekumlawiiayo, akagombeka, "Isasa namanya kwa kwei Zumbe kamwagiia mndima yakwe akaniohoa kuawa kwa Helode na kwa yada yose Wayahudi wekukundayo kunigosoeya."

12 Ekumanyaho ivyo akaita mwenga kwa mwenga adi kaya kwa Maliamu mami yakwe da Yohana ambae zina dakwe tuhu etangwa Maliko. Umo wantu wangi wakintana na newawa wakavika. 13 Petulo akakonta uvi wa chongoi na mndima yumwe wa kindee etangwae Loda, akaita kwe uvi kwetikia. 14 Uyo mndee ekutangaho mgutio ni wa Petulo akawa na nyemi muno, naho akauya kwesiho kuvugua uda uvi akaguukia mda ndani na kuwamba weziwe kuwa Petulo kagooka aho chongoi he uvi. 15 Wakamwamba yuda mndee, "Wee una kiyau!" Akini yee akamba ni kwei viya. Naho wakamwamba, "Uyo ni mndima wakwe kulawa uwanga kwa Muungu."

16 Kisingi icho Petulo nekawa akaendeea kukonta, nee wamvuguia uvi newamuona wakahondomaa. 17 Petulo akawanyooshea mkono wakwe wanyamae, ne atamwiiya ni viivihi Zumbe ekumlavyavyo mwe geeza. Naho akawamba, "Mmwambe mbui iyo Yakobo na wada wazumizi watuhu nee alawa hada na kuita hantu hatuhu."

18 Kwekuchaho kukaawiia maatumaatu makuu kwa wada asikai kuusu Petulo. 19 Helode akakunda aondezwe, akini khawokudaha kumuona. Ivyo akakunda wada asikai wauzwe, wakabinda wakomwe.

Nee Helode akalawa uko mzi wa Galilaya akaita mzi wa Kaisalia ambaho kekaa.

20 Naho seuta helode akakimwa muno na wantu wa mzi wa Tilo na Sidoni, ndiho wantu wa mizi iyo wakakintana hamwe kuita kumoona. Wakamsongeeza Blasito ambae nekawa mntu wa hehi wa seuta na mwekugookea vintu vya seuta awe hamwe nao, wakaita kwa seuta kuombeza kuwa kuwe na utuivu kwaajii wantu wa mizi iyo newawa wakategemea khande kulawa mwe si yakwe.

21 Msi umwe wekusagulwaho, Helode akawa kavaa nguo za kiseuta na kwekaa mwe kigoda cha useuta, akatamwiiya na wantu. 22 Wada wantu wakamtoea vuzo wakamba, "Unu ni mgutio wa Muungu khio wa mntu!" 23 Ahoaho mndima wa uwanga kwa Muungu akamgwisa, Helode asi kwaajii khekumwekha Muungu ntogoo izo. Akaigwa ni wadudu, akauya na nyuma.

24 Mbui ya Muungu ikaendeea kugenyea na kuambazika.

25 Balinaba na Sauli wekubindaho kugosoa ndima yao wakauya mwe mzi wa Yelusalemu wakamdoa Yohana kwa zina tuhu etangwa Maliko.