1 Ekubindaho ayo Paolo akahauka Asene akaita Kolinto. 2 Uko akakintana na Myahudi yumwe etangwae Akula mwenyezi wa Ponto, hamwe na mkaziwe etangwae Pilisila keza kulawa Italia misi idaida kwaajii Kaisalia Kilaudio nekawa akawakunda Wayahudi wose wahauke Lumi. Paolo nee kaita kuwavuia, 3 nae kwaviya ne ni fundi wa kushona matwea inga wao, Paolo akekaa akagosoa ndima hamwe nao. 4 Kia Msi wa Kuhumwiiza, Paolo nekawa akatambaisana nao mwe Nyumba ya kuvikia Wayahudi, akageeza kuwabibiiza Wayahudi na Wagiiki.

5 Sila na Timoseo wekubuaho kulawa si ya Makedonia, Paolo nekawa akatumia kisingi chakwe chose kubiikia na kuwamba Wayahudi kuwa Yesu nee Klistu. 6 Akini Wayahudi wakavoka kuhigana na kumdumua Paolo, yee akakung'uta nguo zakwe na kuwamba, "Mkaga ni mbwii yenu wenye miye khina masa yoyose kuusu mbui inu. Na kuvokea isasa nendaniite kwa wantu wesao kuwa Wayahudi." 7 Naho akahauka aho na kuita kwekaa kwa mntu yumwe mwesekuwa Myahudi etangwae Tito Yusito mwekuwa akamzumiiya Muungu na kaya yakwe neiwa ihehi na Nyumba ya kuvikia Wayahudi. 8 Kilisipo mkuu wa Nyumba ya kuvikia Wayahudi, akamzumiiya Zumbe hamwe na wanduguze wose, naho Wakolinto wangi wekutegeezaho mbui iyo wakamzumiiya Yesu na kubatizwa.

9 Msi umwe na kio Paolo akaonyeshwa kintu na Zumbe akamwamba, "Usekuogoha endeea kubiikia, naho usekunyamaa, 10 kwaviya miye ni hamwe nawe khahana mntu endae adahe kukuumiza, kwaviya hanu he mzi hana wantu wangi wa phande yangu." 11 Naho Paolo akekaa uko akahinya mbui ya Muungu gatigati yao kwa kisingi cha mwaka umwe na unusu.

12 Kisingi icho Galio nekawa mkuu wa hantu ha Akaya, Wayahudi wekuwao uko wakamgwiiya Paolo kwa hamwe na kumwegaa he mkonga. 13 Wakamba, "Mntu uyu ageeza kuwabibiiza wantu wamvikie Muungu kwa sia yesayokukundigwa he miko!"

14 Kisingi Paolo khazati kutamwiiya, Galio akawamba Wayahudi, "Tegeezani nywie Wayahudi, inga nee mumhaia masa mntu uyu kwaajii ya ubanasi au kwaajii ya ufyaimi nee nikakundigwa kuwategeeza. 15 Akini inga ni mbui ya kuhigana kuusu mazina na miko yenu amueni nywie wenye, miye khikunda kuwa muamua wa mbui iyo!" 16 Aho akawaguusa kulawa he mkonga. 17 Naho wose wakamgwia Sositenesi, mgookezi wa Nyumba ya kuvikia Wayahudi, wakamtoa chongoi ya hada ekuamuiwao masa. Akini Galio khekupatiiza mbui iyo hata kidodo.

18 Paolo akaendeea kwekaa na wada wazumizi wa Kolinto kwa misi mingi, naho akahauka akakwea ngaawa na kuita Silia hamwe na Pilisila na Akula. Uko Kenikela Paolo akamoga fii zakwe kwaajii ya kuiganiza ninda yakwe. 19 Wakabua Efeso, aho Paolo akawabada Pilisila na Akula, akaita mwe Nyumba ya kuvikia Wayahudi neawa akatambaisana na Wayahudi. 20 Wakamhembeeza ekae nao kwa mda ulehao akini khekukunda. 21 Iya ekuwaho ahauka akamba, "Muungu akakunda nendaneze aha henu vituhu." Nee ahauka kwa ngaawa kuawa Efeso.

22 Ekubuwaho Kaisalia, Paolo akaita Yelusalemu kuwaugusa zumwezumwe da wantu wamzumiiao Klistu, ekubindaho aho akaita Antiokia. 23 Akekaa uko kisingi kijihi nee akaendee na ntambo kwa kwembokea mzi wa Galatia na Filigia na kuwagea moyo wahina wose.

24 Myahudi yumwe etangwae Apolo mvyaigwa wa Alekizandilia, akabua Efeso. Kawa mntu mwenye kutamwiiya na mwenye umanyi mkuu wa Maandiko ya Muungu. 25 Nekawa kahinywa sia ya Zumbe, nae nekawa akahinya na kubiikia kwa utintimavu na kwakwei mbui za Yesu, etiho nekawa akamanyadu ubatizo Yohana ikedu. 26 Pilisila na Akula wekumtegeezaho akatamwiiya kwa utintimavu mda ndani ya Nyumba ya kuvikia Wayahudi. Wakamdoa na kumhinya iyo sia ya Muungu kwa utana muno. 27 Naho Apolo ekuamuaho kuita hantu ha Akaya wada wantu wekumzumiao Klistu wakamwambiza kwa kuwagondea bauwa wazumizi wa hantu ha Akaya wamhokee. Ekubuaho uko nekawa muambizi kwa wantu ambao kulawana na wedi wa Muungu ne wamzumia Klistu. 28 Kwaviya kwa mbui zakwe zenye ukwei nee awavota Wayahudi mwe mahigano ya hewazo kwa kweonyesha mwe Maandiko ya Muungu kuwa Yesu nee Klistu.