1 Ida khumbizi ya kuda Efeso yekubindaho kutuiya, Paolo akawetanga hamwe wada wahina akawagea moyo, nee aagana nao akatamba na kuita Makedonia. 2 Akatamba mwe si ida, akabiikia wantu mbui nyingi za kuwagea moyo, nee abua Ugiiki. 3 Uko kekaa kwa miongo mitatu ekuwaho yu hehi kuvoka ntambo ya kuita Silia kwa sia ya mazimshindo, akabukhua kuwa Wayahudi newawa wakunda kumgosoea ufyaimi ivyo akaamua kuuya kwembokea sia ya Makedonia. 4 Sopatolo mwana Pihilo kulawa mzi wa Belea, akatongeana nae viyaviya Alistaliko hamwe na Sekudo kulawa mzi wa Sesalonike, Gayo kulawa mzi wa Debe, Tikiko na Tolofimo kulawa mzi wa Asia hamwe na Timoseo. 5 Wantu awo wationgoweeya na kutigoja kuda Toloa. 6 Yekwembokaho sikukhuu ya mabumunda yesayo kugewa hamila tikatamba kulawa mzi wa Ufilipi na yekwembokaho misi mishano tikawa hamwe nao mzi wa Toloa. Uko tikekaa misi mfungate.

7 Msi wa bosi wa juma tikakintana hamwe kwaajii ya kubandua bumunda kwaviya Paolo nee akakunda kuhauka kioi yakwe, akaendeea kutamwiiya na wantu adi kio kikuu. 8 Nekuwa na taa nyingi muno umo gati, tekuwamo mwe goofa. 9 Mbwanga yumwe etangwae Eutiko nee kekaa hediisha kisingi Paolo ekuwaho aendeea kubiikia. Eutiko akavoka kusikha phahoe nee agona, akagwa asi kulawa he goofa ya ntatu, wekumdodoaho hai kauya kae na nyuma. 10 Akini Paolo akaseeya asi, akegoneza na kwenyoosha uwanga ya yuda mbwanga, akamuumbatia na kugombeka, "Msekuwa na maatu, ake mgima!" 11 Naho akakwea vituhu kwe goofa na akada khande, akaendeea kubiikia kwa kisingi kilehacho adi keo da mtungaihu, ekubindaho akahauka. 12 Wada wantu wakamvuza yuda mbwanga adi kaya kwakwe naho yu mgima, mioyo yao ikatuia muno.

13 Tikakwea ngaawa tikaongoa na kuita mzi wa Aso ambako nee timdoa Paolo. Yee nekawa kagosoa ivyo kwaajii nee akaita uko kwa miundi. 14 Nee atibwiiya kuda Aso, tikamkweza mwe ngaawa tikaita Mitulene. 15 Kulawa uko tikatamba adi kioi dakwe tikabua mzi wa Kio, misi ya kaidi tikagooka mzi wa Samo na kioi dakwe tikabua mzi wa Mileto. 16 Paolo nee akakunda aendeee na ntambo kwa ngaawa naho asekwembokea mzi wa Efeso asekucheewa muno uko mzi wa Asia. Kwaajii sikukhuu ya Pentekoste nee ihehi ivyo akakunda kuita kinyio mwe mzi wa Yelusalemu.

17 Kulawa mwe mzi wa Mileto Paolo akawagiiya wantu kwa wadaa wa wazumizi wa Klistu wa Efeso wakintane nae. 18 Wekubuaho hakwe akawamba, "Mwamanya nee kwekaavyo misi yose na nywie kuvokea msi uda wa bosi nekubuaho mwe mzi wa Asia. 19 Mwamanya nekuwavyo namgosweea ndima Zumbe kwa uzizimizi mwingi na mesozi na mbui yekunipatayo kuawana na nteganyi ya Wayahudi. 20 Mwamanya miye nchekuemea hata maa mwenga kuwabiikia hewazo na mwe nyumba zenu na kuwahinya yose ambayo yendayawaambize. 21 Khiwahaza Wayahudi wose na wantu wesao kuwa Wayahudi wamhitukie Muungu na kumzumia Zumbe Yesu. 22 Muye wa Muungu akunda niite Yelusalemu, na nendaho niite uko khimanya chendacho kinibwiie. 23 Nimanyado ni kuwa Muye wa Muungu anamba kwei kwa kia mzi wanamba vifungo na kusuumizwa vyanigoja. 24 Akini ati nikauya na nyuma khio kintu, nakunda kuuganyiza uagiiwa wangu na kubindiiza ndima ambayo Zumbe Yesu nee kanekha nigosoe, ambayo ni kubiikia Mbui Yedi ya mboto ya Muungu.

25 "Nchemboka gatigati yenu nyose nikabiikia Useuta wa Muungu. Akini isasa namanya khahana ata yumwe yenu endayeanionee vituhu. 26 Akini nawamba kwei ivyeo ikalawiya yumwe yenu akaga, miye khina lawama yoyose. 27 Kwaviya nchekuemea ata kidodo kuwaambazia ukundiso wose wa Muungu. 28 Ekauweni wenye dikauweni na dia zumwezumwe ambado Muye wa Muungu kawekha mdikauwe, isani zumwezumwe da wantu wamzumiiyao Klistu, ambado Muungu kadigua kwa phome ya Mwanawe. 29 Namanya kuwa nikabinda kuhauka wahinyi wa uhokho wendaweze kwenu, wendawawe wakai na wendawawafuntie inga makui ya mzitui na khawana wadionee mbazi zumwezumwe da wazumiizi. 30 Watuhu kulawa mwe zumwezumwe denu wendawagooke, ambao wendawatamwiiye uhonkho na kuwatenda wahina wawatongee. 31 Ivyo muwe meso mkakumbuka kwa mda wa myaka mitatu, kio na musi nchekusokea kumhaza kia yumwe yenu kwa mesozi.

32 "Isasa nawaika nywie mwe ukauwizi wa Muungu na wa Mbui ya wedi wakwe ambao una nguvu ya kuwazenga na kuwekha upazi ambao kawaikia nywie hamwe na wantu wakwe wose. 33 Miye nchekukunda hea, wala zahabu, wala gwanda da mntu yoyose. 34 Mwamanya nywie wenye kuwa khigosoa ndima kwa mikono yangu mwenye ili kwepatia chochose na wada nekutongeana nao. 35 Mwe yada yose ambayo khigosoa, nekhiwa naonyesha kuwa takundigwa kugosoa ndima kwa sugunti zetu swie wenye ili tidahe kuwaambiza wekuhungukiwao, kisingi tagosoa ivyo tiwe takumbuka Mbui ambazo Zumbe Yesu mwenye nee kagombeka, ‘Ebae kulavya kusima kuhokea.’ "

36 Paolo ekubindaho kugombeka ayo, akakinta mavindi hamwe nao wose akavika. 37 Wose wakaiya muno wakamwenamia Paolo na kumuumbatia. 38 Mbui yekuwageayo mbazi muno, ni ida mbui ekwambayo khawana wamwone vituhu, naho wakaita hamwe nae adi mwe ngaawa.