1 Msi umwe saa kenda wa musi, Petulo na Yohana nee waita he Nyumba ya Muungu kuvika. 2 Na uko he Nyumba ya Muungu nehawa na mntu yumwe mwekuviya miundi kuvokea kuvyaigwa kwakwe. Kia msi wantu nee wakamdoa na kumuika he uvi wa Nyumba ya Muungu wetangwao mtana, ili aombeze chochose kwa wantu wengiao he Nyumba ya Muungu. 3 Ekuwaonaho Petulo na Yohana wakengia he Nyumba ya Muungu nee awaombeza wamwekhe chochose. 4 Petulo na Yohana wakamfuiiya meso, nae Petulo akamwamba, "Tikauwe!" 5 Ivyo nee awakauwa, akakauwiya ekhigwe kintu chochose kulawa kwao. 6 Naho Petulo akamwamba, "Mie khina madini ya feza wala zahabu, akini kia nenacho nendanikwekhe, kwa zina da Yesu Klistu wa Nazaleti gooka uite!" 7 Nee Petulo amtoza mkono wa kuume akamwenua. Ahoaho khunguvi za miundi zikatintimaa. 8 Akasooka na kugooka na kuvoka kuita nao, ne wengia he Nyumba ya Muungu akenda na kusooka sooka uku amtogoa Muungu. 9 Wantu wose wekuwao aho nee wamwona akenda na kumtogoa Muungu, 10 wekumtangaho kuwa ni yuda mwekuwa akaombeza hehi na uda uvi mtana wa Nyumba ya Muungu. Wakahondomaa muno hata khawokudaha kumanya yekumpatayo.

11 Yuda mntu mwekuviya miundi mwekuhonywa ekuwaho akatongeana na Petulo na Yohana, wantu wose wakahondomaa muno, ivyo wakaguukia hantu hetangwaho ukumbi wa Seemani. 12 Petulo ekuwaonaho wantu wada akawamba, "Nywie wantu wa Isilaeli kwa mbwai mwahondomazwa ni mbui inu? Mbona mwatufuia meso inga kwamba kwa udaho wetu hambu wedi wetu timgosoa mntu uyu adahe kwenda? 13 Muungu wa Baba zetu Ibulahimu na Isaka na Yakobo, kamtogoeza Yesu mndima yakwe. Akini nywie mkamuemea hemeso ya Pilato etiho Pilato nee kakunda amuwekee hulu. 14 Nekawa mntu mng'azi na yedi, akini nywie mkamuemea, mkakunda mntu mtuhu mwekuwa mkomaji aekewe. 15 Naho mkamkoma yuda mwekuwa wa bosi wa ugima, akini Muungu akamyuyusa na swie wavuhuzi wa mbui iyo. 16 Kwa kudizumia zina da Yesu, mntu uyu mmuonae na kummanya katintimaa khunguvi zakwe. Uzumizi wakwe kwa Yesu nee wekumhonyao mntu uyu inga mumkauwavyo wose.

17 "Naho wandugu zangu, namanya kuwa nywie mgosoa kwesiho kumanya inga wekugosoavyo wakuu wenu. 18 Akini neivyo Muungu ekuiganiayo yada ekuyaambazayo aho kae kwembokea waoni wose kwamba neiwa yakundigwa Klistu wakwe asuumizwe. 19 Ivyo hitukani na mbade mavigaviga mkamuuwie Muungu ili yee awaekee mavigaviga yenu. 20 Gosoani ivyo ili Zumbe awekhe kisingi cha kimwemwe mwe moyo na kuwaetea yuda Klistu ekumsaguaye ambae nee Yesu. 21 Yakundigwa yee asigae uko uwanga kwa Muungu adi kisingi chendacho kibue cha kia kintu chendavyo kigosolwe uhya inga Muungu ekwambavyo kwembokea waoni wakwe wang'azi kuvokea aho kae. 22 Inga Musa ekwambavyo, ‘Zumbe Muungu yenu endaawaetee muoni inga miye, uyo endaalawie gatigati yenu wenye. Mwakundigwa mtegeeze yose endayoawambe. 23 Mntu yoyose mwesaekumtegeeza na kumzumiiya muoni uyo endaabahulwe hae na wantu wa Muungu na endaakomwe.’ 24 Waoni wose wa Muungu kuvokea Samweli na wada wekumbasao, wose nee wakalavya uwoni kwa yada yendayoyalawie mwe kisingi iki. 25 Viaga viya Muungu kavilavya kwembokea kwa waoni wakwe kwaajii yenu, nanywi mwashiiki diagane ambado Muungu kadigosoa na baba zenu inga ekumgombekavyo Ibulahimu, ‘Kwembokea uvyazi wako wantu wose mwe inusi wendawajaiwe.’ 26 Naho Muungu ekumyuyusaho Mwanawe Yesu, akamuagiiya avoke kwenu, ili awajaiye na kumgosoa kia yumwe yenu kulawa mwe makwasukwasu yakwe."