1 Kisingi icho Sauli ne katendesa vitiso vikai vya kuwakoma wazumizi wa Muungu. Akaita kwa Mviki Mkuu, 2 akaombeza ekhigwe bauwa zendazozimwambize amanyike mwe Nyumba za kuvikia Wayahudi kuda Damesiki, ili akawabwiiya uko wagosi au wavyee wabasao sia ya Zumbe awagwiie na kuwaeta mwe mzi wa Yelusalemu.

3 Akini ekuwaho siai hehi na kubua Damesiki vuupu ung'azi kuawa uwanga kwa Muungu ukammuika phande zose. 4 Akagwa asi na kutegeeza mgutio ukamwamba, "Sauli, Sauli! Kwambwai wanisuumiza?"

5 Nee Sauli akauza, "Nndai wee Zumbe?"

Nae akatambaisa, "Mie nee Yesu unisuumizae." 6 "Akini gooka isasa, uite mwe mzi na uko wenda wembigwe ukundigwacho kugosoa."

7 Wada wantu wekuwao watamba hamwe na Sauli wakagooka hada, naho khawana da kugombeka, wautegeeza uda mgutio akini khawekumwona mntu yoyose. 8 Sauli akenuka na ekugubuaho meso yakwe khekudaha kuona dodose, ivyo wada wantu wakamwongoza kwa kumtoza mkono adi mzi wa Damesiki. 9 Sauli akekaa misi mintatu kwesiho kukauwa na kisingi icho khekuda wala kudomea chochose.

10 Naho uko Damesiki nekuwa na mhina etangwae Anania, Zumbe akamwetanga mwe sozi, "Anania!"

Anania aketikia, "Eee Zumbe."

11 Zumbe akamwamba, "Enuka utoze sia ya mwenga kwa mwenga adi mwe nyumba ya mntu etangwae Yuda, umuuze mntu yumwe kuawa Taso etangwae Sauli na isasa avika, 12 Muungu nee kamuonyesha Sauli mbui, akamuona mntu etangwae Anania eza kwakwe na kumwiikia mikono adahe kukauwa vituhu."

13 Akini Anania akatambaisa, "Zumbe miye khiitegeeza mbui za mntu uyu kuawa kwa wantu wangi, khiutegeeza ufyaimi ekuwagosoavyo wantu wako uko mwe mzi wa Yelusalemu. 14 Na keza hanu kaagiiwa ni waviki wakuu kuwagwia wantu wose wadivikaho zina dako."

15 Akini Zumbe akamwamba, "Hita du kwaajii khimsagua atende mndima yangu adibiikie zina dangu kwa wantu wesao kuwa Wayahudi na kwa Maseuta na kwa wantu wa Isilaeli. 16 Mie mwenye nenda nimuonyeshe yamkundayo kusuumizwa kwaajii ya zina dangu."

17 Anania akaita, akengia mwe nyumba iyo. Akaika mikono yakwe uwanga ya Sauli akamwamba, "Ndugu Sauli, Zumbe Yesu mwekukulawiia wekuwaho siai kweza hanu, kaniagiiya udahe kukauwa vituhu na kuongoewa na Muye wa Muungu." 18 Ahoaho vintu inga magamba ya samaki vikagwa kuawa mwe meso ya Sauli akadaha kukauwa vituhu. Akagooka na akabatiizwa, 19 naho wekubindao kuda khande nguvu zikamuuiya.

Naho Sauli akekaa misi micheche hamwe na wahina uko Damesiki. 20 Ahoaho akavoka kubiikia mwe Nyumba ya kuvikia Wayahudi kuwa Yesu ni Mwana wa Muungu.

21 Wantu wose wekumtegeezaho wakahondomaa wakauza, "Uwo mntu uyu khio yuda ambae nekawa akawasuumiza wantu wekumzumiao Yesu kuda Yelusalemu? Uwo keza hanu awagwiie wantu na kuwegaa kwa waviki?"

22 Sauli akaendeea kuwa na nguvu kwaviya ekuwaonyeshavyo pwiii kuwa Yesu nee Klistu, kawagosoa Wayahudi wekwekaao Damesiki wasekudaha kuhigana nae.

23 Misi mingi yekwembokaho, Wayahudi wakakintana na kugosoa nteganyi ya kumkoma Sauli, 24 akini Sauli akaimanya ntenganyi iyo, Wayahudi wakawa wamgoja he nyuvi zose za kwengia mwe mzi kio na musi ili wadahe kumkoma. 25 Akini kisingi cha kio wafuasi wakwe wakamdoa na kumwiika mwe ngahu khuu wakamseeza asi kwembokea mwe ukanto wa mzi.

26 Naho Sauli ekubuwaho mwe mzi wa Yelusalemu akageeza awe hamwe na wahina, akini nee wamuogoha wose, khawekumzumiia kuwa yee ni mzumizi. 27 Akini Balinaba akeza akamdoa na kumwegaa kwa waagiiwa. Akawamba ni viivihi ekumwonaho Zumbe siai na akagombeka nae na viyaviya ekubiikiavyo kwa kutintimaa kwa zina da Yesu uko mwe mzi wa Damesiki. 28 Aho, Sauli akekaa hamwe nao, akaita kia hantu mwe mzi wa Yelusalemu akibiikia Mbui ya Zumbe kwa kutintimaa. 29 Akagombeka na kutambaisana na Wayahudi watamwiaho kigiiki, akini wowo wakakunda kumkoma. 30 Wada wantu wekumzumiao Klistu wekumanyaho mbui iyo wakamdoa Sauli, wakamwegaa Kaisalia, wakawagiiya aite mwe mzi wa Taso.

31 Kisingi ichoicho zumwezumwe da wantu wekumzumiao Klistu newawa na utuivu kia hantu mwe mzi wa Yudea na Galilaya na Samaliya. Waliendeea kutintimaa na kumtegeeza Zumbe na ntaazia yao ikagenyea kwa kuambizwa na Muye wa Muungu.

32 Naho Petulo ekuwaho atamba kia hantu, na kisingi kimwe nee kaita kuwavuia wantu wa Muungu wekuwao wakekaa mzi wa Lida. 33 Uko akambwiiya mntu yumwe etangwae Ainea ambae kwa myaka minane nekawa kagona mwe usazi kwaajii nekahooa. 34 Nee Petulo akamwetanga, "Ainea, Yesu Klistu kakuhonya, gooka kunja kilago chako." Ahoaho Ainea akenuka. 35 Wantu wose wekwekaao mwe mzi wa Lida na mwe koongo da Shaloni, bada ya kumoona Ainea wose wakamzumiiya Zumbe Yesu.

36 Nekuwa na mzumizi yumwe wa kivyee mwe mzi wa Yopa etangwae Tabita, kwa kigiiki ni Dokasi mana yakwe phaa. Uyo mvyee nekawa akagosoa vyedi na kuwaambiza wakiwa misi zose. 37 Kisingi icho akahuma na kuuya na nyuma, wantu wakausunta mwii wakwe wakaugoneza uko gati mwe goofa. 38 Mzi wa Yopa khio hae na mzi wa Lida, naho wahina wekusikiaho Petulo yu Lida, wakawaagiiya wantu waidi kuita kwakwe ili wamuombeze, "Soo kwetu isasa." 39 Nee Petulo akahauka hamwe nao na ekubuaho akegalwa uko gati mwe goofa ekuwaho kagonezwa. Wavyee wose wekufiwao ni wagosi ne wamuikia bunga Petulo uku waiya na kumwonyesha magwanda yekugosolwayo ni Dokasi kisingi ekuwaho mgima. 40 Petulo akawaavya wose chongoi, nee akinta mavindi, akavika, naho akakihitukia kida kiimba nee amba, "Tabita, enuka." Tabita akagubua meso yakwe, na ekumwonaho Petulo nee ekaa. 41 Petulo akamtoza mkono na kumwambiza kumwenua, naho akawetanga wada wekumzumiao Klistu na wada wekufiwao ni wagosi akamwekhiiza kwao uku ni mgima. 42 Mbui iyo ikaambazika kia hantu uko mwe mzi wa Yopa na wantu wangi wakamzumiiya Zumbe. 43 Petulo akekaa misi mingi uko Yopa, kekaa kwa mntu yumwe mgosoaji vintu kwa mababa etangwae Simoni.