1 Nehawa na mntu yumwe uko Kaisalia etangwae Konolio mkuu wa kizumwezumwe cha asikai chekumanyikanacho inga kizumwezumwe cha Italia. 2 Nekawa mntu yedi, yee hamwe na wantu wakwe newawa wamvikia Mungu. Nekawa awaambiza wakiwa na kumvikia Muungu misi zose. 3 Msi umwe saa kenda wa musi, Muungu akamuonyesha mndima wa uwanga kwa Muungu akengia mda ndani na kumwamba, "Konolio!"

4 Konolio wakamfuia meso kwa kuogoha akamwamba, "Kuna mbwai Zumbe?"

Uyo mndima wa uwanga kwa Muungu akamtambaisa, "Muungu kahokea mviko wako na malavyo yako kwa wakiwa ziwa khumbuso za kuavya kwako hemeso yakwe. 5 Isasa waagiie wantu waite mzi wa Yopa, wakamwetange mntu yumwe mwetangwa Simoni kwa zina tuhu Petulo. 6 Yee yuumo mwe nyumba ya Simoni mgosoaji wa vintu vya mababa ambae nyumba yakwe ihehi na mazimshindo." 7 Yuda mndima wa uwanga kwa Muungu ekuwae atamwiiya nae ekuhaukaho, Konolio akawetanga wandima waidi wa nyumbani na asikai yumwe amvikiae Muungu. 8 Akawamba yose yekuawiiayo akawaagiiya waite mzi wa Yopa.

9 Kiyoi yakwe inga saa mtandatu wa musi awo wantu watatu ne wakatamba kuita Yopa na wekuwaho hehi na mzi, Petulo akakwea uwanga ya nyumba kuvika. 10 Akoona saa, akakunda kuda, kisingi khande yekuwaho yaomolwa, Muungu akamuonyesha kintu. 11 Akoona uwanga kwa Muungu kuvuguka na kintu inga shuka khuu yaseezwa asi uku itozwa phembe zakwe nne. 12 Mda ndani ya shuka nekuwa na kia mbai ya wanyama ambaho ni wanyama wenye miundi mine na wanyama wabuutikao na wadege wa uwanga. 13 Naho mgutio ukamwamba, "Petulo enuka, uwadumue singo, ude!"

14 Akini Petulo akatambaisa, "Zumbe, miye khizati katu kuda vintu vyekuemezwavyo kuigwa hamwe na viya ambavyo khio vitana kuigwa."

15 Uda mgutio ukategeezeka vituhu na kumwamba, "Usekuvyetanga khavifaa kuigwa vintu ambavyo Muungu kavigosoa viigwe." 16 Mbui inu ikalawia maa ntatu naho ida shuka ikavuzwa uwanga kwa Muungu.

17 Petulo ekuwaho ahondomaa kia ambacho Muungu kamuonyesha kina mana yani, wada wantu wekuagiwao na Kolonio, wakabua wakagooka he uvi wa nyumba ya Simoni. 18 Waketanga na kuuza, wakamba, "Umu kuna mgeni yoyose etangwae Simoni zina tuhu Petulo?"

19 Petulo ekuwaho ageeza kumamakhanya viya Muungu ekumuonyeshavyo, ahoaho Muye wa Muungu ukamwamba, "Tegeeza! Kuna wantu watatu hanu, wakuondeza. 20 Seeya kinyio kulawa uwanga ya nyumba, naho usekweuza kuhauka hamwe nao, kwaviya ni miye nekuwaagiiaye." 21 Nee Petulo aseeya asi na kuwamba awo wantu, "Mie ne mniondezae. Mweza kwaajii yani?"

22 Wowo wakamtambaisa, "Mkuu wa asikai mia mwenga etangwae Konolio katiagiiya, ambae ni mntu yedi amvikia Muungu naho Wayahudi wose wamtunya. Mndima wa uwanga kwa Muungu kamwamba akugoneke kaya kwakwe, ili akutegeeze chochose wendachoumwambe." 23 Petulo akawengiza mda ndani akawekha hantu hakugona kio kia.

Kioi yakwe Petulo akavoka ntambo hamwe nao na wamwe wa wandugu wekumzumiao Klistu wekuwao mwe mzi wa Yopa wakatongeana nae. 24 Msi wa kaidi wakabua Kaisalia na uko Konolio nekawa akawagoja hamwe na wanduguze na wambuya wakwe ekuwaho kawagoneka. 25 Petulo ekuwaho hehi kwengia mda ndani, Konolio akalawa chongoi kumhokea, akakinta mavindi hemeso yakwe na kwenamia. 26 Akini Petulo akamwenua na kumwamba, "Gooka kwaviya ata miye ni mntu du." 27 Petulo akaendeea kutamwiiya na Konolio uku wengia mda ndani ambaho nee kabwiiya wantu wangi wakintana. 28 Petulo akawamba, "Nywie mwamanya kuwa kuawana na miko ya Kiyahudi khaikundigwa kumvuia mntu mwesekuwa Myahudi. Akini Muungu kanimanyisa nesekumwetanga mntu yoyose kuwa khafaa kwa Muungu. 29 Kwaajii iyo, mwekunetangaho ncheza kwesiho kuhigana, aya nambiani mnetangia mbui yani?"

30 Konolio akatambaisa, "Inga misi mine yekwembokayo mda inga unu, saa kenda wa musi nekhiwa nikavika gati hangu. Ahoaho akagooka hemeso yangu mntu mwekuvaa gwanda dekung'aado pee, 31 akagombeka, ‘Konolio! Muungu kahokea miviko yako na kuyakumbuka malavyo yako kwa wakiwa. 32 Mwagiie mntu aite mzi wa Yopa akamwetange mntu yumwe etangwae Simoni kwa zina tuhu Petulo yuuko mwe nyumba ya Simoni mgosoaji vintu vya mababa ekaaye hehi na mazimshindo.’ 33 Ahoaho nikawaagiia wantu kwako kwesiho kucheewa nawe kugosoa vyedi kweza. Isasa swie tiaha hemeso ya Muungu kukutegeeza dodose ambado Zumbe kakuagiia utambie."

34 Aho Petulo akavoka kugombeka, "Isasa namanya kwei kuwa Muungu khabahua. 35 Mungu amhokea mntu wa si yoyose amzumiae na kugosoa yada yedi. 36 Nywie mwamanya kuwa Muungu nee kaagiiya wantu wakwe kuwabiikia Waisilaeli Mbui Yedi kuwa wekhigwe utuivu kwembokea Yesu Klistu, Zumbe wa wantu wose. 37 Nywie mwamanya mbui yekulawiiyao mwe si yose ya Yudea kuvokea Galilaya, Yohana ekubindaho kuwabikia wantu mbui yakwe ya ubatiizi. 38 Mwamanya Yesu wa Nazaleti ni viivihi Muungu ekumsaguavyo na kumwekha Muye wa Muungu na udaho, Muungu kawa hamwe nae, yee nee kaita uko na uko akagosoa matana na kuwahonya wose wekusuumizwao na nguvu za Ibiisi. 39 Swie ni wantu tekuonaho kwa meso yetu wenye mbui zose ekugosoazo mwe si ya Yudea na mwe mzi wa Yelusalemu, wakamkoma na kumgong'ondea he mhamba. 40 Akini Muungu akamyuyusa mwe msi wa ntatu, akamgosoa aoneke, 41 khekuonekana kwa wantu wose akini kwa wada Muungu ekuwasaguwao wawe waonaji wa mbui zakwe, yani swie tekudae na kudomea hamwe nae, ekubindaho kuyuyuka kwakwe. 42 Akatikunda kuibiikia Mbui Yedi kwa wantu wose na kuwamanyisa yee nee mwekusagulwa ni Muungu awe muamua wa wantu wagima na wekuuyao na nyuma. 43 Waoni wose wa Muungu wagombeka mbui zakwe, kia mntu mwendaeamzumiie endaaekewe mavigaviga kwa zina dakwe."

44 Kisingi Petulo ekuwaho agombeka tamwiizi izo, Muye wa Muungu ukawezea wose wekuwao wategeeza mbui iyo. 45 Wada Wayahudi wekuzumiiyao wekwezao hamwe na Petulo kuawa mwe mzi wa Yopa wakahondomaa, kwaviya Muungu kawekha Muye wa Muungu wantu wesao kuwa Wayahudi. 46 Kwaviya wawategeeza wakatamwiiya kwa mbai mbaimbai, na kumtogoa Muungu. Aho Petulo akagombeka, 47 "Wantu awa wahokea Muye wa Muungu inga swie tekuhokeavyo, kuna mntu yoyose adahae kuwakindia wasekubatiizwa kwa mazi?" 48 Ivyo akaagiiya wabatizwe kwa zina da Yesu Klistu, naho wakamwombeza Petulo ekae nao kwa misi micheche.