1 Yekubuaho msi wa sikukhuu ya Pentekoste wantu wekumzumiao Yesu wose nee wakintana hantu hamwe. 2 Vuupu mgutio ukategeezeka kuawa uwanga, mgutio wekuwao inga khusi khai ikamema mwe ida nyumba yose wekuwamo wekaa. 3 Naho vikalawiiya vintu vyekuonekanavyo inga miale ya moto zekwepanganazo na kumwekaiya kia yumwe uwanga ya mtwi wa wada wekuzumiao. 4 Wose wakamemezwa Muye wa Muungu, wakavoka kutamwiiya kwa mbai ntuhu inga Muye ekuwadahizavyo.

5 Naho uko Yelusalemu newawa Wayahudi wekuwao wakamvikia na kumtegeeza Muungu, wekulawiiyao mwe si zose mwe uwanga na inusi. 6 Wekusikiaho mgutio uwo, zumwezumwe kuu da wantu dikaika bunga. Wose wakahondomaa muno kwaani kia yumwe yao nee awategeeza wakagombeka kwa mbai zao wenye. 7 Wakahondomazwa muno na wakamba, "Awa wose tiwategeezao wakagombeka ivi khio wenyezi wa Galilaya! 8 Iwa vivihi, kia yumwe yetu awategeeza wakagombeka kwa mbai yakwe ekuvyaigwayo nayo? 9 Wamwe wetu talawiiya Apasi na Amedi na Elamu, watuhu ni wenyezi wa Mesopotamia na Yudea na Kapadokia na Ponto na Asia, 10 kuawa Filigia na Pamfilia na Misili na phande za Libia hehi na Kilene na wageni walawao Lumi, 11 Wayahudi na wantu wekwengiao dini ya Kiyahudi, watuhu walawa Kilete na Alabia. Swie wose tawategeeza wakagombeka mbui khuu za kuondomaa za Muungu kwa mbai zetu wenye!" 12 Wose wakatozwa ni ukeng'enta na kuhondomaa uku wauzana, "Inu ina mana yani?"

13 Akini watuhu wakawabea wakamba, "Wantu awa wakolwa divai mhya!"

14 Naho Petulo akagooka hamwe na wada waagiiwa kumi dimwe na mwenga, naho kwa mgutio mkuu akavoka kudamba zumwezumwe da wantu wada wa mzi wa Yudea, "Wandugu zangu Wayahudi na nywie nyose mwekaao hanu Yelusalemu nitegeezani vitana mbui nendayo nigombeke. 15 Wantu awa khawekukolwa inga mmamakhanyavyo, kwaviya isasa nsaa tatu da keo. 16 Mbui inu yekulawiyayo nee ida ekugombekayo Yoeli muoni wa Muungu."

17 Zumbe agombeka, "Mwe misi za kisikizi,

Nendaniwekhe Muye wangu wantu wose.

Wana wenu wa kigosi na wakivyee wendawawambe wantu Uwoni wangu,

Wabwanga wenu wendawaonyeshwe vintu na Muungu

Na wadaa wenu wendawaote sozi.

18 Naho hata wandima wangu wa kigosi na wakivyee,

Nendaniwekhe Muye wangu misi izo,

Nao wendawabiikie uwoni wangu.

19 Nendanigosoe vihii uwanga

Na utangio asi mwe inusi,

Kundakuwe na phome na moto na mosi mzito.

20 Zua dendadigewe kiza,

Na mweenge wendauwe mwekhundu inga phome

Kabla ya kulawiiya uda msi mkuu na Ukuu wa Zumbe.

21 Aho mntu yoyose endaeadetange zina da Zumbe, endaaoholwe."

22 Petulo akaendeea kugombeka, "Nywie wantu wa Isilaeli, tegeezani mbui izi vitana! Muungu nee kawaonyesha nywie kuwa agosoa ndima kwembokea Yesu wa mzi wa Nazaleti, nywie wenye mwamanya kuwa kwembokea Yesu uyo nee awaonyesha vihii na viozo na utangio nyingi kwenu. 23 Kutongeana na uteganyi wakwe mwenye, Muungu nekawa kaamua kuwa Yesu ekhiizwe kwenu, nanywi mkamkoma kwa kuwabadia mabagaa wamgong'ondee he mhamba. 24 Akini Muungu akamyuyusa Yesu kulawa kwa wekufao, akamuusia masuumizi ya ufe kwaviya khayekudahika yee kutozoezwa na udaho wa ufe. 25 Kwaviya Daudi agombeka kuusu yee,

‘Khimwona Zumbe hemeso yangu misi yose,

Kwaajii yuuko mkono wangu wa kuume khinaniogoe.

26 Kwaivyo moyo wangu nee una nyemi,

Naho nina nyemi kwa kanwa changu,

Mwii wangu

Wendawekae mwe makauwiyo.

27 Mana khunauubade muye wangu mwe si ya wekufao,

Wala khumuwekea mng'azi wako avunde mwe mbia.

28 Kunimanyisa sia za ugima,

Wendaunitende niwe na nyemi nikawa hamwe na wee.’

29 "Wandugu zangu, nakunda niwambe pwii mbui ekupatayo Daudi, tati yetu. Yee ekuuyaho na nyuma, wakamgea mwe mbiya na mbia dakwe diuko ahaaha adi ivyeo. 30 Akini kwaviya Daudi nekawa muoni wa Muungu, kamanya Muungu kawaikia kiaga kuwa endaamsimike mntu yumwe wa uvyaigwa wakwe atende Seuta inga ekuavyo Daudi." 31 Daudi ne kaona mbui ambazo Muungu enda agosoe kisingi chezacho, ivyo akagombeka kuusu kuyuyuka kwa Klistu mkombozi, ekwambaho,

"Khekubadwa mwe si ya wantu wekuuyao na nyuma

Na mwii wakwe khawekuvunda mwe mbia."

32 Naho Muungu akamyuyusa uyo Yesu na swie wose wavuhuzi wa mbui iyo. 33 Bada ya Tate Muungu kumtogoa kwa kumtunya Yesu kusima wose, akahokea Muye wa Muungu kuawa kwa Tate katietea Muye wa Muungu ambae Muungu katiikia kiaga, nee ayo myaonayo na kuyategeeza. 34 Kwaviya Daudi mwenye, khekwenulwa kuita uwanga kwa Muungu, akini akagombeka,

"Zumbe akamwamba Zumbe yangu,

Ekaa phande yangu ya kuume,

35 Adi nendahoniwaike wamasa wako wajatwe asi ya miundi yako."

36 Petulo nee amba, "Wantu wose wa Isilaeli wakundigwa kumanya ukwei kuwa Yesu mwekumgong'ondea he mhamba nee uyo ambae Muungu kamtenda kuwa Zumbe na Klistu Muohozi!"

37 Naho wantu wekutegeezao ayo wakatungwa mwe mioyo yao, wakawauza Petulo na wada waagiiwa watuhu, "Wandugu zetu, titende mbwai?"

38 Petulo akawatambaisa, "Kia yumwe yenu ahituke kuawa mwe mavigaviga na kubatiizwa kwa zina da Yesu Klistu na Muungu endaawaekee mavigaviga yenu. Nanywi mwendamhokee kiaga cha Mungu ambae ni Muye wa Muungu. 39 Kwaviya kiaga kia nekiwa kwaajii yenu na kwa wana wenu na wantu wose wekaao hae na wada wose ambae Zumbe Muungu endaawetange mwenye."

40 Petulo kuwahembeeza kwa mbui nyingi na kuwaagiiya wantu akagombeka, "Eohoeni na uvyazi unu wenye makwasukwasu!" 41 Wantu wangi nee waizumiiya mbui yakwe, wakabatiizwa wantu wekupatao elufu ntatu wakagenyea mwe zumwezumwe da wantu wekumzumiao Yesu msi uwo. 42 Awa wose wakaendeea kuhinywa kuawa kwa wagiiwa wa Yesu na kwekaa hamwe kindugu kuda khande na kuvika.

43 Waagiiwa nee wakagosoa vihii na utangio myingi hata wantu wakaogoha muno na kumzumiiya Muungu. 44 Wekumzumiiyao Yesu wose wakaendeeya kwekaa hamwe na kupangana vintu vyao. 45 Nee wataga vintu vyao, naho wakapangana hea kadii ya kiya yumwe ekuhungukiwavyo. 46 Wakaendeeya kukintana kiya msi he Nyumba ya Muungu na wekuwaho wada khande nee wakakintana mwe nyumba zao kwa nyemi na moyo mtana, 47 wakamtogoa Muungu wakakundiswa na wantu wose, kia msi Zumbe nee awagenyezea ntaazia ya wantu wekuwao waoholwa.