1 Nee wantu watuhu wakabua Antiokio kulawa Yudea wakavoka kuwahinya wada wekuzumiao wakawamba, "Ati khamna mgwiswe kubasana na tekuagiiwavyo na Musa khamna muoholwe." 2 Paolo na Balinaba nee wahigana muno na Wayahudi awo, ivyo zumwezumwe da wantu wamzumiao Klistu wa Antiokia wakawaagiiya Paolo na Banaba na wazumizi wacheche waite Yelusalemu, wakatamwiie na waagiiwa na wadaa kuusu mbui inu.

3 Nee zumwezumwe da wantu wamzumiao Klistu wa Antiokio wakaagana nao, wekuwaho wembokea mzi wa Foinike na mzi wa Samalia, wakawatamwiiza wantu ni viivihi wantu wesao kuwa Wayahudi wekumzumiavyo Muungu, mbui izo zikawatamiza muno wantu wose wamzumiao Klistu. 4 Wekubuaho mwe mzi wa Yelusalemu wakahokewa na wazumizi wa Klistu, waagiwa hamwe na wadaa, Paolo na Banaba wakawamba mbui zose kuusu yose ekuyagosoavyo Muungu hamwe nao. 5 Akini wamwe wa wazumizi wekuwaho wa kizumwezumwe cha Mafalisayo wakagooka na kugombeka, "Yakundigwa wantu wesao kuwa Wayahudi wagwiswe na wahinywe kutongea miko ya Musa."

6 Aho waagiiwa na wadaa wakakintana kufanyanya mbui iyo. 7 Bada ya matambaisano mangi Petulo akagooka na kugombeka, "Wandugu zangu, nywie mwamanya aho kae Muungu kanikunda kunisagua miye niwe yumwe yenu nibiikie Mbui Zedi kwa wantu wesao kuwa Wayahudi wadahe kutegeeza na kumzumiiya Zumbe Yesu. 8 Nae Muungu amanyae mioyo ya wantu nee kaonyesha kwei kawahokea kwa kuwekha Muye wa Muungu inga ekutekhavyo swie. 9 Muungu khekugosoa ubahuzi wowose gatigati yetu na wao, iya akawaekea mavigaviga yao kwaajii nee wazumiiya. 10 Naho isasa kwa mbwai kumgeeza Muungu kwa kuwabadika wazumizi ndundu ambazo baba zenu khawokudaha kwenua wala swie khatekudaha kuyenua? 11 Akini swie tazumiiya kuwa tioholwa kwa wedi wa Zumbe Yesu Klistu inga viya wowo wekuoholwavyo."

12 Kizumwezumwe chose kiwa kitwiia kikawategeeza Balinaba na Paolo wagombekavyo ntangio zia Muungu ekugosoavyo gatigati ya wantu wesao kuwa Wayahudi. 13 Wekubindaho kutamwiiya Yakobo akavoka kugombeka, "Wandugu zangu nitegeezani! 14 Simoni katamba ni viivihi Muungu, ekwepishavyo na wantu wesao kuwa Wayahudi na kuwasagua wamwe wao watende wantu wakwe. 15 Mbui inu yaigana na mbui ya waoni wa Muungu inga Maandiko ya Muungu yambavyo,

16 Zumbe agombeka, ‘Mbui izi zikasiya, nendaniuye nami,

Nendanizenge uhya nyumba ya Daudi yekugwayo.

Nendanizenge vituhu matutu yakwe

Na kuyagoosa.

17 Aho wantu watuhu wose wengie,

Wadahe kumuondeza Zumbe.

Hata wada wesao kuwa Wayahudi,

Nekuwetangao wawe wantu wangu,

Agombeka Zumbe agosoae mbui izi zose.

18 Ne ivyo agombekavyo Zumbe, kagosoa mbui inu imanyikane kuvokea kae.’ "

19 Yakobo akaendeeya kugombeka, "Ufanyanyi wangu ni unu, tisekuwapisha wada wesaokuwa Wayahudi wamhitukiao Muungu kwa kuwamba watongee mazweeya yetu. 20 Iya tiwagondee bauwa wasekuda khande au nyama yesayokukundigwa kuigwa kwa mazweeya ya kumvikia Mungu, wasekuwa wakianga na wasekuda nyama ya mnyama yoyose mwekunyongotolwa wala wasekudomea phome. 21 Kwaviya kwa kisingi kilehacho mbui ya Musa yawa yasomwa na kubiikiwa mwe Nyumba za kuvikia Wayahudi yekuwayo mwe kia mzi Msi wa Kuhumwiiza."

22 Waagiiwa na wadaa na zumwezumwe da wantu wose wamzumiao Klistu wa Yelusalemu nee waamua kusagua wantu gatigati yao, kuwaagiiya waite Antiokio hamwe na Paolo na Balinaba, aho wakamsagua Yuda mwekwetangwae Balisaba hamwe na Sila. Wose nee wakatunywa muno gatigati ya wandugu. 23 Wakawagiiya na kuwekha bauwa igombekayo, "Swie waagiwa na wadaa wamzumiiyao Klistu na wandugu zenu, tamiugusa nywie wezwetu mwesao kuwa Wayahudi mwekaao uko Antokia na si ya Silia na si ya Kilikia. 24 Titegeeza kuwa wamwe wa wantu watuhu kulawa uku kwetu wawakefyakefya kwa mbui zizaganyazo, wagosoa ivyo akini swie khatokuwaagiia. 25 Ivyo tiamua kwa hamwe kuwasagua wantu wacheche na kuwaagiiya kwenu hamwe na wezwetu Balinaba na Paolo, 26 wantu ambao waavya ugima wao kwaajii ya ndima ya Zumbe yetu Yesu Klistu. 27 Kwaivyo tawaagiia Yuda na Sila kwenu, awa wendawawambe wenye aya tekuandikavywo. 28 Kwaviya imtamiza Muye wa Muungu na swie tusiwatwike fuushi dodose kuu, muno za mbui izo tikundigwayo kugosoa, 29 msekuda khande yekulavigwayo kwa miuungu, mwesekudomea phome, msekuda nyama ya mnyama mwekunyongotolwae na msekugosoa ukianga. Mwendamuwe mgosoa vyedi inga mkaviemea kugosoa mbui izo. Nawakung'utia pheo zedi."

30 Wekubindaho kuagana nao wakaita Antiokio ambako waketanga mkuntano wa wazumizi wakawekha iyo bauwa. 31 Wazumizi wekuisomaho iyo bauwa mbui zakwe zikawagea moyo wakatamiwa muno. 32 Yuda na Sila ambao nao newawa waoni wa Muungu, wakatamwiiya na awo wandugu kwa kisingi kilehacho, wakawagea moyo na kuwatenda watintimae. 33 Bada ya kwekaa kwa mda mcheche wandugu wa Antiokia wakawaaga wakawakundia pheo zedi, nee wauya kwa wada wekuwao wawaagiia. 34 Akini Sila akoona vyedi kusigaa uko.

35 Paolo na Balinaba wakasigaa uko Antiokio kwa mda wakahinya na kubiikia mbui ya Zumbe, hamwe na wantu watuhu wangi.

36 Yekwembokaho misi micheche Paolo akamwamba Balinaba, "Tiuye tikawavuie wada wantu wekumzumiao Klistu wekuwaho mwe mizi yose tekubiikiayo Mbui Yedi ya Zumbe, tikawakaue waendeeavyo." 37 Balinaba nee kakunda wamdoe Yohana etangwae Maliko waite nae, 38 akini Paolo khekukunda kumdoa Yohana etangwae Maliko ambae aho bosi nee kawabada kuda Pamfilia na kuemea kuwa hamwe mwe ndima zao. 39 Naho kukaawiia uhigano mkai gatigati ya Paolo na Balinaba, wakabadana, Balinaba akamdoa Maliko wakakwea ngaawa na kuita Kipulo. 40 Bada ya wada ndugu kuwakundia wedi wa Zumbe uwe hamwe nao, Paolo akamdoa Sila na kuhauka. 41 Mwe ntambo iyo, Paolo akembokea si ya Silia na si ya Kilikia akavitintimaza vizumwezumwe vya wantu wamzumiao Klistu.