1 Naho uko mwe mzi wa Ikonio Paolo na Balinaba ne wengia mwe Nyumba ya kuvikia Wayahudi inga mazweeya yao. Uko wakabiikia kwa udaho mkuu na Wayahudi wangi na wantu watuhu wesao kuwa Wayahudi wakazumiia. 2 Akini Wayahudi wekuemeao kuwa wazumizi, wakawabibiiza wantu wesao kuwa Wayahudi kuhigana na wada wekuzumiao. 3 Paolo na Balinaba wakaendeea kwekaa uko kwa kisingi kilehacho. Wakabiikia kwa utintimavu mbui ya Zumbe, nae Zumbe akawamanyisa ukwei wa mbui wekutamwiiazo, kwa wedi wakwe Muungu kwa kuwekha udaho wa kugosoa ntangio nyingi na vihii. 4 Wantu wa mzi uda wakabahuana watuhu wakevana na Wayahudi na watuhu wakevana na waagiiwa.

5 Naho wamwe wao wesao kuwa Wayahudi na Wayahudi hamwe na wagookezi wao wakakunda kuwagosoea ufyaimu awo waagiiwa na kuwatoa kwa maiwe. 6 Waagiiwa wekuimanyaho mbui iyo, wakaguukia mzi wa Lisitila na Delibe mizi ya Lukonio na mwe hantu hahehi. 7 Uko wakabiikia Mbui Yedi.

8 Nekuwa na mntu yumwe uko mzi wa Lisitila nee kavia miundi kuvokea kuvyaigwa kwakwe na khazati kwenda hata kamwedu. 9 Mntu uyo nee akamtegeeza Paolo ekuwaho abiikia, Paolo akamsungumanya muno, ekuonaho ana uzumizi wa kudaha kuhonywa, 10 Paolo akagombeka kwa mgutio mkuu, "Gooka kwa miundi yako!" Yuda mntu mwekuviya miundi nee enuka ahoaho na kuvoka kwenda. 11 Zumwezumwe da wantu wekuonaho ekugosoacho Paolo, wakavoka kutoa vuzo kwa mbai ya Kilukaonia wakamba, "Miuungu itezea ikiwa na mii ya wantu!" 12 Balinaba aketangwa Zeu na Paolo aketangwa Hemesi kwaviya nee mwekuwa mgombekaji mkuu. 13 Nae mviki wa Nyumba ya muungu yetangwayo Zeu, yekuwayo chongoi ya mzi akaeta njeku na maua hemeso ya uvi mkuu wa mzi, yee hamwe na dia zumwezumwe da wantu wakaonda kuwaaviya ntambiko.

14 Balinaba na Paolo wekutegeezaho mbui iyo wakatatua nguo zao na kuguukia mwe dia zumwezumwe da wantu, wakagombeka kwa mgutio mkuu, 15 "Wandugu kwa mbwai mwagosoa mbui iyo? Swie mbona tiwantu inga nywie! Na tiaha kuwabiikia Mbui Yedi, ili muieke kuivikia miuungu yenu mkamhitukie Muungu ambae yu mgima mwekugosoa uwanga kwa Muungu na inusi, mazimshindo na vyose vyeumo. 16 Aho kae Muungu kawaekea wantu wesao kuwa Wayahudi waendeee kugosoa yada wekukundayo. 17 Akini, Muungu khekueka kweonyesha kwa yada matana ayagosoayo, awaetea fua kuawa uwanga kwa Muungu ili muwe na khande kwa misimu yakwe na kweguta na kumemeeza mioyo yenu nyemi." 18 Waagiiwa nee wadaha kudikindia dia zumwezumwe desekuwalaviya ntambiko, akini khaikudahikana kuwakindia kwa tamwiizi zao.

19 Akini Wayahudi wacheche wakeza kulawa mzi wa Antiokio na Ikonio, wakawabibiiza wantu wawe hamwe nao, wakamtoa maiwe Paolo na kumbuuta adi chongoi ya mzi wakamanya kauya na nyuma kae. 20 Akini wazumizi wekukintanaho na kumwiikia bunga, akenuka, akauya mwe mzi. Keo dakwe yee hamwe na Balinaba wakaita Delibe.

21 Paolo na Balinaba wekubindao kubiikia Mbui Yedi uko Delibe na kuwagosoa wantu wangi kuwa wazumizi. Wakafunga ntambo ya kuita Antiokio kwa kwembokea Lisitila na Ikonio. 22 Wakawatintimaza wantu wekumzumiao Klistu wa mzi uwo na kuwagea moyo waendeee mwe uzumizi, wakawamba "Yakundigwa swie wose kwembokea usuumizi mwingi ili tengie mwe Useuta wa Muungu." 23 Wakasagua wadaa kwa kia zumwezumwe da wantu wekumzumiao Klistu kwaajii ya kugookea wazumizi bada ya kuvika na kwehiniza kuda, wakawaika he mikono ya Zumbe wamzumiae.

24 Wekwembokaho sia ya Pisidia wakabua Pamfilia. 25 Wekubindao kubiikia iyo mbui uko Peliga, wakaita Atalia. 26 Kulawa uko wakatamba kwa ngaawa wakauya Antiokio hantu ambaho aho bosi nee wavika ili Muungu awaambize kugosoa ndima ambayo Muungu nekawa kawaagiiya.

27 Wekubuaho uko Antiokio wakaika hamwe zumwezumwe da wantu wekumzumiao Klistu wakawamba yose ambayo Muungu nee kawadahiza kugosoa na ni viivihi ekuwavuguiavyo uvi wantu wesao kuwa Wayahudi kwengia mwe uzumizi. 28 Wakekaa hamwe na wada wantu wekumzumiao Klistu kwa kisingi kilehacho.